Kodampaya 16 - Mataafa Qulqulloota

Timotoosi ka Pawloosi isho Sillaasi oli akken

¹ Pawloosi katama Tarpe isho a Listira opa aane. Listira karaayye nama takka amanno Timotoosi kidammo kala. Aayyaasso Yihutitteeta a kiristaana koddite. Aappaaysho xoori Kirikkitta.

² Timootoosi hellaa a kiristaana a Listira isho a Iqqoniyooni kara ca oppa, a kuttati peepammi.

³ Pawloosi qoota Timotoosi isi quda teyyatta ka anta fade malla, Yihutaata eeyye kitto minanne, akka dawra qara murado kode. Wa malla asse kode nefo, aappa opa Timootoosi akka Yihutitta in koddinin qoota upan malla ishootta minan asse kode.

⁴ Pawloosi isho Sillaasi oto katamaddaappan tarpinaaneeyye, tanpeetase a erkamampaya isho a qimaya Yursaalami murene orra amanno upnaanni ka akka kodaan akkishane ishootta dehaammi.

⁵ Tikka a kiristaana ka amanteetan japaden; lekumaasso ka kuyyaata mina'e, padaawamaanneew anni.

Pawloosi akka kelashaatoppan Meqedooniyaapa anta halaame

⁶ Pawloosi isho Sillaasi akka piita Issiya kara qaalese in torrinini'i, qoota Hapura Qulqulloota ishootta dawre malla, piita Firkiya isho Kelaatiya oppanne tarpen.

⁷ Ka ete xeela Miisiya kayeneeyye, Pittaaniyaapa anta dikaden. Ma xoori, Hapura Yesuusi akka eepa aanane'e, ishootta in faqqanne.

⁸ Semmalla ikka, piita Miisiya oppan tarpen ka katama Tiro'ada opa lekkaden.

⁹ Eyyeeyye, halkeetteeyye Pawloosi ka keleshaatappan, nama takka a piita Meqedooniya a qa'ade ka isha naappanno ka kiino, “Meqedooniyaapa tuulle ka ino qaarqaare” akke.

¹⁰ Ete Pawloosi keleshaatase akke kammaayye, anka eennow Meqedooniyapa anta faane; sede nefo akkan orra Meqedooniyaati otootase a fayya kollinno'e akka Poqalla ino hale qootan upnaanne malla.

Lidiya akka Kiristoosi amante

¹¹ Anka Tiro'adaayye markapa oppopa fayyanne ka qajeelle ka Samotiraaqepa anne. Ka parraytaadiiyyi, katama Naabule opa anne.

¹² Ka eyye xaaneew ka Filippisiyuusi kayne. Filippisiyuusi katama kutta a Meqedooniya kara ca; orra Roomi ka oppa kallaanni ka ishootta piddini. Anka katamoosen kara eta lamayta pirre.

¹³ Ka kuyyaata sampatatiiyyi, porase oppopa qinseeta ollopa annaan katamaayye laka tula cooyye, kirra kapopa anne. Ka eyye kutiine ka iskatta a ollopa de'e qaaleta a Waaqa kollinne.

¹⁴ Iskattase ino dakkaysanno oppa takka Liidiya kidammitto ka katama Tiyatirooniiti deete ca; ka ohaata a tiima nakanni; isheetta iskatteeta a Waaqa waaqaysannitto. Qoota Poqalla ishi karittaadi pane malla ikka qaaleta a Pawloosi haasawanno qanqannisa dakkaysanni.

¹⁵ Ete ishetta isho orra a tikaadippa co piisa jaqqamen kammaayye, oori ikiite, “Akkan Poqalla amanno oton idukaysatteneeyye, xooya ka tikiyyo' tawa.” Ka a kuttaati ino naappatte.

Pawloosi isho Sillaasi akka katama Filippisiyuusi kara hidamen

¹⁶ Kuyyata takkaayye, eten pora qinseeta opa anninnooyye, orxayteeta takka a enenta, a hapura neeqa a wa itturopa kodda suuman haasawaccissno isheetta qape, poroppa ino mina de'e. Enense suumaadinni orra a kela kalto tookta a kutta'e kalinni.

¹⁷ Ka Pawloosi isho ino kamma deeni ka nessa kuttan kiini, “Orrose orxaya a Waaqase we piisa qara qapooti; ishootta saanta dina'e ishin kollishan!”

¹⁸ Ka kuyyawwa lekaya oppa'ew o'ori ka asseew kiini. Pawloosi xoori, iquumade ka desa tiitawe ka hapurase neeqa kide, “Akka isheetta kara sookto'e, maxxa Yesuusi Kiristoosinnin ke ajajni!” Hapurase neeqa ka eennow sooke.

