Kodampaya 12 - Mataafa Qulqulloota

Pora daannaamitta a kuttae kiristaana qara' kaye

¹ Sapanoosetiiyyi nuqusa takka Herodisi kidammo ka orra tika kiristaana oppaayye demo pora daanitta paayye.

² Ka Yayqoopi inna opa Yohaannisi koraatetan ishshacciise.

³ Ka akkima sede Yihutaata xasasse akke ka, Peetiroosi kuli qapsiiseew. Sede nefo kuyyawwasene a Yihutaata xayso nessuma a laaqqota ulfeessinittaati koddite.

⁴ Ka ete Peetiroosi qapsiise kammaayye, tika hida kelopa kalshe ka xayso nessuma a qaran tarpeeta a Yihuta kammaayye haka samayta turopa isha dehanno kara'e, akka afur afur koddan ka isha tooytane'e, foolisoota kita afuri isha daashe.

⁵ Semmalla Peetiroosi Iqapame ka tika hida kara tooytammi. Ma xoori tika kiristaana qootaadi desa a kuttaati Waaqopa qinsanni.

Erkampattoota Waaqa akka Peetiroosi tika hida kara sookisse

⁶ Parraytaadiiyyi Herodisi samayta turopa Peetiroosi dehassa dikade, halkeesse oppaayye Petiroosi ka sansalaata lakkin hidame ka foolisoota lakkiiyyi otanta kara muke. Foolisowwa a taakane ka xarra tikase a hida tooytini.

⁷ Sitiiyyi erkampattoota Poqalla ka akkaatte, tikase a hida kela la'ayta ka la'aye. Erkampattootase ka Peetiroosi qinda kela da'isse ka isha impasisse ka isha kiite, “Irraqara xa'e!” Sansalaataddasene ka harka quda ishi seehen.

⁸ Erkampattoose ka ishi kiiteewwe, “Mehaddaatti kallsado ka xopaatti xaayyado!” Peetiroosi ka akka ajajame qara' kode; erakampattootase ka ishi kiiteewwe “Ohaataayti uwwisado ka ana kamma xooye!”

⁹ Petiroose ka sooke ka kamma aane. Ikka a keleshaata tooyno ishi pahanaatte umma, wessen a erkampattoota koote piisa, dukaata isha in pahanaanne.

¹⁰ Ikka tooytampaya a paayyota ka alammatta tarpen ka xarrase a sipla a katamaapa orran anno oppa co kayen. Ikka a nama quda in kaynin mali asseew ishootta paname. Ikka karan sooken ka pora takka a maqaysuma tarpen; a Peetiroosi isiqara in upnin mali erkampattoota ka isha kapa tawte.

¹¹ Peetiroosi ka issi'upnaade ka kide, “Akkima Poqalla erkampattootaadi erke, ikka harka Herodisi isho wa samayta Yihuta asanna piisa kela anan pahe, amma in dukaatan in upnaade.”

¹² Ka ete sede qalpeeffade kammaayye tikase, a Maariyaami a orra lekayta karopa ollopa aane ka Waaqa qinsanno opa aane. Maariyaamise nefo ayya opa Yohaannisise Marqoosi kidammooti.

¹³ Peetiroosi ete eyye kaye ka xarrase a laka tula kookoosheeyye, orxayteeta takka Rooda kidammitto, ayno akka kodde upanaatta xarrase turopa aane.

¹⁴ Ka ete akka nessa Peetiroosi kodde upatteeyye, xasoottaadi a koope qaran xaate'e a xarrase in pannin mali alle tiitaawte ka keerte ka kiite, “Ha Peetiroosi, xarroppa'e qa'ade!”

¹⁵ Ishootta ka ishetta kidene, “Ha ittaaronni!” Isheetta xoori ikokkonnase ka kiite, “Ha dukaatannen isha!” Ishootta ka kidene, “Asseeyye, erkampattootase isha tooytinitto koddita.”

¹⁶ Peetiroosi xoori, xarrase kooko'issa kammaaw caade. Ishootta ka xarrase panen ka isha akken. Ka oppa ollin qawwaawen.

¹⁷ Isha xoori akka jaw kidane'e harkan ishootta akkishe ka Poqalla atta akka tika hida kela isha sookshe ishootta torre ka ishootta kide, “Wossin Yayqoopi isho orra a amanno a ata hase' lela.” Ka ishootta kapa pora pila opa aane.

¹⁸ Ete pariteeyye, foolisowwa harmo'e tatammaqen ka kidene, “Ata Peetiroosi atta kodde?”

¹⁹ Herodisi mattaadi ete Peetiroosi fadacciise ka dapeeyye ka tooytampaya qore kammaayye, akka tooytampayasene leyshane'e ajaje ka sekkammaayye Yihutaayye desa Qeesaariyaapa aane ka eyye kuti'e.

Toota Herodiisi

²⁰ Herodisi orra Tiroosi isho a Sidoona qara'e a kuttaati miirode. Ishootta ka takka oli qapen ka de'en ka Pilaastoosi orxaytase a Herodiisi amaname akka ishootta qaarqaaro'e, isha naappaden ka ete ishootta oowsade kammaayye nuqusase qara araara kaassaden. Sede nefo wa malla asse kodene, qoota orra piitaayshoti piita a nuqusase mukinnootiiyyi damta akkanno malla.

²¹ Kuyaatase xooran qapamte oppaayye Herodisi mehaddasene a nuqusuma'e kalsade ka suafaanetaadi qara kuti'e ka samayta haasawade.

²² Samayta ka nessa kuttan kide, “Ini nessa Waaqa diisheey, a nama'en!”

²³ Herodisi qoota Waaqan ulfeessinin malla, erkampattoota Poqalla eennow isha da'isse. Punaata ka isha damen ikka to'e.

²⁴ qaaleta Waaqa xoori, kuyyaata mina'e kuttatta ka paldattan anni.

²⁵ Parnapaasi isho Sawuli ka kodaaysho dikkishen ka Yursaalamiiyyi dela Ansookkiyaapa tiitaawen ka Yohannisise Marqoosi kidammon isi quda qeeden ka ollin de'en.