Kodampaya 14 - Mataafa Qulqulloota

Pawloosi isho Parnapaasi wa a katama Iqqoniyooni kara kodene

¹ Pawloosi isho Parnapaasi ollinni Iqooniyooni kara tikase a qinseeta a orra Yihuta kelopa kullen. Ka eyyeeyye haka Yihutaata kuttayteeta isho orra Yihutaata in koddinini oppaayye orra a akata kutta kollishen malla a akata leka ka amanen.

² Yihutaata a in amannin xoori, orra a Yihutaata in koddininii nyarisse ka akka hella kiristaana qara needduma an xa'ane koote.

³ Semmalla Pawloosi isho Parnapaasi qoota Poqallaati desa maxanyumaan haasawattanne, a kuttati eeyye jaren. Poqalla ka akka wa orra qawwanna isho daxxowwa ishootta qudan koddane'e, hupna ukkumeeta ishootta daassatanne, qaaletaadi a daassata Waaqa akka dukaata koddite upnaanni.

⁴ Orra katama kara kalo xoori, lakki'i qite; paka takka ka Yihutaata quda kodde; paka takka ka erkamampaya quda kodde.

⁵ Orra a Yihutaata in koddinin isho Yihutaata ka saarrasso ollinni, akka Pawloosi isho Parnapaasi rakkacciissan ka dakaan ishootta dakkeeta faden;

⁶ Pawloosi isho Parnapaasi ete sede upnaadeneeyye, katamaddasene a Liqooniya Listira isho Tarpe kidamma isho piitase ishootta akapan desa kitto oppopa qahen.

⁷ Ka eyye otoota fayya torren.

Pawloosi isho Parnapaasi wa a katama Listira isho a Tarpe kara kodene

⁸ Listira karaayye, nama takka a loqta tupa toonnaawte ca. Namoose qoota a dalade paayyatte toonnayta kodde malla, a pari loqqaadin in anne kan in upo.

⁹ namoose ete Pawloosi haasawannoyye, ikute'e ka dakkaysanni. Pawloosi ka isha quda ilda kode ka akka amanteeta a isha dinissa ettanisso qapo akke.

¹⁰ Ka nessa kuttan haasawade ka kide, “Jibi kide ka loqqaattin qa'ado!” Namase ka ela shore ka anta paayye.

¹¹ Orrase ete wa Pawloosi kode akkeeyye, nessa kuttishen ka afa Liqqoniyaatin haasawaden ka kidene, “Ha Waaqadda nama pahanaade ka ino oppopa lekkade!”

¹² Ka Parnapaasi kidene “Diyya;” Ka Pawloosi qoota a harmo haasawattanpayta kodde malla, ishi “Hermeeni” kiden.

¹³ Qeesitta a tikase a qulqulloota a Diya a katamaayye laka tula kittooti ka xormada isho pisa a xalaala mina maramen xarrase a katama oppopan de'e, ka samayta isi quda qeedeeta ka Pawloosi isho Parnapaasi kalisoota kalissa fade.”

¹⁴ Erkamampayasene Pawloosi isho Parnapaasi xoori ete sede dakayeneeyye, nyarrahatanne mehaddaasso isi quda kakkaa'en ka samaytopa hiren ka nessa kuttishen ka kidene,

¹⁵ “Ishina orraayti, maana'e sede koonittan? Ha ino xaayshin mina'ewwen an orra. Ha ino waan malla arepa deene akka ishina wessene a paata patta kapaayye sekaattan ka caattampaytase a Waaqa moonta ka piita isho pakateeta ka wa kara ca piisa uumepa tiitaawtane'en otoota fayya ishina torreeta malla.

¹⁶ Sapanna tarpeetiiyyi Waaqa samayta piita piisa akka saantaaysho qara kallaadane'e ishootta tupadesa diishe.

¹⁷ A koddito ma, isha xoori shorokitta Waaqa a atta paho akkima kodde koda paxaara kodeetanne moonte xata ishina roopa roopissaanne ka kiseewwa paxaara ika lekayta ishina daassatane ka wa damtane tupa xata ishina daassatanne senen paxaarumtaadi akkissaanne qootaadi desa maakkuma in qaatinne.”

¹⁸ Erkamampaya kadi punu a asse kitto hasawadeneeyye, akka kalisoose ishootta in kalinnini rakkoota a kuttatinni samayta isi qara dawren.

¹⁹ Yihutaata xoori Ansookkiya isho Iqqoniyooniiyyi eyyepa dete ka samayta nyarisse ka akka Pawloosi dakaan dakkane koote. Ikka a to'e ishootta pahanaade. Ikka alle titen ka katamaappa sookshen.

²⁰ Ma xoori, ete orra amanno de'e ka isha kapa qa'addeyye, ixa'e ka katama karopa kulle ka parraytaadiiyyi, Parnapaasi olliiyyi Tarpe opa aanen.

Pawloosi isho Parnaapase akka katamasene a Ansookkiya piita Sooriya kara ca opa tiitaawen

²¹ Pawloosi isho Parnapaasi, ete Tarpe kara otootase a fayya kollishen ka orra lekayta amansiisen kammaayye, Listira ka Iqqoniyooni oppanne tarpen ka katamasene Ansookkiya piita Pisdiya kara ca opa aanen.

²² Ka piitaddoosen piisa oppaayye orra amanno akka amanteetayshotin japaado kokkonnassa ka dehaamanne, Ishootta kollishen ka kidene, “Mankisteeta Waaqa opa kalta'e rakkoota a kutta akkatta ino faani.”

²³ Ka tikka a kiristaana kara ishootta qimaya shuumen ka ete damta musaden ka ishootta Waaqa qinsaden kammaayye poqallasene a amaneneti ishootta atara' daashen.

²⁴ Ka Pisdiya opan tarpen ka Binfiliyaapa aanen.

²⁵ Ka ete katama Berke kara qaaleta Waaqa kollishen kammaayye, katama a Taaliya opa aanen.

²⁶ Ka sekkammaayye kodoose a kodene'e katamasene a Ansookkiya a oppaayye daassata Waaqati atara' daasamen, opa markapan aanen.

²⁷ Ka ete eyye kayeneeyye, orra amanno ollopa halen ka wa a Waaqa ishootta olli caade ka kode ka akka orra Yihutaata in koddini amano'e akka ishootta xarra pane ishootta torren.

²⁸ Ka eyye'e, orra amanno olli eta kuttayata jaren.