Kodampaya 13 - Mataafa Qulqulloota

Parnapaasi isho Sawuli akka Hapura Qulqullootatin reexamen ka kollissa erkamen

¹ Tika kiristaana a Ansookkiya kara kitto karaayye xuumampaya ka orra a qaaleta Waaqa torrino isho a kollinno ca. Ishootta nefo Parnaapaasi ka Simoonise Ipoori kidammo. Ka Qereenittase Lukiyoosi ka Minahese, Herodiisise mankisteeta qudaayye paka afratta ukkummo olli qohame isho Sawuli.

² Ishootta a Poqalla waaqaysannaan ka damta musannaaneeyye, Hapura Qulqulloota ka kide, “Kodaan anti ishootta reexade'e, Parnapaasi isho Sawuli xawwa ana reexa.”

³ Ishootta ka ete damta musaden ka qinsaden ka a harkaasso ishootta qara' qapaden kammaayye ishootta xaashen.

Parnapaasi isho Sawuli akkima Qobbiroosipa aanen

⁴ Parnapaasi isho Sawuli ka Hapura Qulqullootatin erkamen ka Selewqiyapa aanen; ka eyye desa markapan Qobbiroosipa aanen.

⁵ Ka ete katama Salamiisi kayeneeyye, tikkasene a qinseeta a orra Yihuta karaayye qaaleta Waaqa kollishen. Yohaannisise Maariqoosi kidammo ka ishootta olliiw ca ka ishootta qaarqaarri.

⁶ Ete piitase a Qobbiroosi otanta pakateeta kara kitto pisa oppan tarpen ka Baafu kayeneeyye, So'ayta takka a Yihuta Paariyesuusi kidammo akken. Isha nefo xuumampayta darta.

⁷ Ka nama takka upna qapo a piita mukinno ka Serkiyoosi Pawloosi kidammo kapa kala. Namase piita mukinno ka Parnapaasi isho Sawuli halacciise; ka qaaleta Waaqa dakaya fade.

⁸ Ma xoori so'aytase, Paariyesuusi a afa Kirikkitin maxxaadi Elmaasi kidammo, akka mukissampaytase Waaqa in amannini fade ka Parnapaasi isho Sawuli dawre.

⁹ Saawlise Pawloosi kidammo xoori, Hapura Qulqullootatin immakaade ka namase quda ilda kode ka isha kide,

¹⁰ “Atti inna taaploosi paarakaala a dukaata piisa! A sassapa isho neequmtan immakaade, saantase a Poqalla jib kiite torkookkassa kamma a'oorto?

¹¹ Tin amma harka Poqalla'e ke daysha! ilda ka ke qara' patan, umma etaa desa la'ayta piirtota a akkito.” Eennow qayanqayoota isho tukkanta ka ildaa qara ishi dekte. Ikka nama harka isha tupa qapo ka ishin aano isi kapan desa faddatta paayye.

¹² Mukissampaytase ka ete wa kodde akkeeyye amane ka qoota Poqallaati desa kollissase a dakaye opa qawwaawe.

Parnapaasi isho Pawloosi piita Ansookkiya opa aanen

¹³ Sekkammaayye Pawloosi isho orra a isha quda co markapoppe fayyaden ka Baafu desa katamasene a Berke Binfiliya kara ca opa aanen. Yohaannisise Maariqoosi kidammo xoori eyye'e ishootta diishe ka Yursaalamipa tiitaawe.

¹⁴ Ishootta ka Perke xa'en ka katamasene a Ansookkiya Bisdiya kara ca opa aanen ka kuyyaata a sampata Yihutaatiiyyi tikase a qinseeta a orra Yihuta kelopa kullen ka eeyye qa'en.

¹⁵ Ete mataaffa seera isho a xuumampaya nappapamen kammaayye, saarrasene a tika qinseeta ka opa Pawloosi kapopa nama erken ka kidene, “Hellaanno, otoon qaaleta dehamta a orra xasa oorisso qaptaneeyye, haasawada.”

¹⁶ Pawloosi ka xa'e ka harkan samayta akkishe ka kide, “Orra Isira'eeliti ka ishina a Yihutaata in koddinini ka Waaqa fuurraatiiyyi, dakkaysada!

¹⁷ Waaqase samaytose a Isira'eeli, aappadaanno a xatta reexade ka a piita Kipsiti caaneyyeew lekna a kutta ishootta kode ka hupnase xaadi kuttan piitoose kara ishootta sookshe,

¹⁸ ka a para kunda afur mina kitto'e koommaytoppa ishootta kela duupade.

¹⁹ ka sekkammaayye piita Kene'aani karaayye mankistewwa tappa alle pashshe ka piitaaysho ishootta lehaanda daashe,

²⁰ Sede pisa para dippa afuri kunda ken mina kitto kara'e asse koddite. Ikka sekkammaayye haka kiseetase a xuumampaytase a Saamueeli kaynitto kara'e taanynyada ishootta daashe.

²¹ “Sekkammaayye ikka akka nuqusa ishootta daasho'e Waaqa qinsaden. Waaqa ka kafa Piniyaami oppaayye Sa'oli inna Qiisi haka para kunda afuriti ishootta qara nuqusumshe.

²² Ka ete Sa'oli shaare kammaayyeew, Taawwiti ishootta qara nuqusumsheew, Waaqa ete Taawwiti maakkumeeyye ikide, ‘Nama a karittaayyoppa sale ka wa an heena kodo, Taawwiti inna Issayin akkade.’

²³ Sanynyeeta a namooseti oppaayye Waaqa akka kippeeta a daashe qara'e, Yesuusi dinshampaytase a Isira'eeli ishootta' xaashe.

