Kodampaya 15 - Mataafa Qulqulloota

Xora Yursaalami

¹ Orra demo ka Yihutaayye dela Ansookkiyaapa aane ka orra amanno kollissa paayye ka kiini, “Seerase Muuse daasame qara'e haka dawra qara murattan maliiyyi dina a ettanissan.”

² Qootoseti desa, Pawloosi isho Parnapaasi ka orrose oli shiishen ka oli qara nyaanynyen. Sekkammaayye, Pawloosi isho Parnapaasi akka hellaasso a kiristaana lamaya a Ansookkiya kara ca ollin Yursaalamipa aanan ka rakkoose erkamampaya isho qimoota dehayyshane opan ka piisaden.

³ Semmalla ishootta ka tika kiristaanatin erkamen ka aanen. Ka ete Finqe ka Samaariya oppan tarpinaaneeyye akkima orra Yihutaata in koddinin Waaqopa tiitaawe torren. Otootose ka orra kiristaana piisa xasasse.

⁴ Ete Yursaalami kayeneeyye, tika kiristaana ka erkamampaya isho qimoota ka ishootta teyyatte. Isaasene erkame ka akka Waaqa ishootta olli caade ka wa kode piisa ishootta torren.

⁵ Ma xoori, orra Feresata oppa amane takka takka xa'e ka kide, “Orra a Yihutaata in koddinin akka dawra qara murado ka seera Muuse tooytaado koda parpaaccisni.”

⁶ Erkamampaya isho qimoota ka rakkoose oppa qoreeta ollopa de'en.

⁷ Ete a kuttati oli shiishen kammaayye, Peetiroosi ka xa'e ka ishootta kide, “Hellaanno a kiristaanati, orra a Yihutaata in koddini akka ana qudan qaalese a otoota fayya dakayo ka amano'e se turanne Waaqa akkima ishin oppa ana ree'ade i'uptan.

⁸ Waaqase karitta nama upo, akkima ino Hapura Qulqulloota daashe mina'ew ishootta daashaanne, akkima ino teyyade mina akka ishootta teyyade akkishe.

⁹ Qoota karittaysho amanteetan qulqullayshe malla, ino isho ishootta, olikela in purinne.

¹⁰ Ka kuli qamparase an aappadaanno isho ino haadeta malaalle, maana malla orra amanno qara fe'etan Waaqa ekkaysannittan?

¹¹ Ino akkiman a xaaysho mina'ew, daassatase a Poqalla yesuusin dinninno in amanninnaay.”

¹² Sitiiyyi xorase ka jaw kide, ka a Parnapaasi isho Pawloosi kodaddaasene orra qawwanna isho daxxowwa sene a Waaqa ishootta qudan orra a Yihutaata in koddini oppa kode a torinaaneyye dakkaysaden ka oppa qawwaawen.

¹³ Ete ishootta haasawaden ka dikkishen kammaayye, Yayqoopi ka oorshe ka kide, “Hellaanno a kiristaanati! intoonno ana dakkaysadaay!

¹⁴ Waaqa akkima orra a Yihutaata in koddinini oppaayye samayta a maxxaadin halaamo teyyatta fade akkima akkishe Simooni ila'ayshe ka torre.

¹⁵ Qaalese a xuumampaya nefo, sede qara'e kalli. Isheetta nefo itaafamte ka kiini,

¹⁶ ‘Se kammaayye in oora ka tikase a Taawiti qitqitte qupa, ka isase qitqitte ollopa qapa ka qaatisha.

¹⁷ Waan malla asse koda nefo, orra ata hase piisa isho orrase Yihutaata in koddinin maxxiyyon halaame piisa akka ana Waaqa fado malla.

¹⁸ A xattati paayyatte a se piisa upnayshe ana Waaqa asse kiini.’

¹⁹ semalla xayyo desa orrose Yihutaata in koddinin Waaqopa tiitaawno, rakkacciissa ino faani in kitto.

²⁰ Se kapaayye in ishootta taafna ka kiina, ‘Damta a killana kalisoota kalshen ikka nyalte, in daman; sharmuutuma kapa sekaada. Ka horeeta a in qalammin diika ka kara in tuqmannin a siibsamte ka toote, so'adi in daman ka diika nefo in ikan.’

²¹ Qoota Muuse desa a xattaati paayyatte kuyyaata sampataatiiyi tikkasene a orra Yihuta a qinseeta kela, seeraadi inappapammi, qaaletaadi ka katamaddaappa torraammiiy.”