¹⁹ Orrase a kela kalto oori, kippeetase xaaysho a kela tookta akkannaane ete akka ishootta qara muramte akkeneeyye, Pawloosi isho Sillaase qapen ka ishootta titen ka mooraappopa ishootta sookshen ka ukkumampaya turopa ishootta dehayshen.

²⁰ Ka ukkumampaya Roomi turopa ishootta qeeden ka kidene, “Orrose are co orra a Yihuta ka katamaanno oli kelan dapni;

²¹ ka taanteta a ino orra Roomiti teyyatta ka kodeeta ino in faqqatammin kollinni.”

²² Samayta piisa ka takka oli qape ka ishootta qara' xa'e. ukkumampayasene ka, Pawloosi isho Sillaasi quda mehadda sookshan ka akka uleetan qidamane ajajen.

²³ Ka ete a kuttati qidamen kammaayye, tika hida kelopa ishootta kalshen; tooytampaytase a tika hida ka akka qanqannissa ishootta tooyto ajajame.

²⁴ Tooytampaytase ka ete ajajoose teyyade kammaayye tika hidatiiyyi, kaata a karan ca karopa ishootta kullishe. Ka otanta kurpanna lakki kara loqqaasso qannishe ka hide.

²⁵ Ete olli qootta halkeetta mina kittooyye, Pawloosi isho Sillaasi qinseeta isho masmuuretanne Waaqa kalataysanni. Orra a hidame a pila ka ishootta dakkaysanni.

²⁶ A opani isi qara in upnin maliiyyi haka kiritta tika hida xereeno'e piita ka harmo lellehete; xarrada piisa ka takka panamen. Sansalaata a nama hidame piisa quda co ka furame.

²⁷ Tooytampaytase, ete mukitta oppa impase ka akka xarrada a tika hida piisa panamen akkeeyye, a orrase hidame tawe ishi pahanaatte ka ikka isi ikassa koraateta yukade.

²⁸ Pawloosi xoori nessa kuttanne kide, “Piisan in are kinnaay, isi qara wa neeqa in kodan.”

²⁹ Sitiiyyi tooytampaytase ka akka ipsa an ishi de'ane kode ka keere ka kaatasene karopa kulle ka xarri ka loqqa a Pawloosi isho a Sillaasi kela pi'e ka fuula piitan kaye.

³⁰ Ka lakopa ishootta sookshe ka ishootta kide, “Poqalladdaayyo, akkan dino'e, maana koda ana parpaaccisni?”

³¹ Ishootta ka ishi kidene, “Poqalla Yesuusi amane iddintaay. Toolaayti kuli ka dinaay.”

³² Ka isha isho orra tikaadi kara co piisa qaaleta Poqalla torren.

³³ Tooytampaytase a tika hida ka saatese oppaayyeew ishootta qeede ka faykaasso qara ishootta jaqe; isha isho toolaadi piisa ka ennow jaqqamen.

³⁴ Ka sekkammaayye Pawloosi isho Sillaasi tikaadipa qeede ka damta ishootta dehayshe. Ka qoota Waaqa amane malla, toolaadi piisa olli xasoode.

³⁵ Ete pariteeyye, ukkumampayasene foolisowwa erken ka kidene, “Orroose a furamo.”

³⁶ Tooytampaytase a tika hida ka Pawloosi lele ka kide, “Akka furmattane'e ukkumampayasene, nama erkeney, sooka ka nakaytan kala.”

³⁷ Pawloosi xoori i'orshe ka kide, “Ino an orra Roomi koddineeyye, Firteeta mali mooraappa ino qiden ka tika hida karopa ino kalshen. Ka amma akkan dekandekatti tika hida kela sookno faani? In koddito! a mattaayshoti de'en ka ino sookshen!”

³⁸ Foolisowwasene ka ukkumampayaseneti sede lelen. Ukkumampayasene akkima Pawloosi isho Sillaasi orra Roomi kodden ete upnaadeneeyye, ifuuren.

³⁹ Ka de'en ka ishootta qara diissata kaassaden ka tika hida kela ishootta sookshen; ka akka alle katamasene oppa aanane'e ishootta naappaden.

⁴⁰ Pawloosi isho Sillaasi ka tika hida kara sooken ka tika Lidiya opa aanen. Ka eyye hellaa a kiristaana akken ka ishootta xasa oorshen ka katamaasene oppa alle aanen.