Kodampaya 10 - Mataafa Qulqulloota

Peetiroosi isho Qorneloosi

¹ Nama takka Qorneloosi kidammo katama qiisaariya karaayye kala. Isha nefo xela oranna a Roomi karaayye kita takkan kita Taaliya kidamma oppaayye motolaqa.

² Isha nama toolaadi piisa ollinni Waaqa waaqaysanno ka Waaqa fuurro ka teekolaya daassata kutta daani ka awta piisa Waaqopa qinsanni.

³ Kuyyaata takkaayye, a letta saateta sakal mina kittooyye a erkampattoota Waaqa isha kapopa kullinitto ka isha haleenitto ka kiinitto “Qorneloosi!” Keleshaatappan fayya akke.

⁴ Ikka erkampattootase quda ildaa kode ka tammaqtan kide, “Poqallaay, ata maana?” Erkampattootase ka isha kiite, “Qinseetaayti isho daassatase a teekolaya daannitto, kalisoota a paxaara a ishin matte ke oorsadane'e koddite ka opeela xaate ka Waaqa kapa kayte.

⁵ Amma Iyyoobbepa orra erke ka nama Simoon Peetiroosii kidammo halacciise.

⁶ Isha amma tikase pakateeta kapa kitto a Simoonise kollaya tuuqnootiiyyi xaykuman caay.”

⁷ Ete erkampattootase sede isha lelte isha kapa tawteeyye, Qorneloosi ka orxayaadi oppaayye nama lakki isho xela oranna a kitaadi kara co oppa nama Waaqa fuurro takka hale

⁸ ka ete we piisa ishootta' lele kammaayye Iyyoobbepa ishootta erke.

⁹ Parraytaadiiyyi, ete ishootta katamasene kapa foolsadeneeyye, a letta saateta leh mina kittooyye, Peetiroosi tikase tula qara kitto a kela kalo qaropa qinseeta fayyade.

¹⁰ Sitiiyyi Peetiroosii ka do'e ka we takkan a dama faani ka a damta ishi kodama qara kittooyye kelashaata akketoppopa ollin tawe.

¹¹ Kelashaatose a akke nefo: a moonta panamte wa ohaata a kaaranta a kutta paha ka qeppeellitta afurin qapame ka piitopa lekkana.

¹² Wossin oppaayye nefo pinaana ika lekayta uumata a piitan desa keessan titmanno isho xampira a moontan xa'anna'e ca.

¹³ Sitiiyyi ikka nessa a kiino, “Peetiroosi, xa'e ka qalado ka dame” Dakaye.

¹⁴ Peetiroosi xoori ikide, “Poqallaay, in koddito anti apari wa an qulqullaawnin taaki a nyele, an damme!”

¹⁵ Ikka nessa a kiino, “Wa Waaqa qulqullayshe atti a nyele kideeta ke parpaaccisni in kitto.” dakayeew.

¹⁶ Ete sede sessaan koddite kammaayye, wessen ohaata paha eennoow moontopa qeedamen.

¹⁷ Peetiroosi ete wessen a kelashaatoppan akke maana kideeta akkima kodden oppa dikanno ka oppa' rakkannooyye, orrase a Qorneloosi erke kaassattanne tikase a Simooni akken ka xarroppa qa'aden

¹⁸ ka wellelen ka kaassaden ka kidene, “Hela Simoon Peetiroosi ishin kapopa xaykuma de'e ka are caa?”

¹⁹ Peetiroosi ete wossin a kelashaatoppan akke oppa dikannooyye, Hapura Qulqulloota i'ishi kide, “Tina nama sessa ke faani.

²⁰ xa'e ka lekkado ka ana ishootta erkeey, a oppa a' dikannin mali olli aane.”

²¹ Peetiroosi ka lekkade ka orrase kapopa aane ka ishootta kide, “Namase a faanittan anaay, wa malla deetene maana?”

²² Ishootta ka ishi kidene, “Ino Qernelewoosi motoloqitta kapan deene, isha samayta Yihuta piisa isha ulfeessini, ikka nama paxaara a Waaqa waaqaysanno, akka tikaadipa ke halacciiso ka wa kiinitta ke qara dakayo'e, erkampattoota a qulqullaawte ishi' lelte.”

²³ Peetiroosi ka tika karopa ishootta kullishe ka xaykuma ishootta teyyade ka eeyye ishootta mukshe. Ka parraytaadiiyyi xa'e ka ishootta olli aane. Hellaasene xaaysho a kiristaana Iyyoobbe kara ca oppaayye demo ka isha olli aanen.

²⁴ Ka kuyaata lammatati Qeesaariya kayen. Qorneloosi ka daltaytaadi isho moottadaadi a jaalanna ollopa hale ka opa Peetiroosii mina asanni.

²⁵ Ete Peetiroosi tika karopa kullinooyye, Qorneloosi loqqaadi kela'e pi'e ka ishi sakatade.