²⁴ A Yesuusi in deenin turanne, Yohaannisi juppootoppa ooreeta ka jaqqatta orra Isira'eeli piisa torre.

²⁵ Yohaannisi ete kodaadi dikkinnooyye ikiini, ‘Ata anti aynon ishina pahanaade? Annt an Kiristoosin ma, anti nama an isha kelaayye teeppa xopaadi nefo fureeta an kaynini, ana kamma desa de'a.’

²⁶ “Ishina a sanynyeeta Aprihaami oppaayye dalade hellaannooyye ka ishin a Yihutaata in koddinini a Waaqa fuurraatiiyyi, ha qaalese a dina ino'e erkamte.

²⁷ Orra a Yursaalami kara kalo isho saarraasso akka Yesuusi dinshampayta kodde in upnaanne, qoota mataaffasene a xuumampaya, sampata mina nappapamma matte in qapnin malla; ete Yesuusi qara' farannaaneeyye, akka xuumase dikkado'e koden.

²⁸ Kadi punu wa toota qaran isha kaya isha qara in teyniniiyyi, akka ishootta isha ishsho'e Pilatoosi naappaden.

²⁹ Ka ete wa qootaadi desa taafame piisa isha qara koden kammaayye, masqala qara isha lekkishen ka hawlen.

³⁰ Waaqa xoori tootoppa isha xaashe.

³¹ Isha ka isasene Kelilaayye desa Yursalami opa isha olli de'eti'i, kuyyawwa lekaya akkaade. Ishootta amma samayta tura maakiyyaadi.

³² Ino nefo ka otootase a fayya a Waaqa, aappadaanno kippeeta daashe, ishina torrininna.

³³ Waaqa Yesuusi tootoppa xa'issaanne, kippeese ino hellaassoti dikkishe. Sede nefo akka masmuureta lammatta oppa taafamte ka kiinitto ‘atti ainnaayyo anti awwen ke xaaye mina.

³⁴ Akka Waaqa tootoppa isha xaashe ikka lammattaen toonini'i Waaqa ihaasawade ka ikide, kippeetase qulqullaawte ka amanamte an Taawwiti daashen ishina daasha.

³⁵ “Masmuureta pila oppa ikiiniw, ‘innasene xaayti qulqullaawe akka japo a kooto.’

³⁶ Ma xoori Taawwiti xeltaadippaayye, ete kodaadi akka heenna Waaqa qara kode ka dikkishe kammaayye; ito'e ka aappadaasso oppa hawlame; ka japjape.

³⁷ Ma isase a Waaqa tootoppa isha xaashe in japjapne.

³⁸ Semmalla hellaanno a kiristaanatiiyyi, akka haseenta juppoota Yesuusin akkannaan akka ishina torramte upnaada.

³⁹ nama isha amano piisa, juppootase a kelaayye, seerase a Muuse qudan daasame isha hanqeellassa ettanininnkinnin piisa kelaayye, hanqeellaawa.

⁴⁰ Semmalla isase xuumampaya qudan asse kidammte akka ishin qara'en kaynini'i tooytaada.

⁴¹ Kadi punu nama heenti ishina la'anna ka lellaayye, koda a ishina a amannini'in sapanaayshin oppa kodaay; ishina seesampayaaye tooya! Ka oppa qawwaawa! ka pirama!”

⁴² Pawloosi isho Parnapaasi ete tikase a qinseeta a orra Yihuta kela sooknaaneeyye, akka sampata deenooyye wasene'ew ishootta' lelane'e orrase ishootta naappade.

⁴³ Ete tikase a qinseeta orra Yihuta kela orra sookeeyye, orra Yihuta isho orra amanteeta a Yihutaata teyyade ka Waaqa Waaqaysanno lekayta Pawloosi isho Parnapaasi kamma aane; Pawloosi isho Parnaapasi ka orrase kollishen. Ka akka daassata Waaqan japadan ka kallaadane'e ishootta dehaamen.

⁴⁴ Sampata a kamma deenooyye, orrase katamaappa kalo oppaayye kara kutta ka qaaleta Waaqa dakkaysatta ollopa de'e.

⁴⁵ Yihutaata ete lekuma a samaytaseti akkiteeyye, yootanne immakaatte ka haasa Pawloosi shiishni ka isha onni.

⁴⁶ Pawloosi isho Parnapaasi xoori, maxanyumaanne haasawaden; ka kidene, “qaaleta Waaqa paayyota'e ishina lelama parpaaccisni, ma oto ishina kiitene, ‘An teyyanno ka akkima caatta parapara ishin parpaaccisni in kinnin isi qara' farattaneeyye’ Ino in tiitaawna ka orra a Yihutaata in koddinin oppopa anna.

⁴⁷ Waan malla, sede koona nefo, Poqalla ino ajaje ka kide, ‘Akka orra piita piisa qaran dina kayto'en orra Yihutaata in koddinini'i, la'ayta ke kode ka ke shuume.’” malla.

⁴⁸ Orra a Yihutaata in koddinin ete sede dakayeeyye, ixasoode. Ka qaaleta Poqalla ulfeesse. Acaatta paraparati reexxame piisa ka amanen.

⁴⁹ Qaaleta Poqalla ka piitose pisa oppa paldaatte.

⁵⁰ Saarra Yihutaata xoori, teyantoolaya iskatta a amanteeta Yihutaatatin kallaanna isho katama appa orra a kukutta nyarrahasiisen ka akka Pawloosi isho Parnapaasi qara pora daanama xa'o koden. Ka piitaaysho oppa alle ishootta sookshen.

⁵¹ Pawloosi isho Parnapaasi ka loqqaasso quda kuyyaalayta dawdawaden ka Iqqoniyoonipa alle aanen.

⁵² Orra amanno ka xasootta isho Hapura Qulqullootatin immakaade.