Keleshaata 9 - Mataafa Qulqulloota

¹ Erkampattoota kenatta ka turumpaadi dawteew. Anka hikkitta takka a moonteeyye piitopa pi'e akke. Fura hiwwalaalla ka ishi' daasameen.

² Isha ka hiwwalaallasene' pane; hiwwalaallasene karaayye qayya a kisa kutta oppa xaano paho ka xa'e. Qayya a hiwwalaallasene kara xa'e minanne piirtota isho xayxayta ka tukkanen.

³ Qayyase karaayye torrayta ka piita qara' qite. Hupna a kitatta piita' paho ka ishi' daasame.

⁴ Torraytase nefo, akka aykitta isho jabba ilaawa taaki qoyra takka nefo in miiddinini'i ishi' lelamte; torraytase orra miidda isha parpaaccisno orra kobbeeta Waaqa' fuulaaysho oppa in qapnini patta.

⁵ Torraytose nefo akka leya keni kara orroose rakkacciiso diisheey akka ishootta leysho ishi in faqqatamme. Surumta a torraytase orroose qara' qeede nefo, oto kitatta nama qaniinooyye, akkima suraawnitto mina.

⁶ Kuyyawwosen karaayye, orra toota fada, ma xoori in teyo ka toota xajeela, toota ka alle ishootta tura qahata.

⁷ Torraytose farta oranna' harmisatte paha. Mattadaasso qaraayye wa xalaala a warqeeta' paha'e ca. Fuulaaysho fuula nama'e paha.

⁸ Nyirfaasso nyirfa iskatta'e pahan, ilkaasso ilka karma'e pahan.

⁹ Ka siplase kessoppa' qaarannaan paho qapan, nessa xoollaasso' kela xaano, nessa a fartada isho a sarakelladda leka a oranna torpa kulufna kela xaano paha.

¹⁰ Ishootta a kitatta' mina'e eekta isho sikla qapan. Ektaaysho kara hupna a ishin leya keni kara orra miiddane qapan.

¹¹ Ka nuqusa kuli qapan. Isha' nefo, erkampattoota a hiwwalaallaseneti. Maxxaadi nefo afa Iprutin apaddooni kidammi ka afa Kirikkitinni, aboliyooni kidammi.

¹² “Oo kido” A paayyota itarpite. Tin sekkammayye “Oo kido” a pila lakki de'aaw.

¹³ Erkampattoota a lehatta ka turumpaadi dawte. Tin anka kaassaasene afuri a porase a kalisoota a warqeetoppa kodame ka fuula Waaqa tura co qara desa, nessa xaano dakaye.

¹⁴ Nessase ka erkampattootase a lehatta turumpa qapatte kide'e, “Erkampattoowwasene afuri kirrase kutta a Efratiisi kara hidame fure.”

¹⁵ Erkampattowwasene afuri saatetose isho kuyyaatose ka leyoose isho paroseti harmisade ka akka sanynyeeta nama qudaayye harka sessaappa takka pirane'e furmaden.

¹⁶ Lekukma a xeloose fartan torpinooti akkima milooneta dippa lakki kodde anka dakaye,

¹⁷ fartadasene isho xelase fartadaasene qara kute'e, akkan kelashaatoppan ishootta akke mina'e, akka pahan arepaxata lelamte; siplase kessoppa qaarannaan a kessaaysho qara co a porooda apitta mina'e tiimi; ka akka dakase yaakinti kidammo mina poori ka ishin moonta paha; ka akka dakaase a apitta mina puddayyaysi. Mattada fartadaaseneti, mattada karmada'e pahan. Apitta ka qayya isho daka apitta ka afaappa ishootte sookni.

¹⁸ Apitta ka qayya isho dakaase a apitta erkannaawwosen sessa afaasso oppa sooknaatinni, sanynyeeta nama qudaayye harka sessaappa takka ka piramte.

¹⁹ Hupna fartadooseneti afaasso isho eektaaysho karaayye ca. Ektaaysho nefo maaka pahata ka matta maaka qapta ikka ishin nama miini.

²⁰ Sanynyeeta nama a erkannawwosen oppa toota kela pahate, kodase neeqa a harkaayshoti diisheetanne juppootoppa in oorre. Umma orriyya isho killanna a warqeeta ka dakara pirreeta ka a siplalla ka daka isho qoraappa kodame, a paata akkeeta taaki dakaya taaki pora anta ettaninni in kinnini waaqaysatta in diinne.

²¹ Umma nama ikassa ka kodkoda kodatta ka sharmuutuma isho hatantaaysho kammaayye in oorre.