Kodampaya 1 - Mataafa Qulqulloota

¹ Atti Tewofiloosi! Anti mataafiyyo a paayyota' kara'e, wa Yesuusi kode ka kollishe piisan taafe; Waan taafe nefo haka Yesuusi kodaadi paayyeeyye paayyatte;

² haka kuyyaata a oppa moontopa fayyade kaynitto kara'e wa kode. Fayyattaadi nefo a erkamampayasene' xaadi a reexade Hapura Qulqullootatin ajaje kammaayye kodde.

³ Ete rakkoota kuttayteeta isha qara' kayte, ikka to'e kammaayye, saantada a orra kalla lekayaappanne caattampayta kodde ka ishootta isi akkishe ka kuyyaata kunda afur piisa ishootta tura akkaattaanne qoota mankisteeta Waaqati desa ishootta kollishe.

⁴ Ka a ishootta olli damta' kuti'eeyye ishootta ajaje ka kide “Kippeetase a Waaqa Aappa daashe an anti ishina' lele asada diishe, Yursaalami kara an sookan.

⁵ Yohaannisi pishaanne orra jaqqe; ishina xoori kuyyawwa lamaya kammaayye Hapura Qulqullootatinni jaqqamtan.”

Yesuusi akkima moontopa fayyade

⁶ A ishootta' pora takka oppa ollopa ooreneeyye, i'isha kaassaden ka kidene, “Poqallaay, hela kiseeta oppa mankisteeta Isira'eeli kalisso amma?”

⁷ Yesuusi ka ishootta' oorshe ka kide, “Eta isho sapana a Waaqa Aappa Hupnaadi a ukkumeetatin piishe, ishina upnaatta a ettanissan.

⁸ Ma xoori, oto Hapura Qulqulloota ishin qara' lekkadooyye, hupna akkattan ka sitiiyyi Yursaalami isho piita Yihuta' pisa oppa Yihuta pisa oppa'e ka Samaariya isho piita piisa oppa'e maakiyyaayyo kodditan.”

⁹ Ka ete asse kide kammaayye, a ishootta isha tooynaaneeyye, moontopa fayyade ka oraarta karopa tawe ka ildaasso tura dapade.

¹⁰ Ete isha' moontopa fayyannooyye, ishootta ka isha quda' ilda koden ka kammeela tooynaaneeyye, nama lakki a mehadda a'ata kalsade ishootta kapa' qa'ade

¹¹ ka ishootta kidene, “Ishina orra Kelilaatiiyyi, maana malla areppa' qaqqa'atten ka moontandela tooyannittan? Yesuusise a moontopa fayyannooye akkiten, akkimoose a moontopa fayyannooyye akkiten mina'e tiitaawa ka de'a.”

Maatiyaasi akka pakka Yihuta oppa' reexame

¹² Sekkammaayye, ishootta ka irrootase Taprasayti kidammitto qaraayye Yursaalamipa tiitaawen. Irrootose a Taprasayti Yursaalami kapa desa pora a kuyyaata saampata orra Yihutaati anta' faqqatammo (Kiilomeetreeta takka) mina' kitto'e seki.

¹³ Ka Yursaalamipa kalen ka fooqetase a qara kalan qaropa fayyaden. Ishootta' nefo Peetiroosi ka Yohaannisi ka Yayqoopi ka Intiriyaasi ka Filippoosi ka Tomaasi ka Pertelemewoosi ka Maatiyoosi ka Yayqoopi inna Ilfiyoosi ka Simoonise piitaaysho' qara' kammo isho inna Yayqoopi Yihuta.

¹⁴ Sene piisa ka awta piisa qinseeta'e ollopa anni. Ishootta qudaayyeew iskatta takka takka ka Maariyaami aayya opa Yesuusi isho hellaa opa Yesuusi ca.

¹⁵ Sitiiyyi, Peetiroosi ka orra amanno a nama dippa ka kunda lakki mina' co oppeela qa'ade ka kide,

¹⁶ “Hellaanno, qoota Yihutase, a orra Yesuusi qape tura' qateeti desa, qaaletase a mataafa qulqulloota a Hapura Qulqulloota turan qattishe ka afa Taawwiti oppan haasawade, dikkatta isheetta parpaacciste.

¹⁷ Yihuta ino oppaayye takka ka ino olli kodoose' kooni.

¹⁸ Ma xoori namoose kaaja a kodaadi a neeqatinni piita pidde ka piisse oppa fuulan piita' de'e ka otantan xata kaamade; marqina ka kara qiten.

¹⁹ Sede ka orra Yursalami kara kalo piisa upnaysamte. Seminan piitose ka afaassotin ‘Akeldaama’ kidamte ka halaamte. Sede nefo ‘Piita diika’ kideeta.

²⁰ “Sede nefo wa malla asse koddite, Mataafa masmuureta oppa qaaleta a kiinitto ‘Tikaadi a onto, umma nama kara in kallaannin.’ Saarumaadi nefoow, a nama pila' teyyado.’ Qoota taafamte malla.

²¹ “Semmalla eta a Poqalla Yesuusi ino oppa kalo piisaayye, orra ino olli co oppaayye

²² ka eta Yohaannisi pishaan orra jaqnooyye paayyatte, haka Yesuusi moontopa fayyade kara'e; orra ino olli co oppaayye, nama takka tootoppa xaana Poqallaatti ino olli maakkitta koddeeta parpaaccisni.”

²³ Ka sekamma nama lakki dehayshen. Ishootta' nefo, takka Yoosefise ishi “Persaapaasi” taakki “Iyyoositoosi” kiinaan ka Maatiyaasi.

²⁴ Ka qinsaden ka kidene, “Poqallaay, ke a karitta nama piisa karan xata upo, sene lakki oppaayye, a' reexatte ino' akkishe.

²⁵ Wa an qinsanninna nefo, kodase isho erkanoosen a Yihuta poraadi opa annooyye alle diishe nama pakkaadi oppa koddo ka teyyado akka ino akkisso malla.”

²⁶ Ete qoyritta kateneeyye, qoyrittase ka Maatiyaasi qa'e. Isha ka erkamampayasene kudanka takka oppa' dikame.