Kodampaya 25 - Mataafa Qulqulloota

Akkima Pawloosi nuqusa Roomi qaropa ikipaanynyeta kaassade

¹ Fistoosi ete Qisaariya piitase xaadi a mukinno opa kale ka kuyyaata sessa pire kammaayye, Yursaalamipa aane.

² Saarra qeesewwa isho kutkuttowwa a Yihuta takka takka ka eyye Pawloosi qara kisseetaaysho dehayshen.

³ Ka Fistoosi naappaden ka kidene, “Pawloosi Yursaalamipa dehassanne paxaarumta ino kode.” Wa malla asse kidene nefo, qoota poroppa Pawloosi tura asatta ka isha ikassa faden malla.

⁴ Fistoosi xoori i'ishootta kide, “Pawloosi piita Qeesaariyaati, tika hida kara tooytaama qara ca. Anti nefo amma irra qaran tiitaawa ka eeyyepa aana.

⁵ Ukkumampayaassin a ana olli Qiisaariyaapa de'en ka oton wa Pawloosi ishin dape'e caayye, eyye isha xasasen.”

⁶ Festoosi ete kuyyaata sette taaki kudan mina kitto ishootta kapa pire kammaayye, Qeesaariyapa aane ka ete eeyye kayeeyye parraytaadiiyyi pora a qaraxata firteeta faranno qara kute'e ka akka Pawloosi dehayshane'e ajaje,

⁷ Pawloosi ete dehaadeeyye, Yihutaata a Yursaalami deete isha kapa tiitasse ka qa'atte ka kissewwa a kokkoka lekaya a ishi maakitta teya in ettaninnini qara dehasse.

⁸ Pawloosi ka mina tamaakkade ka kide, “Anti ishin dapayta an seera Yihutaata isho tika qulqulloota taaki nuqusase kutta a Roomi qara kode in co.”

⁹ Fistoosi xoori Yihutaata xasassa fade ka Pawloosi kide, “Yursaalamipa anta ka eyye qootoseti desa ana tura tamaakkatta iheenta?”

¹⁰ Pawloosi xoori i'orshe ka kide, “Tin anti pora oppa tamakkatta ana parpaaccisno, Porase a nuqusa kutta a Roomi qara xata faranno tura'en qa'ade; atti nefo akka fayya upto mina'e, ishin dapayta an Yihutaata qara kode takka nefo in co.

¹¹ Oton ishinnin dapeeyye, taaki dapa an minan to'on kodeeyye, ana toota kela paho an kiini an co. Ma xoori otoon kisseetaaysho'en dartaayye nama ishootta ana tarpissa ka daassatan ettansho. Anti qeesaari nuqusase kutta a Roomi qaropan ikipaanynyeta kaassade.”

¹² Sitiiyyi Fiistoosi ka orrase isha dehaammo olli haasawade ka Pawloosi kide, “Oton qeesaari nuqusase kutta a Roomi qaropa ikipaanynyeta kaassatteeyye, nuqusase kutta turopa i'anta.”

Pawloosi akkima Akriibba isho Perniiqqe turopa dehaade

¹³ Kuyyawwa lamaya kammaayye, nuqusase Akriibba isho Perniiqqe Fistoosi okaadissa'e ollin Qeesaariyaapa de'en.

¹⁴ Qoota kuyyawwa lekaya eyye jaren malla, Fiistoosi qoota Pawloosi desa nuqusa Akriibba torre ka kide, “Nama takka a Filiksi hide ka are diishe ca.

¹⁵ An Yursaalami kara cooyye, saarra qeesewwa isho qimoota Yihuta, ana qare isha xasasen ka akkan isha qara' farato'e, ana naappaden.

¹⁶ Anti xoori in ishootta oorshe ka kide, ‘Nama takka oto xasasamooyye, haka orrase isha xasase turopa dehaado ka mina malseeta oorsado maliiyyi, namase tarpissa ka daassata taanteta a mankisteeta Roomi'in.’

¹⁷ Semmalla, ete orrase isha xasasno oli pohe ka arepa de'eyye, anti an anjarrin malin eennow parraytaadiiyyi pora a qara xata farannaan qara kute'e ka akka Pawloosi ana turopa dehayshane ajaje.

¹⁸ Orrase isha xasasno ete haasawatta isha kapa qa'adeeyye, wanjala a qara dehayshen an asade mina in co.

¹⁹ Ma qoota amanteetaaysho isho qoota Yesuusise to'e, Pawloosi ka ‘cattampayta kodde’ kiinooti desa oli shiishni.

²⁰ Anti nefo qootan wa asse paha kara qoreeta oppa rakkade mallan Pawloosi kide, ‘Yursaalamipa anta ka qootoseti desa eyye tamaakkatta iheenta?’

²¹ Isha xoori, akka Qeesaari nuqusase kutta a Roomi deexoose xaadi ishi tooyyo fade ka ‘Qeesaari nuqusase kutta qaropa ikipaanynyeta kaassade.’ Anti ka hakan eeyyepa isha erkino kara'e, akka tika hidaati jaro ajaje.”

²² Akriibba ka Fiistoosi kide, “Anti nefo a namoose haasawannooyye dakkayan heena.” Fiistoosi ka ishi kide, “Parri isha dakayta.”

²³ Semmalla parraytaadiiyyi, Akriibba isho Berniiqqe mehaddaasso a mankisteeta'e kalsaden ka ulfeena kuttan saara a xela oranna isho orra katamaappa matta qapo tura qatten ka de'en ka tika firteeta kelopa kullen. Sekkammaayye Fiistoosi ka “Pawloosi halaciise.”

²⁴ Ka kide, “Nuquso Akriibba ka ishina orra ino olli co, piisaayye, namase a Yihutaata ullupnitto ka kiinitto, ‘Namoose arepa desa caatta isha parpaaccisni in co’ Ka akkan isha qara' farato'e Yursaalami isho are ana kaassatte tin sede a are akkinittan.

²⁵ Anti xoori dapa a minan to'o, takka nefo an qara an teyne. Isha qoota, ‘Qeesaari nuqusase kutta a Roomi qaropa ikipaanynyeta kaassade’ mallan, eeyyepa isha erka piisade.

²⁶ a koddito ma, dapa isha qara te'ade an poqallaayyo taafo in co. Semmalla oto isha qortan kammaayye, akka an wa an taafa akkado mallan kide ka fuulaayshin turopa ka laaddi nuquso Akriibba fuulaayti turopa isha dehayshe.

²⁷ Oto nama hidame taanynya opeela ca opa erkammooyye, wa ishin xasasame lela diissata, likkeeta ana in pahanaanne.”