Kodampaya 2 - Mataafa Qulqulloota

Akka Hapura Qulqulloota tamaarewwa Yesuusi qara' lekkade

¹ Ete xayso nessuma kundda kenatta' kayteeyye, tamaarewwa piisa takka'e pora takka opopa ollopa aanen.

² A isiqara in upnin mali nessa a puppeeta kokkoka paho ka moonte xata de'e ka tikase a kela caan immake.

³ Arrapadda a hapulpula apitta' paha ka ishootta akkaaden. Ka olkela qootamen ka ishootta takka takka qara' kuti'en.

⁴ Ikka piisanti Hapura Qulqullootatin immakaaden. Ka akka Hapura Qulqulloota akka haasawadane, ishootta ettanissa daashe qara'e, afadda pilaatin haasawatta paayyen.

⁵ Sitiiyyi, Yihutaata a qinseetan japaannitto ka piitadda pisa oppaayye deete ka Yursaalami kara kitta.

⁶ Ete nessoose dakayeneeyye, orra lekayta ka ollopa de'e. Ka qoota tamaarewwasene afadda a orroose ollopa de'e' haasawannaan, ikka dakayen malla oppa' qawwaawen.

⁷ Ka oppa daxxa ka oppa qawwaawaan kidene, “Sene asse haasawanna piisa orra Kelila'enne?

⁸ Ka kuli ino takka takkaayye attan ishootta afadda piitinno an kara dalanne' haasawanna, dakayninna?

⁹ Ino piita Baarte ka a Meedi ka a Elaami ka a Mosoppotaamiya ka a Yihuta ka a Qebbedooqiya ka a Baantoosi ka a Issiya

¹⁰ ka a Firkiya ka a Binfiliya ka a Kipsi ka a awrajjadda Liipiya a piita Qereena kapan desa ca oppan kalla; ino Yihutaata a Roome deete isho ino a amanteeta Yihuta oppopa oore areen kinna.

¹¹ Ka akkamose mina'ew orra piita Qerteesi isho a Arapa ka caaw, tin ino piisanti anka ishootta kodaase a Waaqa kutta afaaddannon torrina dakayninna!”

¹² Semmalla ikka piisanti oppa' qawwaawen ka wa kidane' dapen ka olli' kidene, “Ata wessen maana koddan!”

¹³ A demo xoori ishootta qara seesen ka kidene, “Ha maaddota taadeta wayneeta'e iken ka maashshooden.”

Haasa Peetiroosi' haasawade

¹⁴ Sitiiyyi Peetiroosi ka kudanka takkasene olli qa'ade ka nessaadi kuttishe ka samaytaseti' haasawade ka kide, “Ishina a orra piita Yihuta isho ishina a Yursaalami kara kala piisaayye, wessen kodde upnaatta'e; waan haasawanna dakkaysada!

¹⁵ Amma teykante saateta sessaawweey akka dikatten mina'e orroose in maashshoonne.

¹⁶ Ma sede wa malla koddite, qaaletase a xuumampaytase Iyyu'eli haasawade ka kide,

¹⁷ ‘Ha Waaqa ikiini, Kuyyaata piraampiratiiyyi, asse koddita; anti hapuriyyon nama piisa qara' tuqa. Hellaassin a diira isho a tuparra ka xuuma haasawadan, xayyoolaytaayshin keleshaata akka, qimayaassin nefo ka olsa olsootta.

¹⁸ Asseew kuyyawwosen karaayye, orxayaayyo a diira ka a iskatta qara'en hapuriyyo tuqa; ishootta ka xuuma haasawadan.

¹⁹ Illi moonta quda'e daxxowwan koda. Ka xati piita qara'e wa orra qawwanna akkisha, Diika ka apitta isho qayanqayoota qayya ka akkaatta.

²⁰ Kuyyaatase a Poqalla' kutta ka orra qawwannitto a in kaynin turan, Piirtota itukkanta, Leya ka diika pahanaada.

²¹ A maxxa Poqalla haleeno pisa ka dina.’ Akka dikkatto malla.

²² “Ishina orra Isira'eelitiiyyi, qaalese dakkaysada! Akka ishina mattaayshina uptan mina'e, aynuma a Yesuusise a Naasireti qudanne Waaqa otantaayshin oppa' kodaddaasene kukutta ka orra qawwanna isho milikkitadda a kodeetin akkishe.

²³ Isha' nefo mattaadi'i, akkima Waaqa xattaaw turan koda' qapade ka upnaade qara'e ishina' tarpe ka daasame. Ishina ka akka harka tiyyoolaya oppa' fannisamo ka to'o' kooten.