Wa xoorase piisade isho taptaappeta orra amanno taafamte

²² Sekkammaayye erkamampaya ka qimoota isho orra a tika kiristaana piisa ollinni kodden ka xorase oppaayye orra lamayta reexen; ka Pawloosi isho Parnapaasi olliiyyi Ansookkiyaapa erkeeta piisaden. Ka semmalla Yihutaase Parsaapaasi kidammo isho Sillaasi isaasene hellaa kiristaana oppa saaruman peepamma reexxen.

²³ Ka taptaappetase taafamte ishootta qara erken. Taptaappese nefo ikiini, “Ino hellaassina a kiristaana, a erkamampaya isho qimoota koddeetiiyyi, ishina orra a Yihutaata in koddinini oppa hellaanno a kiristaana kodde, ka Ansookkiya ka Sooriya isho Kiliqiya kara kalaati'i, nakaytan erkininna.

²⁴ Ino oppaayye orra takka takka an ino ishootta an ajajnin mali, akka ishin oppopa de'en ka qaaleta ishina lelenenne, ishin payyahashen ka akka kamma daptane koden in dakayne.

²⁵ Semmalla eten ollopa anne kammaayye orran ishina erkinon reexne ka hellaa sene xanno a kiristaana jaalatame, Parnapaasi isho Pawloosi olliiyyi ishina erkeeta olli' kalle.

²⁶ Parnapaasi isho Pawloosi Poqalla Yesuusi Kiristoosi'i isi daashen.

²⁷ Waan ishina' taafne akka afa kulin qara' ishina lelane'e Yihuta isho Sillaasen erkine.

²⁸ Wossen arepa xata ca ka parpaaccisna mali akkan haadeta ulsa a pila ishin qara an feenini'i, Hapura Qulqulloota isho ino'e, a paxaara'e pahanaatte.

²⁹ Damta a killana kalisoota kalshen ikka nyalte in daman; umma so'a a horeeta a siibsamte ka toote in daman, umma diika in ikan. Ka sharmuutuma kapa sekaada. Oto sene piisa kapa issi tooytinittaneeyye, fayya koonittan. Nakaytan qa'ina.”

³⁰ Orrase erkammo ka xa'e ka Ansookkiyaapa aane ka orra amanno ollopa hale ka taptaappetase ishootta' daashe.

³¹ Orrase amanno ete taptaappese nappapeeyye erkanaasene xasa orra oorinnaatinni a kuttaati xasooden.

³² Yihuta isho Sillaasi, qoota xuumampaya kodden malla, hellaasene a kiristaanati a kuttati xasa oorshen ka ishootta kokkonnayshen.

³³ Yihuta isho Sillaase ete eta shakkaya eeyye jaren kammaayye, hellaa a kiristaana olqara harka qeeden ka a ishootta erke kapopa tiitawen. [

³⁴ Sillaasi xoori eeyye haseeta fade.]

³⁵ Pawloosi isho Parnapaasi xoori orra amanno a pila lekayta ollini qaalese a Poqalla kollissa ka torreetanne Ansookkiya kara jaren.

Akka Pawloosi isho Parnapaasi oli dapen

³⁶ Eta shkkayyta kammaayye Pawloosi i Parnaapaasi kide, “Xooye tiitaawna ka hellaa sene xanno a kiristaana katamaddasene an turan oppa qaaleta Poqalla torrine pisa oppa ca tooyyina ka wa oppa caane upnaanna.”

³⁷ Parnapaasi ka akka Yohannisise Marqoosi kidammo ishootta olli aano fade.

³⁸ Pawloosi xoori, namoose akka ishootta olli aano in heennaanne. Wa malla in heennannini nefo, qoota isha Binfiliya kara ishootta diishe ka kodaappa ishootta kamma tiitawe malla.

³⁹ Se minan Pawloosi isho Parnapaasi otantoppa'e, shiishsha kutta ka xa'en, ikka oli kela pasen. Semmalla Parnapaasi ka Marqoosi isi quda qeede ka markapan Qobbiroosipa aane.

⁴⁰ Pawloosi xoori Sillaasi reexade ka ete hellaa a kiristaana Pawloosi daassata Poqallaati atara daashen kammaayye aane.

⁴¹ Ka tikka a kiristaana kokkonnassaanne Sooriya isho Kiliqiya karan tarpe.