Kodampaya 22 - Mataafa Qulqulloota

¹ “Hellaanno ka aappadaannooyye! Tin amma malseetan ishin tura oorsanno, ana qara dakaya”

² Ete afa Iprutin haasawanno ikka dakayeneeyye, a qaran qapto'e jaw kiden; Pawloosi ka haasawattaadi kammaaw kinnaade ka kide,

³ “Anti an Yihutitta a katamasene a Terseesi Kiliqiya kara caati delade; ma katamoosen a Yursaalami kara'en kuttade. Kollissampaytiiyyo nefo Kemaliyaali, anka seera aappada qanqannissa kollade ka akkama awwe ishina yoota qaptan mina'e anti asseew Waaqa yoota qapnaade

⁴ Ka orra amanteeta kiristinna kamma anno piisa haka tootati kamma daanni. Ka diira isho iskatta qaqqapni ka akka tika hida karopa kalne kooni.

⁵ Sede akkima dukaata koddite qeesitta kutta isho qimoota a firti shonkoota piisa ana maakkuma. Ka laadi akkiman orrose Tamaasqo kara co hido ka Yursaalami opan deena ka qattasiissa ettansho'e, taaptaappeta a orraaysho a Tamaasqo kara cooti taafen ishootta qara teyyade.

Pawloosi akka Kiristoosipa tiitaawe torre

⁶ “Eten Tamaasqopa anno ka katamasene kapa' dehannooyye, olli qootta a kuyyaata oppa an isqara an upniniiyyi, la'ayta kutta moonte xata ana kapandesa la'aye,

⁷ Sitiiyyi anka piitopa pi'e, ka nessa a kiino ‘Sawuli! Sawuli! Maana'e ana kamma pora daanni?’ dakaye.

⁸ Anka kide, ‘Poqallaay, atti a ayno?’ Isha ka ana' kide, ‘Anti an Yesuusise a Naasirati, a atti pora daannitto’

⁹ Orra ana olli co la'ayse akke diisheey, a isha ana olliiyyi haasawannooyye nessaadi in dakayyne.

¹⁰ Anti ka kide, ‘Poqallaay, maanan koda?’ Poqalla ka ana kide, ‘Xa'e ka Tamaasqo opa aane, wa koda ke parpaaccisnitta piisa eyye ke' lelamaneey’

¹¹ Kuttuma a la'aytoseti qaran xaate'e qootaan paata akkeeta an ettaninnin malla, orrase ana olli co ka harka ana tupa qape ka anan aane ka Tamaasqon ana kaye.

¹² Eeyyeeyye nama takka Hanaaniya kidammo ca namoose nefo qanqannissa seera ulfeessini Yihutaata a Tamaasqo kalto piisa ka isha kalataysanni.

¹³ Isha ka ana kapopa de'e ka ana kapa qa'ade ka ana kide, ‘Innaanno Sawuli, ildaatti a paata akken’ ildaayyo ka eennow paata akken anka isha kuli akke

¹⁴ Isha ka ana kide, ‘Waaqase a aappadaannoti, akka heennaadi upnaatto ka hanqeellittaadi akkito'e ka nessaadi dakayto'e turanneew ke ree'ade;

¹⁵ Wa malla asse kode nefo, wa akkite ka a dakayteeti desa akka nama piisa tura'e, maakkittaadi koddito malla.

¹⁶ Ka kuli amma maana asni? Xa'e ka maxxaadi haleetan jaqqame; ka juppootaaytippa jaqado.’

¹⁷ “Sekkammaayye eten Yursaalami opa tiitaawe ka tika qulqulloota kela Waaqa qinsannooyye, oppopa ollin tawe ka keleshaata akke.

¹⁸ Poqalla ka ana tura akkaade, ka ana kide, ‘Wa qootiyyo desa maakummitta in teyyadaneey jarjartan Yursaalami kara sooke!’

¹⁹ Anti ka kide, ‘Poqallaay! Akkiman tikkasene a qinseeta a orra a Yihuta kara pora aane ka a ke amanna hide ka oppa qide, ishootta mattaayshoti i'upan.

²⁰ Awta maakkittase xaayti Istifaanoosi ishshameeyye, anti mattiyyo'en orrose isha ishshe kapa qa'ade ka seppa' sale ka mehaddaasso a kalsannaane tooytini’

²¹ Poqalla ka ana' kide, ‘Qootan orra a Yihutaata in koddinin a pora sekaayye co oppopa ke erkino malla xa'e ka aane!’”

²² Hakoose kara'e samayta piisa haasasene a Pawloosi dakkaysanni. Sekkammaayye xoori, nessaaysho'e kuttishen ka kidene, “Nama asse paho a piita qara alle pato! nama asse paho caattan kinnaatta isha parpaaccisni in kitto!”

²³ Ishootta ihorri ka ohawwaasso piitan qiini ka kuyyaalayta moontan dela pulli,

²⁴ Ajajampaytase ete sede akkeeyye, akka Pawloosi safarase a xela oranna karopa kullishane ajaje ka wa malla samayta asse isha qara horra upnaatta'e akka karafamo ka qoramo ajaje.

Pawloosi akka nama Roomi kodde upnayshe

²⁵ Ma xoori ete teepaan isha hida ka karafa' harmisannaaneeyye Pawloosi ka motolaqitta a isha kapa qa'ade kide, “Hela nama a nama Roomi kodde a qara in faratammin maliiyyi, akka karaftan i'ishina' faqqatamte?”

²⁶ Motolaqittase ete sede dakayeeyye, ajajampaytase kapopa aane ka ishi kide, “Ata maana koota? Ha namoose nama Roomi!”

²⁷ Ajajampaytase ka Pawloosi kapopa desa dehaade ka ishi kide, “Intoonno ana' leleey hela atti a nama Roomi'i?” Isha ka kide, “Aa.”

²⁸ Ajajampaytase ka kide, “Ha anti nama Roomi koddeeta kaajaa kuttaatinnin piddade” Pawloosi ka kide, “Anti xoori nama Roomi'in kodde ka dalade.”

²⁹ Semmalla orrase isha qora harmisade ka eenow isha kapa sekaade. Ajajampaytase ka akkima nama a nama Roomi kodde sansalaatan hide upnaade ka fuure.

Pawloosi akka firtishoonkota Yihuta turopa dehaade

³⁰ Parraytaadiiyyi ajajampaytase ka wa minan Yihutaata Pawloosi xasaste upnaatta fade ka akka saarra qeesewwa isho firtishoonkota piisa ollopa deeto ajaje ka Pawloosi kuli hidaappa fure ka ishootta turopan de'e ka ishootta tura qa'atishe.