Kodampaya 26 - Mataafa Qulqulloota

Pawloosi wa Akriibba tura haasawade

¹ Akriibba ka Pawloosi kide, “Akka qoota mattaaytiti desa haasawatto'e, ike faqqatamte.” Pawloosi ka harkaadi derayshe ka mina haasawade ka kide,

² “Atti nuquso Akriibba, kisseeta a Yihutaata ana qara dehasse piisa mina'e, oton awwe fuulaayti tura malseeta oorsannooyye xasa ana dakaanni.

³ xawwa desa, atti taanteta isho shiishsha a Yihutaata qanqannissa upta; semmalla akka opseetan ana dakkaysatto'en ke naappanni.

⁴ An innume co paayyatte atta akkan kallaade Yihutaata i'ana upta. Paayyote paayyatte samaytiiyyo oppa isho Yursaalami kara'e, caatta an kallaade i'upan.

⁵ Oton maakkuma heenaneeyye, amanteetinno oppaayye kitasene a aata kokkonnanna oppaayye akkan Feresitta kodde ka kallaade, paayyote paayyatte i'upan.

⁶ Amma xoori waan malla firteeta tura areppa qa'ade, kippeetase a kodayteeta a Waaqa aappadaanno daashe malla;

⁷ kippeese oppa kaya'e kaffa sene xanno kudanka lakki halkeetta ka kuyyaata'e, Waaqa waaqaysanni ka asanni; nuquso Yihutaata, kippeese minanneew ana xasaste.

⁸ Waaqa, akkima a orra le'e tootoppa xa'inno kodde, maana malla ishin oppa a amanammi in kinnin koddite?

⁹ Anti mattiyyo'e in piisade ka kide, ‘Hakan ettaninno'e, maxxose a Yesuusi a Naasirati torreeta ana parpaaccisni.’

¹⁰ Ka Yursaalami kara sedeew kode; hupna a ukkumeeta an saarra qeesewwa qara teyyadenne, orra amanno oppaayye akka orra lekayta hidamo'en kode. Ka ete ishootta lennaaneeyye, a ishootta lenna olli parkume.

¹¹ Ka a lekatin akka tikkasene a qinseeta a orra Yihuta kela qatta'aman ka poqalla qara afa otitta haasawadan; ishootta kitteessini ka ishootta qara a kuttati miirode. Ka katamadda a piita pilaati oppopa anni ka ishootta kamma daanni.”

Pawloosi atta akkima Kiristoosipa tiitawe torre

¹² “Ka qootose malla saarra qeesewwa qaraayye, hupna ukkumeeta immakkoota, isho ajaja teyyade ka Tamaasqopa anni.

¹³ Nuquso, eten poroppa cooyye, olliqqootta kuyyaatatiiyyi, anka la'ayta, a pirtota qara qapo akke. La'ayse nefo ana isho orra ana olli anno qara'e moonte xata la'aye.

¹⁴ Eten piisanti piitopa seheneeyye, nessa afa Iprutin kiino, ‘Sawuli! Sawuli! maana'e ana kamma pora daanni? Oton qaarta koraateta qara diinniiyyi, issiiwwi miiddita.’ Dakaye.

¹⁵ Anti ka kide, ‘Poqallaay, atti a ayno?’ Poqalla ka ana kide, ‘Anti an Yesuusise a atti pora daannitto.

¹⁶ Amma xoori xa'e ka qa'ado. Anti waan malla ketura akkaade, wa amma akkite isho waan itturopa kuli ke akkishaatinni akka orxaytiyyo isho maakkittiyyo ana kodditaati'in ke shuumatta fade.

¹⁷ Samayta Isira'eeli isho orrase Yihutaata in koddinin an oppopa ke erkinoo, kelaan ken paha.

¹⁸ Akka ishootta ildaasso panta ka tukkantoppa la'aytoppopa ishootta sookisso'e, ka hupna seetana kela Waaqopa ishootta oorisso'en koda. A ishootta ka ana amana minanne, haseenta juppoota akkadan ka orrase ana amane ka qulqllaawe olliiyyi lehanda qoottadan.’”

Pawloosi akkima qoota kodaaditi desa torre

¹⁹ “Semalla nuquso Akriibba, kelashaatose moonte xata ana daasame an tiinne.

²⁰ ma paayyota qaraayye, orra Tamaasqo kara co ka kamma desaaw orra Yerusaalami isho a piita Yihuta piisa oppa co ka Yihutaata in koddini kuli, akka juppootaysho oppa ooro ka Waaqopa tiitaawo ka juppootaaysho oppa ooretaayshoti wa akkinna kodo'en ishootta kollishe.

²¹ Wa malla Yihutaata tika qulqulloota kela ana qapte ka ana ikassa faate sedeew.

²² Haka awweti qaarqaarsa a Waaqa ana kapa in mayne; anka seminan a shakka ka a kutta' maakkummi. Ka are qa'anni. Wa xuumampaya isho Muuse turan kidene, ‘Asse koddita’ Haasawatta mali a pila an haasawanne.

²³ Ishootta nefo wa hasawadene ikidene, ‘Kiristoosi irakkada ka tootoppa xaana'e a paayyota kodda ka la'ayta dina samayta Isira'eeli isho orra a Yihutaata in koddinini akkisha.’”

²⁴ Pawloosi ete sede haasawannooyye, Fiistoosi nessa a kuttanne haasawade ka kide, “Pawloosi! amma oori, ittaaroonni; a kutta kollattaayti taarota qaranne ke kayte!”

²⁵ Pawloosi xoori i'orshe ka kide, “Ke a kuttati ulfeessame Fistoosi, anti dukaata isho wa qajeele'en haasawanni diisheey, an taaroonni an co.

²⁶ Nuqusa an tura la'ayshe ka haasawade wessen i'upa, sede nefo qoota dekandekatti in koddinin malla nuqusa akka upo in qalpeeffanni.

²⁷ Atti nuquso Akriibba, xuumampaya i'amanninni? Akkima amannitto in upa.”

²⁸ Akriibba ka Pawloosi kide, “Ha atti kiseese shakka kara'e kiristaana ana kooni.”

²⁹ Pawloosi ka kide, “Kiseeta a shakka koddite a kutta koddite ke patta a in koddinin maliiyyi, a awwe haasoosen xayyo dakaye piisa, hidosen xayyo maliiyyi akka a xayyo mina koddane'e Waaqan qinsanni.”

³⁰ Se kammaayye, nuqusase ka ukkumampaytase a piita isho Perniiqqe ka orrase ishootta olli kute'e piisa ka xa'e.

³¹ Ka ete eyye sooken ka annaaneeyye, olli kidene, “Namoose wa minan to'a taaki minan hidama takkan nefo in koone.”

³² Akriibba ka Fistoosi kide, “Namoose katin ‘Qeesaari nuqusasi kutta a Roomi qaropa ana tarpisha’ in kiinini kiiteeyye, nataan sookni heene.”