²⁴ Waaqa xoori toota isha qapeeta ka isha hattissa in ettaninne. Waaqa hupna toota'e pashshe ka tootoppa isha xaashe.

²⁵ Taawwiti qootaadi desa ikiini, ‘Awta piisan Poqalla ittura' tooyni, Akkan an yaaqyaaqnini'i, isha akkittiiyyooyye ca.

²⁶ Semmalla karittiyyo ixasoode. Afaayyo ka xasoottaan immakaaden, To'ampayteetase xayyo a dakinta' nefo kippeetanne kallaatta.

²⁷ Atti Si'ooli kara a ana a' diisso, umma qulqullittaayti akka hawla kara' japo a' kooto.

²⁸ Pora caatta'e ana' upnasse. Qoota' ana olli kitto malla, xasoottiyyo immakkoota kodda.’”

²⁹ “Hellaanno, Taawwitise a aappadaanno a xatta oppa takka kodde akkima to'e ka hawlame, hawlaadi nefo ka amma ikki are ino oppaayye co, ana la'aysho ka ishina' lelo.

³⁰ Taawwiti malla sede haasawade, qoota xuumampayta kodde ka kippeetase a Waaqa xaxaan ishi' kale ka kide, ‘Sanynyeetaayti oppan nama takka sufaanaayti qara' kutiisha’ a upo malla.

³¹ Se minanne Kiristoosi akka Si'ooli kara in hasnini'i, dakintaadi ka hawla kara in japnin ka in hasnini' qoota turan akke malla qoota tootoppa xaanaaditi desa xuuma haasawade.

³² Waaqa Yesuusise tootoppa xaashe. Ino piisanti anka an sedeeti maakkiyya.

³³ Ete harka Waaqa a akkittati kutiitta' opeela kideeyye ka kippeetase a Hapura Qulqulloota Waaqa Aappa qara teyyadeeyye, sede a akkinittan ka dakaynittane tupa xata tuqe.

^34-35 Semmalla a moontopa fayyade qoota Taawwiti in koddinin malla, ihaasawade ka kide, ‘Ha Waaqa iPoqallaayyo' kide: Hakan paarkaaladdaatti hupnaayti a ukkumeeta' kelopa ke oorinno kara'e,’” Harkiyyo a akkittati' kuti'e.’

³⁶ “Semalla Yesuusise a ishina fannisten Waaqa akkima Poqalla ka Kiristoosi kode, samayta Isira'eeli piisa a dukaatan sede upnaado.”

³⁷ Orrase ete sede dakayeeyye, ikka a kuttati karittaaysho karanxata ishootta' dakaatte, ika Peetiroosi isho erkamampayasene ata haseeti' kidene, “Hellaanno! Ka kuli maanan koona?”

³⁸ Peetiroosi ka ishootta' kide, “Juppootaayshin oppa oora ka akka juppootaayshin ishina' hasto'e, ishina takka takkaayye maxxa Yesuusi Kiristoosin jaqqama, Hapurase a Qulqulloota daassata Waaqa' kodde' teyyattaneey.

³⁹ Qaalese a kippeeta ishin ka hellaassin, isho isasene pora sekaayye ca a Waaqa Poqallaanno issipa halaada piisati'iiy.”

⁴⁰ Ka qaaleta pila lekayteeta ishootta' maakkume ka turadesaaw ishootta dehaame ka kide, “Qitaateta quumarose a xelta qara' kaynitto kelaayye issin paha!”

⁴¹ Ishootta oppa lekaya ka qaalese' teyyaden ka jaqqamen. Kuyyaasetiiyyi, nama amane a kuma sessa mina co ka padaawame.

⁴² Ishootta' nefo kollissa a erkamampaya' dakayeetan ka takkumtan kallaattaan ka damta ollin dameeta isho qinseetanne japaanni.

Takkumta hellaa Kiristaana ka ollin kallaattaaysho

⁴³ Sitiiyyi harka erkamampaya Yesuusi oppa'e qoota wa orra qawwanna ka daxxowwa lekaya kodammaan malla, orra piisa fuuraan immakaade.

⁴⁴ Orra amanno piisa takkumtan ollin kallaanni; wa qapane pisa kan a olturatta'ew.

⁴⁵ Dullaasso ka teyantaaysho'e kanni ka nama piisa akkima parpaaccisnitto mina olli' qoonni.

⁴⁶ Ka awta piisa tika qulqlloota' kelopa ollopa anni ka tikkaassotiiyyi oltura laaqqota moossanni ka xasootta ka karitta fayyaatin dammi.

⁴⁷ Ka Waaqa kalataysanni. Nama piisa ka ishootta ulfeessini. Waaqa ka orra dinno awta piisa ishootta oppopa padaawni.