Kodampaya 23 - Mataafa Qulqulloota

¹ Pawloosi ka firtishoonkotase quda ilda kode ka kide, “Hellaanno! anti haka awweti a karittiiyyo ana qootinni in kinnin malin fuula Waaqa tura kallaade”

² Saarase a qeesewwa Hanaaniya xoori, akka afaappa isha dayshane'e orra Pawloosi kapa qaqaade ajaje;

³ Sitiiyyi Pawloosi ka Hanaaniya kide, “Atti ke a qussa aannatan daatame paho, Waaqa asseew ke daysha! Seeran deexiyyo farata'e kutiite ka, akka seera mali ana dayshane ajajnii?”

⁴ Orra eyye co ka Pawloosi kide, “Qeesittase kutta a Waaqa'e, onni?”

⁵ Pawloosi ka kide, “Hellaanno anti akka qeesitta kutta kodde an upnaanne; maana malla a kiinitto mattitta a samaytaayti qara'e, afa neeqa in haasawadan itaafamte!,”

⁶ Pawloosi, orra eyye co oppaayye, paka takka akkima Saatuqaata kodde, paka takka ka Feresaata kodde upnaade ka nessaadi kuttishe ka firtishoonkotoppeela haasawade ka kide, “Hellaanno anti an Feresitta a Feresaattoppa dalade! Tin amma waan malla firteeta turoopa dehaade nefo, kippeetase daasamte isho tootoppa xaana a orra le'eti minanne.”

⁷ Pawloosi ete sede haasawadeeyye, peeqqayta otanta a Feresaata isho a Saatuqaata oppa xa'e firtishoonkotase ka lakki qitte.

⁸ Saatuqaata ikiini, “Tootoppa xaana in caan, umma erkampattowwa in caan, umma hapura nefo in co” Feresaata xoori ikiini, “Sene piisa ca” ka amanni.

⁹ Sitiiyyi horayta ka ollin koope. Kollissampaya a seera a Feresaata quda kodde demo ka xa'en ka shiishen ka kidene “Ino namoose qara wa neeqa takkan nefo an akkine. Takka punu hapura taakki erkampattoota Waaqa'e ishi haasawadeey ino maanan upna.”

¹⁰ Qoota peeqose qara'ew koopaan aane malla, akka orrose Pawloosi in nyifannini'i, ajajampaytase ka fuure ka xelaadi a oranna ajaje ka kide “Lekkada ka orrose oppaayye Pawloosi tafa ka ishin xooya ka safarase a oranna oppopan aana.”

¹¹ Parraytaadi halkeetteeyye, Poqalla ka Pawloosi kapa qa'ade ka ishi kide, “Japaado, akkima Yursaalami kara ana maakkumte mina'e, asseew Roomi kara ana maakkuma ke parpaaccisniiy.”

Sullaata a Pawloosi ikassa sulamte

¹² Ete pariteeyye, Yihutaata ka ollopa deete ka xaxatte ka olli kiite, “An Pawloosi ikanno mali unta an dammo umma pisha an ikkino”

¹³ Orra sullaase oppa olli kale lekumasso kunda afur qara jaali.

¹⁴ Ka saarra qeesewwa isho qimoota kapopa aanen ka ishootta' lelen ka kidene, “An Pawloosi ikanno mali akkan we an immannin, akatan olli xaxanne,

¹⁵ Semmalla ishina firtishoonkota olli kala ka takka a kuttati isha qortan pahanaysha ka akka Pawloosin ishina de'ane'e, ajajampayta kaassada. Ino a are in kaynin turanne, isha ikassa in harmisanneey.”

¹⁶ Ma xoori, ashuma Pawloosi qoota sullaase dakaye malla, safara a xela oranna opa aane ka kulle ka Pawloosi' lele.

¹⁷ Pawloosi ka motoloqaddaappa takka hale ka ishi kide, “innoosen wa ajajampaytase a xela orannaati lelanie, qapaneey, isha kapopan aane”

¹⁸ Motolaqittase ka innasene qeede ka ajajampaytase kapopan kulle ka kide, “Pawloosise hidame ana hale ka qoota innoosen wa ke lelane qapan malla akkan ke kapopan de'o'e ana naappade.”

¹⁹ Ajajampaytase ka innasene tupa harka qape ka qindopa desan kide ka xawwi desa isha kaassade ka kide, “Wa ana lelta maana?”

²⁰ Innasene ka kidene, “Yihutaata takka a deexoose a Pawloosi a kuttati kara qorto pahanaatta ka akka parri firtishoonkota turopa ishootta isha dehasso akka ke kaassatto olli kaltee.

²¹ Ma xoori atti ishootta an owsadan Orra nama kunda afuri qara qapo isha ikassa tura asade ka olli xaxade ka kide “Hakan isha ikanno mali unta an immanno umma pisha an ikkino. Ka wa atti ishootta oorissa pattaaw asanniiy.”

²² Ajajampaytase ka innasene kalshe ka kide, “Akka wessen ana' lelte nama takka nefo kapa an lelan.”

Pawloosi akka Filiksi mukissampaytase a piita turopa dehaade

²³ Sekkammaayye ajajampaytase a xela oranna ka motoloqaddaadippa nama lakki hale ka ishootta kide, “Oto halkeette saateta sessa kaytooyye, orra a qiisaariyaapa aano, xela oranna dippa lakki, ka a fartan torpina kunda tappa isho a oranna tottorpina dippa lakki harmisada.

²⁴ Ka Pawloosi kuli'i, farta harmisha ka akka Filiksi mukissampaytase a piita kapa nakaytan kayo koda.”

²⁵ Ka taptaappeta a asse kiinitto kuli taafe,

²⁶ “Ana Qelawdoosi Lusiyuusi kapaayye ke a ulfeessame Filiksi a mukissampayta piita kode'e, nakayta a ke koddo.

²⁷ Yihutaata namoose qapte ka allu ikassa. Anti xoori akkima isha nama Roomi kodde qootan upnaade malla, xela oranna ollin awle ka ishan pahe.

²⁸ Ka maana minan akka isha xasasen upnaatta fade ka firtishoonkotaaysho turopa isha dehayshe.

²⁹ Wa malla isha xasasene nefo, akkima seeraaysho malla koddite in upnaade. Ma xoori wa toota taaki hida qaran isha kaya in caan.

³⁰ Namoose ikasa'e eten sullaata a qara kodamte dakayeeyye, eennowwen ke kapopa isha erke. Ka orra a isha xasasno nefo wa ishin isha xasasnaane akka ke tura dehayshane'e, ishootta' lele.”

³¹ Semmalla xelase a oranna ka akka ajajame qara'e, halkeetteeyye Pawloosi qeede ka Antibaatirisin kaye.

³² Ka parraytaadiiyyi, akka xela a fartan torpino Pawloosi olli antaaysho kammaaw caado' koden ka ishootta safaraaysho a oranna opa tiitaawen.

³³ Xelase fartan torpino ete Qiisaariya kayeeyye, taptaappese'e mukissampaytase a piitati daashen ka Pawloosi isha turopa dehayshen.

³⁴ Mukissampaytase a piita ete taptaappetase nappape kammaayye, Pawloosi kaassade ka kide, “Atti a nama piita aysha?” Ka ete akkima nama piita Kilqiya kodde upnaadeeyye,

³⁵ ishi kide, “Oto orra ke xasasno de'oyyen dee'aayti dakaya” Ka akka tika mankisteeta a Herodiisi kara tooytamo ajaje.