²⁶ Peetiroosi xoori i'ishi kide, “xa'e! Anti an xaayti mina'ew an namaay,” Ka isha xaashe.

²⁷ Ka ete isha olli haasawattan tika kelopa kulleeyye, orra lekayta a'eyye kelopa ollopa de'e akke.

²⁸ Ka ishootta kide, “Nama a Yihutitta kodde akka orra pila olli parkumo ka tikaaysho kelopa kullo, seera amanteetinno oppa akka faqqatammi in kinnin, ishina mattaayshina i'uptan. Ma xoori, akkan nama takka nefo'e ‘in qulqullaawne taaki in nyalle’ An kiini'i Waaqa ana akkishe.

²⁹ Semmalla, ete ana kamma orra erkameeyye an tiinnin malin de'eey, wa malla ana haleetene, upnaattan heena.”

³⁰ Qorneloosi ka kide, “Kuyyaata afuri turanne esse saateta sakal qaran tikiyyoppa Waaqa qinsanni, tin an isqara an upniniiyyi, nama takka mehadda pippildaawna kalsade ka ana tura qa'ade;

³¹ ka ana kide'e, ‘Qorneloosi! Waaqa qinseetaayti idakaye, daassatase xaayti a' teekolaya daannito nefo ka ke' dikatamte;

³² semmalla Iyyoobbepa nama erke ka Simoon-Peetiroosi halacciise. Isha tikase pakateeta kapa kitto a Simoonise kollaya tuuqnootiiyyi xaykuman caay.’

³³ Semmalla anka eennow ke kamma orra erke. Atti nefo sede a' deete fayya' koote. Wa Waaqa ke ajaje ke qara dakkaysatta'en piisantiiyyi are fuula Waaqa turopa ollopa deeneey akka haasawatto in heenna.”

Haasa Peetiroosi

³⁴ Peetiroosi ka haasawatta paayye ka kide'e, “Dukaatan Waaqa akkima orra olqaran jaalinni in kinnin amma iana kalte.

³⁵ Nama kadii punu piita heenteeyye deaayye, oton Waaqa fuurriiyyi ka hanqeelluma kooniiyyi, Waaqa i'isha teyyanni.

³⁶ Waaqa akkima samayta Isira'eeliti qaaletaadi erke a upnaysamte ka ishootta'ew Yesuusi Kiristoosi, poqlase a orra piisa qudanne otootase a fayya a nakayta torreetan de'e.

³⁷ Eta a Yohaannisi qoota pisha jaqattaati desa torre paayyatte, Kelila xaate haka piita Yihuta piisa oppa'e, wa kodde i'uptan.

³⁸ “Ka asseew Waaqa akka Yesuusise a Naasirati Hapura Qulqullootatin daate ka hupna ishi daashe, i'uptan. Waaqa qoota isha olli co malla, isha ka wa pa'aara kodanne ka orra a hupna ukkumeeta kela miiddame piisa dinissaanne pora aane.

³⁹ “Isha koda kantaada Yihuta isho katama Yursaalami kara kodeeti desa ino an maakkiyya. Ma xoori qoyra qara'e isha fannisen ka ishshen.

⁴⁰ Waaqa xoori kuyyaata sessattatiiyyi, tootoppa isha xaashe ka akka akkaado kode.

⁴¹ Akkaattaadi nefo maakkiyyasine a turan Waaqa ishootta reexadeeti'i, akkaade diisheey samayta piisa'en a isha tootoppa xa'e kammaayye ino a isha olli dame ka ikke an maakkiyyaadi.

⁴² Ka akkan wossin samayta torrino'e, ka akka isha a ca isho a le'e qara' farato'e, akka Waaqa isha shuume maakkummo'e ino ajaje.

⁴³ Nama isha amanno piisa akkima maxxaadin diissata juppoota teyo, xuumampaya piisa isha maakkummi.”

⁴⁴ Ete Peetiroosi sede haasawannooyye, orra qaalese dakaye piisa qarae Hapura Qulqulloota lekkade.

⁴⁵ Orrase a Yihuta dawra qara murade ka kiristaana kodde a Peetiroosi olli de'e, ete Waaqa orra a Yihutaata in koddinin kuli Hapura Qulqulloota daashe ikka akkeneeyye oppa'e qawwaawen.

⁴⁶ Wa ishin akka Hapura Qulqulloota isasine Yihutaata in koddinini kuli daasame upnaadene, qoota isasine Yihutaata in koddinini a fadda pilaatin haasawannaan ka Waaqa kalataysannaan dakayen malla. Sitiiyyi Peetiroosi ka haasawade ka kide,

⁴⁷ “Orrose a xanno mina'ew Hapura Qulqulloota teyyadeey, Ayno pishaan jaqqama ishootta dawra?”

⁴⁸ Ka akka maxxa Yesuusi Kiristoosin jaqqamane ajaje. Sekkammayye, ikka akka Peetiroosi ishootta kapa kuyyawwa lamaya piro isha naappaden.