Kodampaya 18 - Mataafa Qulqulloota

Pawloosi wa Qorontoosi kara' kode

¹ Sekkammaayye Pawloosi ka Ateenaayye xa'e ka katama Qorontoosi opa aane

² ka eyye'e, Yihutitta takka Pentoosi dalade, Aqilla kidammo akke. Qoota Qelaawdoosi nuqusase a Roomi kutta, akka Yihutaata piisa Roomi kara sookto ajaje malla, Aqiila isi kateetaadi Pirisqilla ollinni siti Taaliya kara sooken. Pawloosi ka ishootta kapopa aane ka oli upnaaden.

³ Kodaadi qoota a xaaysho mina tukkana heeddissa kodde malla, ikka ishootta kapa kuti'e ka olli kodase kooni.

⁴ Ka sampata mina'e, tikase a qinseeta a orra Yihuta opa anni ka haasawattaanne Yihutaata isho orra a Yihutaata in koddininiti oli kela la'anni.

⁵ Ete Sillaasi isho Timotoosi piita Meqedooniyaati de'eneeyye, Pawloosi kokkonnumaanne akka “Yesuusi Kiristoosi kodde” Yihutaata maakkummi ka kollinni.

⁶ Ma xoori ete Yihutaata isha qara xaate ka isha otteeyye, mehaddaade a kallsade quda kuyyaalayta dawdawade ka ishootta' kide, “Oton ishin qara'e faratammiiyyi, dapaayshin minanne ishin qara' faratammi, anti oppa an kaassatamo. Arepa desa orra a Yihutaata in koddinin oppopan aana.”

⁷ Semmalla Pawloosi ka ishootta kapa xa'e ka tika aappa takka Titoosi Iyyoositoosi kidammo opa aane. Aappoose nefo nama Waaqa waaqaysanno. Tika aapposeti nefo tikase a orra a Yihuta a qinseeta kapa desa kitta.

⁸ Saara takka a tika qinseeta a orra a Yihuta Qarispoosi kidammo ka toolaadi piisa ollin Poqalla amanen. Orra Qorontoosi lekayta ka a Pawloosi haasawannooyye dakaye ka amane ka jaqqame.

⁹ Poqalla ka halkeetteeyye keleshaatoppan Pawloosi' haasawade ka kide, “An fuuran haasawado; umma jaw in kidan.

¹⁰ Katamoosen kara orra lekaytan qapaay, qootan anti ke olli co malla, nama takka nefo ke qara rakkoota in qeedo.”

¹¹ Semmalla Pawloosi ka qaaleta Waaqa samayta kollissaanne para ka paka eyye' jare.

¹² Kaliyoosi ete piita Akayiya qara' ukkumampayta kodde ka shuumameeyye; Yihutaata takka'e oli qapte ka Pawloosi qara xaate ka firtishoonkota turopa isha qeette.

¹³ Ka kiite, “namoose saanta seera olli anni in kinnininni akka orra Waaqa waaqaysado kooni.”

¹⁴ A Pawloosi malseeta oorsatta harmisadeeyye, Kaliyoosi iyihutaata kide, “Ishina Yihutaateeyye, katin ishin dapayta taaki neequmta a kutta'e ishin qara' kodde kiiteeyye duupattaannen kisseetaayshin in dakkaysada.

¹⁵ Ma xoori oton qoota kidadda ka a maxxada isho a seeraayshina malla oli shiishnittaneeye; ishina'ew dikkisada; anti sene qara farata an heenooy.”

¹⁶ Ka asse kide ka firtishoonkotoppa alle ishootta sookshe.

¹⁷ Sitiiyyi ikka piisantiiyyi Soostinoosi saarase a tika qinseeta a orra Yihuta qapen ka firtishoonkota tura qiden. Ete asse koddinittooyye, Kaliyoosi umma we kapa in dikne.

Pawloosi akkima Ansookkiyaapa tiitaawe

¹⁸ Pawloosi ete Qorontoosi kara a kuttaati hellaa akiristaana kapa' jare kammaayye, ishootta kapa xa'e ka Sooriyaapa aane. Prisqilla isho Aqilla nefo isha olliiw caan. Isha qoota Waaqa' xasa daasade malla, an in annin turanne pora takka Kinkiriya kidammo oppa'e matta kooshade.

¹⁹ Ete Efesooni kayeneeyye, isha Prisqilla isho Aqila eyye diishe ka kapa tikase a qinseeta a orra a Yihuta kelopa kulle ka orra Yihutaati haasawanni.

²⁰ Kadii punu akka a kuttaati ishootta kapa' jaro isha naapannaaneeyye isha ishootta in owsanne.

²¹ Ma i'ishootta kide, “Oton i Waaqa faqqateeyye, etaa pilaatin ishin kapopa tiitawa.” Ka Efesooniiyyi markapa oppa fayyade ka tawe.

²² Ka ete Qeesaariya kaye kammaayye, eyye desaaw Yursaalami opa aane ka tika a kiristaanati' nakayta dehayshe ka sekkammaayye Ansookkiyaapa lekkade.

²³ Ka eyye shakkayteeta' jare ka sekkammaayye piita Kelaatiya isho a Firkiya kara porra lekaya oppa titiitaawe ka orra amanno kokkonnayshe.

Wa Appiloosi Efesooni isho Qorontoosi kara kode

²⁴ Yihutitta takka Iskintiriya kara' dalade Appiloosi kidamo ka piita Efesooni opa de'e. Isha nama mataaffa qulqulloota qanqannissa kollade ka haasa fayya saha.

²⁵ Isha nama a qoota santa Poqallaati desa kollade ka hupuran kupattaanne qoota Yesuusi desa fayya torrini ka kollinni. a koddito ma isha pishaan jaqqamittase a Yohaannisi patta upa.

²⁶ Isha ka tikase a qinseeta a orra a Yihuta kela, maxanyumaan haasawatta paayye. Ma xoori Prisqilla isho Aqilla ete isha dakayeneeyye, tikaaysho opa isha halen ka saantase a Waaqa a xatta' qaran qapto'e fayya ishi la'ayshen ka torren.

²⁷ Appiloosi ete Akayiyyaapa anta dikadeeyye, hellaa a kiristaana dikattoose xaadi kokkonnayshen ka akka hellaasso a kiristaana a Akkayiyyaayye ca isha teyyadane'e ishi taptaappeta taafen. Ikka ete eyye kayeeyye, a daassata Waaqan Yesuusi amane a kuttaati qaarqaare.

²⁸ Ka akka Yesuusi Kiristoosi kodde qaaleta a mataaffa qulqullootatin ishootta la'assaanne shiishsha kokkokaatin Yihutaata punni.