Kodampaya 17 - Mataafa Qulqulloota

Horayta a katama Teseloonqe kara xa'e

¹ Pawloosi isho Sillaasi katama Anfipoolisi ka katama Abolooniya oppanne tarpen ka Teseloonqepa aanen. Eyyeyye tikase a qinseeta a orra a Yihuta'e ca.

² Pawloosi ka akka kollumaadi mina tikase a qinseeta kelopa kulle ka olikamma sampata sessa mataaffa qulqulloota oppa lelli ka samayta' la'anni.

³ Ka Kiristoosi akkima rakkoota akkatta ka tootoppa xaana isha faanitto olkela la'assaanne kiini, “Ha Yesuusise an ishina torrininno, ishan Kiristoosi.”

⁴ Yihutaata oppa orra demo ka qaalese teyyade ka Pawloosi isho Sillaasi qudopa oore. Ka akkimose mina'ew Yihutaata a Waaqa Waaqaysannitto oppa a'akata leka isho iskatta lekayta a katamaappa upanaysame lekayta ka qaalese teyyade ka ishootta qudopaaw oore.

⁵ Yihutaata xoori yootanne qapamte ka orra koda tiite ka paata reekinno porraappa ollopa oorisse ka tiyya xa'isse. Ka akka katamaappa horayta xa'o koote ka Pawloosi isho Sillaasi sookissa ka samayta turopa dehassa'e tika Iyyasooni kapa murte.

⁶ Ma xoori ete ishootta dapteeyye, Iyyasooni isho orra amanno takka takka ukkumampaya a katama turopa dehassa'e ishootta titte ka ishin ante, ka nessa kuttan kiini “Sene piita piisa qara horayta qeede, amma arepa de'eneew!

⁷ Iyyasooni ka ishootta teyyade. Ikka kiini, ‘Nuqusa a Yesuusi kidammo a pila'e ca.’ Ka ajaja nuqusase kutta a Roomi toorri.”

⁸ Samayta isho ukkumampayasene a katama ete sede dakayeneeyye, olkelanne Yaaqyaaqen.

⁹ Ka Iyyasooni isho orra a isha quda co waaseta halacciisen ka ishootta diishen.

Pawloosi sho Sillaasi akka Peeriyaapa aanen

¹⁰ Hellaa kiristaana ka halkeetteeyye, akka Pawloosi isho Sillaasi jarjartan Peeriyaapa aanane koden. Ete eeyye kayeneeyye, tikase a qinseeta a orra Yihuta kelopa kullen.

¹¹ Yihutaata a Peeriya kara kitto, a Tesselonqe kara kitto kapaayye qoota qalpeeta fayya qapto malla, xasa kuttanne qaalese teyyatte ka akka qaalese a Pawloosi dukaata koddite qalpeeffatta'e, kuyyaata kuyyaatan mataafa qulqulloota nappapni ka kara qorri.

¹² Semmalla ishootta oppa lekaya ka amanen. Orra a Yihutaata in koddinini oppaayye iskatta a teyantoode lekayta isho diira lekaya ka amanen.

¹³ Ma xoori Yihutaata a Teseloonqe kara kitto, akkima Pawloosi Peeriya kuli kara qaaleta Waaqa torre upnaatte ka eyyepa deete ka falqan tiyya xa'isse.

¹⁴ Sitiiyyi hellaa a kiristaana ka akka Pawloosi irra qara pakateeta kapopa aano koden. Sillaasi isho Timotoosi xoori, eyye Peeriya kara'ew hasen.

¹⁵ Orrase Pawloosi keesse ka Ateenaan isha kaye. Ka ajajase a Pawloosi kiino “Sillaasi isho Timotoosi a jarjartan ana qaqqaapsaden.” Qeeden ka Peeriyaapa tiitawen.

Pawloosi wa katama Ateena kara' kode

¹⁶ Pawloosi a Ateena kara co ka Sillaasi isho Timotoosi asnooyye, akkima katamasene killoowwaan immakaadene akke ka isi karan xata quumade.

¹⁷ Ka semmalla tikase a qinseeta a orra a Yihuta kelaayye Yihutaata ka orra Yihutaata in koddini a Waaqa waaqaysanno isho orra a kuyyaata mina moorappa akkino olli shiishni.

