Kodampaya 28 - Mataafa Qulqulloota

Pawloosi akka Maalta piitase pakateeta kara kitto kaye

¹ Eten nakaytan piitoppa kayne kammaayye, piitoose otanta pakateeta kara kitto an oppa kayne akkima Maalta kidammitton upnaanne.

² Orra piitoose pakateeta kara kitto qara kalo, paxaarumta a orra qawwannitto ino' kode. Sitiiyyi qoota roopa roope ikka damaannitto malla, apitta opayshen ka ino teyyaden.

³ Pawloosi ete hapujja pohe ka apittase oppopa kannooyye, foolase qaran xaate'e maaka sooke ka harka Pawloosi quda jaqqale ka quda xa ra'ini.

⁴ Orrase a Maalta ete maaka harka Pawloosi quda ra'ino ikka akkeneeyye, i'olli kidene “Namoose dukaatannen nama diika. Kadii punu puppeeta pakateeta kela nakaytan sooke nefooyye, firteeta Waaqa kela paheeta ka caatta in ettaninne.”

⁵ Pawloosi xoori maakaase isi quda apittoppopa kiskise ka kate, umma miiddota takka nefo isha qara in kayne.

⁶ Orrase ka asini ka kiini, “Lakko amma dakintaadi qappaajtaay, taaki a isi qara in upnini mali pi'a ka to'ay,” Ma xoori ete a kuttati asen miiddota takka nefo ka isha qara in kaynin ikka akkeneeyye, dikattaaysho'e purshen ka kidene, “Ini Waaqa!”

⁷ Porose an oppa kinno kapaayye piita a Puppiliyoosi a mukissampaytase a piitase pakateeta kara kittooti'i ca. Namoose tikaadipa ino teyyade ka kuyyaata sessa kara wa paxaara ino' kode.

⁸ Sitiiyyi aappa opa Puppiliyoosi awda isho sereerotanne qapame ka eyye' muke. Pawloosi ka isha kapopa kulle ka ishi Waaqa qinsade ka isha qara harkaadi qapade ka isha dinshe.

⁹ Ete sede koddite, kammaayye, paaqolaya a pila a piitase pakateeta kara kitto qara kala ka de'en ka dinen.

¹⁰ Orrase ka daassata kuttayteetan ino' de'e ka akkima ino ulfeessinaan ino akkishen ka eten markapan anta xaaneeyye wa ino parpaaccisna pisa markapa qara ino' fe'en.

Pawloosi akka Maltaayye desa katama Roomi opa aane

¹¹ Eten leyaa sessa maalta kara jarre kammaayye, markapase a Iskindiriya piitase pakateeta kara kitto oppa soroorase pire, oppa'en fayyanne ka anta xaane. Markapose qaraayye, milikkita a sallahama killoowwa a Diyoos qoroosi kidamma'e ca.

¹² Eten katama Siraakuusi kayneeyye, kuyyaata sessan eyye pirre.

¹³ Ka sekkamma pakateetoppan anne ka katama Arekiiyumi kayne ka eten eyye kuyyaata takka pirre kammaayye, qoota puppeeta tupatta xaate malla, kuyyaata lammattatiiyyi Putiyoluusipa anne.

¹⁴ Ka eyye hellaanno a kiristaana teyne. ikka akkan kuyyaata tappa ishootta kapa pirroe ino naappaden. Sekkammaayye anka Roomipa anne.

¹⁵ Orra amanno a Roomi kara co, ete qoota deenaannoti desa dakayeeyye, haka urmala Afiyoosi isho haka porase ‘Tikka sene a mukitta sessa’ kidammati ino mina de'en. Pawloosi ete ishootta akkeeyye, Waaqa kalataysade ka xasa oorsade.

Pawloosi wa Roomi kara kode

¹⁶ Eten Roomi kayneeyye, Pawloosi foolisitta a isha tooyto takka ishi daasame. Akka xawwa kallaado'e, ikka ishi faqqatamte.

¹⁷ Kuyyaata sessa kammaayye Pawloosi ka orra a Yihuta a Roomi kara kalo a kukutta halacciise ka ete ollopa de'eneeyye, ishootta kide, “Hellaanno, anti ishin dapayta an samayta Isira'eeli isho taanteta a aappadaannoti qara kode takka nefo in kitto. A koddito ma Yerusaalami kara'en hidme ka orra Roomi turopa tuukkame.

¹⁸ Orra Roomi ete ana qore kammaayye, wa an minan to'a qoota ana qara in teynin malla, natan ana sookissa dikade.

¹⁹ Yihutaata xoori qoota nataan sookeetiyyo toorte ka dawrite malla akkan kido, ‘Qeesaari nuqusase kutta a Roomi qaropa ana tarpishane’ kittessame. Ma xoori waan samaytiiyyon xasasa an qa po.

²⁰ Amma nefo waan malla ishin halacciise, akkan ishin akko ka sede ishina lelo malla. Anti kippeetase Isira'eeli daasamte mallan sansalaatosetin hidame.”

²¹ Ishootta ka ishi oorshen ka kidene, “Piita Yihutaati desa taptaappeta a qootaayti desa taafamte ino qara in kayne, umma orra Yihutaayye arepa de'eppa nama qootaayti desa wa neeqa torre taakki haasawade takka nefo in co.

²² Amanteese a ati kamma annitto porra piisoppa orra akkima toorro in upna. Semmalla dikattaayti maana akka kodde dakaya in heenna.”

²³ Ka ete ishi xoora qapen kammaayye, lekumtan tika a isha kara kalopa de'en. Isha ka teykanti paayye ka haka kalaakalati qoota mankisteeta Waaqati desa ishootta maakkumaanne, dikattaadi ishootta la'ayshe. Ka ishootta amansiisa'e seera Muuse isho mataaffa xuumampaya oppa akkissaanne qoota Yesuusi desa ishootta la'ayshe.

²⁴ Demo ka qaaleta a ishootta haasawade amanen; demo xoori in amane,

²⁵ Ka a olli in kallin mali oli kela pasen. A olli kela in, pasnin turan xoori, Pawloosi ete a piraampirati haasawannooyye ikide, “Wa Hapura Qulqulloota xuumampaytase Issayyaasi qudan aappadaassina haasawade dukaata.

²⁶ Qaalese nefo ikiini, ‘Samayse oppopa aane ka ishootta kide, ha dakaya iddakaynittan ma ishina kallin kitto, tooyyatta nefo eeyye tooyanittan ma a akkini a kittan.

²⁷ Ha orrose karittaaysho idundune, nappaasso nefo idakkaawen, ildaasso ka oli diippen; ma helati ildaassotinni akkan, ka nappaassotin dakayan, ka karittaayshotin matti qapnaadan; ka anopa tiitaawan, anti ka ishootta dininni heene.’

²⁸ Semmalla erkana a dinissa a Waaqa akkima orra a Yihutaata in koddinini erkamen upnaada; ishootta nefo i'owsadan ka teyyadan.”

²⁹ [Pawloosi ete sede haasawade kammaayye, Yihutaata akata oli shiisheetan eyye sookte ka tawte.]

³⁰ Pawloosi tikase a kira teyyade kara para lakki immakkoota kallaade. Ka orra isha kapopa deeno piisa teyyanni.

³¹ Ka qoota mankisteeta Waaqati desa torreetanne a nama takka nefo isha dawrini in kinnin mali qoota Poqalla Yesuusi Kiristoosi desa maxanyumaan kollinni.