Keleshaata 8 - Mataafa Qulqulloota

Akkima kobbeeta tappatta' panamte

¹ Ete laahase kobbeeta tappatta' paneeyye, haka saateta quda paka' mina kitto'e, moonta ollin jaw kiite.

² Anka erkampattowwasene tappa a fuula Waaqa' tura qa'ade akke. Turumpadda dawamma tappa ka ishootta' daasamen.

³ Erkampattoota pila a meehase kara tankarta qayyannaan warqeetoppa kodame qapatte ka deete ka poqa kalisoota' kapa qa'atte. Poqasene a kalisoota a warqeeta sufaana tura co qara'e, tankarta kuttayteeta a qinseeta qulqullowwa' piisa olli kalsammitto ka ishi' daasamte.

⁴ Harka erkampattootaseti oppaayye, qayyase a tankarta ka qinseeta a qulqullowwa olliiyyi, fuula Waaqa' turopa opeela xa'e.

⁵ Sekkammaayye erkampattootese ka meehase kara tankarta qayyannaan qapatte ka poqasene a kalisoota qaraayye oppa apitta immakte ka piitopa shuulite. Qaqawwa ka nessa ka hankaada isho lellehayta piita ka kodde.

Akkima kaassa dawamen

⁶ Erkampattowwasene tappa turumpaddasene dawamma tappa qapaden ka turmpaddaasso dawa' harmisaden.

⁷ Erkampattoota paayyota ka turumpaadi dawte, apteenta isho apitta a diika olloppa lahe ka kodde. Ka piita qaropa katame; piita qudaayye, harka sessaappa takka ka kupade. Qoraappaayyeew, harka sessaappa takka ka kupadeew. Aykittta a ilaawa piisa ka kupade.

⁸ Erkampattoota lammatta ka turumpaadi dawteew. Wa irroota kutta' paha ka opayaan pakateeta karopa pi''en. Pakateeta qudaayye, harka sessaappa takka ka diika kodde.

⁹ Pinaana pakateeta kara kala oppaayye harka sessaappa takka ka jolqe. Markapadda qudaayyeew harka sessaappa takka ka pirame.

¹⁰ Erkampattoota sessatta ka turumpaadi dawteew. Hikkitta kuttayta a ila mina opayno ka moonte pi'e ka kirrada qudaayye harka sessaappa takka isho ella pisha qara' de'e.

¹¹ Maxxa hikkittooseti' nefo arkayto kidammi. Pishasene qudaayye harka sessaappa takka ka haddaawe. Pishaasene haddaawe minanne orra lekayta ka le'e.

¹² Erkampattoota afratta ka turumpaadi dawteew. Piirtota qudaayye harka sessaappa takka ka leya qudaayye harka sessaappa takka isho hikka qudayyeew harka sessaappa takka ka daysame; seminanneew ishootta qudaayye harka sessaappa takka ka tukkane. Sedenne kuyyaata qudaayye harka sessaappa takka isho halkeetta qudaayye harka sessaappa takka ka la'ayta dape.

¹³ Sekkammayye eten tooynooyye, kawwaarayta a moonta quda keerro ka nessa kuttan ullupno ka kiinoo, “Oton erkampattowwa ata hase sessa turumpaaysho' dawnaaneeyye, orra piita qara kalo oo ishootta kido ! Oo ishootta kido! Oo ishootta kidon!” dakaye.