¹⁸ Ooka takkan, Eepikorosewwa isho Istooykowwa kidamma ka isha kapopa de'ena ka isha oli shiishni. Demo ikiini, “Nyaanynyampaytose maana kida faani?” Demo ka kiiniwi, “A qoota Waaqadda haarayati desa haasawanno paha.” Wa malla asse kidene nefo, qoota Pawloosi otootase a fayya a Yesuusi isho a tootoppa xaanaadi torre malla.

¹⁹ Semmalla ikka Pawloosi qeeden ka orra pora takka a Ariyoosfaakoosi kidammo oppopa xora ollopa anno oppopa ishan aanen ka ishi kidene, “Ino a kollissoose haarayoose a kollinnitto maana akkima kodde upnaatta in heennaay,

²⁰ wa haaraya kodde takka takka ino' lele. Wessen maana akkima kodden upnaattan heenna.”

²¹ Orra Ateena kara kalo isho hapta eyye kalo piisa ka asse kide; wa malla asse kidene nefo, wa haaraya kodde haasawatta ka dakkaysatta quda kiseetaaysho tarpinnaan malla.

²² Sitiiyyi Pawloosi ka orrase Ariyoosfaakoosi opa ollopa xore tura qa'ade ka kide, “Ishina orra Ateenaatiiyyi, akkima qinda piisan orra amanteeta kokkonnaanno kodditen in upnaade.

²³ Eten katamaassin oppa tittiitaawno ka wa ishi Waaqaysannittane tooynooyye, pora kalisoota a qara taafen ka kidene ‘Waaqa a opa in upnini'in’ akke. Semmalla amma anti, waaqoose a' ishina a upnin mali Waaqaysannitane desan ishina' lela.

²⁴ Isha piita isho wa piita qara ca piisa uume ka Poqalla moonta isho a piita. Umma tika qulqulloota a harka namatin qupamte kara kallaanni in co.

²⁵ A caatta ka nessa isho wa pila nama pisa' daanno qoota isha kodde malla, wa ishi qajna in caan. Umma qaarqaarsa nama isha parpaccisni in caan.

²⁶ Isha sanynyeeta nama' piisa, nama takka oppaayyeew uume ka akka piita piisa qara kallaado kode. Ka kiseeta a ishootta qapamte isho porra a oppa kallaadane ishootta' mure.

²⁷ Wa malla asse kode nefo, orra akka Poqalla fado ka kara qorattaan isha fado ka isha teyo malla. A kodditoma isha ino takka takka kapa iseki kideetan.

²⁸ ‘Ino ishannen caatta akkanninna ka lellehninna ka kallaanninna.’ Sede nefo akka saarissampayasen oppaayye demo kidene, ‘Ino nefo an hellaadi,’ mina

²⁹ Oton ino hellaadi koddineeyyeew, ‘Waaqa pahana ookuma isho dikatta namatinni warqeeta taaki dakara pirreeta taaki daka oppa kodame'e paha.’ kideeta ka dikatta ino parpaccisni in kitto.

³⁰ Semmalla wa orra sapanna xattaati upna mali kode, Waaqa ituffade ka qaran tarpe; amma xoori orra a piitadaappa kalo piisa akka juppootoppa ooro'e ajaje.

³¹ Ka akka namase a isha' reexade qudan kuyyaata a oppaayye piita piisa qara dukaatan farato qapade; ka namase a reexade tootoppa xa'issaanne, nama piisa sede upnayshe.”

³² Ete qaaleta a kiinitto “Tootoppa xaana” dakayeeyye, demo qara seesen. Demo xoori i'ishi kide, “Oto awta pilaati qootoseti desa ino' lellittooyye in dakayna.”

³³ Sekkammaayye Pawloosi xorase oppa sooke ka alle' aane.

³⁴ Orra demo xoori isha quda kodde ka amane. Orrose amaneppaayye nama takka Diyonaasiyoosi kidammo, a xora a Ariyoosfaakoosi oppa takka kodde ka iskatteeta takka Demaarisi kidammitto isho orra pila kuli ishoottoppa caaw.