Kodampaya 20 - Mataafa Qulqulloota

Pawloosi akka piita Meqedooniya isho a Kirikki opa aane

¹ Ete horaytase jaw kide kammaayye, Pawloosi orra amanno takka ollopa halacciise ka qaaleta dehaamtatin ishootta' xasa oorshe ka kapa xa'e, ka Meqedooniyaapa aane

² ka porroosen a oppan tarrpina oppa orra amane dehaamta a kuttan kokkonnassaanne, piita Kiriiki opa aane.

³ Ka eyye leya sessa pire ka sekamma piita Sooriya opa markapan anta dikade. ma ete akka Yihutaata isha qara sullaata koote upaadeeyye, qinda Meqedooniyaatinni alle tiitawa' piisade.

⁴ Peeriyaayye Soobatiroosi inna Biirhuusi ka Teseloonqeeyye Arisstirokoosi isho Sikkonduusi ka Tarpeeyye Kaayiyoosi ka Isiyaayye Timootoosi ka Tiqiqoosi isho Tirofimoosi ka isha olli aanen.

⁵ Ishootta ino turopa tarrpen ka Tiro'ada ino asen.

⁶ Ino' xoori, xayso nessuma a laaqqota kammaayyen katama Filippisiyuusitiiyyi markapan xaane ka kuyyaata keni oppa'e, Tiro'adase a ishootta kara caan kayne ka eyye kuyyaata tappa pirre.

Pawloosi akka a piraampirati piita Tiro'ada tooyye

⁷ Torpaappa kuyyaata paayyotatiiyyi, laaqqoota moossatta ka ollin dameeta mallan ollopa anne. Pawloosi, qoota parraytaadiiyyi annta' xa'o malla, orrose ollopa de'eti'i haasawnni, ka haasasene xaadi haka olli qootta halkeettati derayshe.

⁸ Fooqeetase an qaropa anne qaraayye, ipsa lekaya ca.

⁹ xayyoolayta takka Ewtekiisi kidammo ka maskooteta kara kute'e. Qoota Pawloosi haasa derayshe malla, xayyoolayse ka mukitta oppa tawe, Qoota mukitta isha qara pire malla, ikka fooqeeta sessattati pi'e. Orra ka a to'e piite qeede.

¹⁰ Pawloosi xoori ilekkade ka innasene qara' xata kide ka hadduune ka kide, “Icaaneey in tammaqan.”

¹¹ Pawloosi ka fooqeetase qaropa tiitaawe ka fayyade ka laaqqota moossade ka orra amanno olli dame ka ete haka parinitto kara orrase olli haasawade kammaayye tawe.

¹² Ishootta ka xayyoolayse dine tikopa qeeden ka harmo' xasa oorsaden.

Pawloosi akka Tiro'adaayye desa Miliitipa aane

¹³ Pawloosi qoota ino ajaje ka kide “anti loqqaannen haka Asoositi de'aay, ishina markapan ana turopa qatta ka aana. Anka markapan isha qeeda malla isha turopa markapan qattine.”

¹⁴ Eten Asosi isha oli akkine kammaayye, markapa oppa'en isha fayyinne ka mitilinipa ollin anne.

¹⁵ Ka parraytaadiiyyi eyye xaaneew ka porase Kiyosi minan desa co oppa markapan kayne ka kuyyaata a kamma deeteeyyeew Samoosipa tuulline ka parraytaadiiyyiiw Miliiti kayne.

¹⁶ Pawloosi akka Issiya kara kiseeta in pirrin malla kide ka Efesoonippan annta ka tarpeeta fade. Wa malla asse kode nefo, akka xayso nessumasene a kuyyaata kunda kenattaati'i Yursaalami kayeeta dikade malla.

Pawloosi dehaamta a piraampira qimaya Efesooniti daashe

¹⁷ Pawloosi Miliiti desa Efesoonipa nama erke ka qimaya tika kiristaana halacciise,

¹⁸ ka ete isha kapopa de'eneeyye, ishootta' kide, “Kuyyaata an Issiya karopa kulle paayyatte, kuyyata mina atta akkan ishin olli kallaade ishina i'uptan.

¹⁹ Sullaata a Yihutaata minanne, kati punu rakkoota ana qara kayte nefooyye, naaluma immakoota isho ilmaamaannen Poqalla koda kooni.

²⁰ Eten mooradda isho tikkaassin kara ishin kollinnooyye, wa ishina we pataysha piisan ishina' lele diisheey, we takkan nefo ishin qara an hattinne.

²¹ Yihutaata isho orra a Yihutaata in koddinin akka juppootopa ooran ka Waaqopa tiitaawan ka Poqallaanno Yesuusi Kiristoosi amanane'e, tura desa in ishootta' lele.

²² Amma otoon eyye kayooyye, wa ana qara kaya an in upnin malin Hapura Qulqllootatin ajajame ka Yursaalami opa anni.

²³ a koddito ma, katamaddappaayye akkima hida isho rakkoota ana qara kayto, Hapura Qulqulloota i'ana' lele.

²⁴ Otootase a fayya a daassata Waaqa kollissa'e, Ka kodoose koda'e, ataraan Poqalla Yesuusi qara teyyade ana dikkisho diisheey, caattiiyyo we kapa an dikni an co umma isi an suraysanni an co.

²⁵ Haka ammati ishin piisa oppan pora a'anni ka mankisteeta Waaqa ishina' torrini, ma arepa desa akkima ishin oppa nama takka nefo ana in akkinnin in upa.

²⁶ Semmalla ishin oppa oton nama takka pattaayye, akkan oppa an kaassatammin, awwewwen ishina upnaanni.

²⁷ Dikatta a Waaqa piisan ishina' lele diishe waan ishin qara hattishe takkan nefo in caan.

²⁸ Hapura Qulqulloota qaratooyampaya'e ishin kode ka ishin shuume; semmalla issi'i isho xellootoseti tooytaada ka tikase a kiristana a Waaqa diika innaaditin furade tooyta.

²⁹ Oton anti tawo kammaayye, orra a yooyta mina' nyiraamaya kodde ka xelloose in suraysannin akka ishin oppopa kullo in upa.

³⁰ Laadii orra takka takka ishin oppa xa'a ka kollissa a quumade kollissan orra amanno lekayta issipa tita.

³¹ Semmalla ishina takka takkaayye sede an para sessa halkeetta ka kuyyaate ilmaamaayyo urqissan ishin dehaame, matte oorsada ka tooytaada.

³² Amma nefoow, Waaqa isho qaaletase a daassataadi isase ishin kokkoonnasso ka qulqullowwaappa ishina lehna daassata ettanisso'en atara ishin daanni.

³³ Anti pirreeta ka warqeeta isho mehadda a kalsannaane anama takka' nefo an xajeelle.

³⁴ Anti akkiman harkoosen xayyon koda koono ka isi isho orra ana quda co wa parpaaccisnaatin qaarqaarro, ishina mattaayshina i'uptan.

³⁵ Qaalese a Poqalla Yesuusi Kiinitto ‘Ateyyanno kapaayye a daanno eeppisame.’ Matte oorsatta ka harkaannon koda kodeeta ka rakkatampaya qaarqaareeta akka ino parpaaccisnitto pora lekayteetannen ishina akkishe.”

³⁶ Sekkammaayye Pawloosi ishootta piisa olli kilpiippade ka qinsade.

³⁷ Ikka piisanti pooyen ka Pawloosi isi qudopa qapen ka dinken.

³⁸ Wa malla a kuttati nyarrahene sede a ishootta kide, “Arepa desa a ana a akkitan” malla. Ka haka markapati isha keessen.