Keleshaata 7 - Mataafa Qulqulloota

Isira'eeleta nama kuma dippa ka kunda afuri afuri

¹ Sekkammaayye anka erkampattowwa afur a qeppeelliyya piita afur qara' qa'ade akke; ishootta ka piita ka pakateeta isho qoyra qara'e akka xayxayta takka nefo in uruurinini'i, xayxayta piita a qindadda afuri desa uruurino tura qapen;

² anka erkampattoota pila a kobbeeta a caattampayta Waaqa' qapatte a qinda piirtotati desa deenitto akke. Ikka erkampattowwasene afur isasene akka piita isho pakateeta miiddane'e hupna ishootta' daasame opa nessaadi kuttisse ka ullupte ka kiite,

³ “Hakan fuula orxaya Waaqinno oppa kobbeeta toommininno kara'e, piita taaki pakateeta taaki qora an miidan!”

⁴ Anka dikoota a orrase kobbeetan toommame dakaye, kaffa Isira'eeli piisa oppaayye dikoota a orrase kobbeetan toommame kan kuma dippa ka kunda afuri afuri.

⁵ Kafa Yihuta oppaayye a kobbeetan toommame nama kuma kudanka lakki; kafa Roopelippaayye nama kuma kudanka lakki; kafa Kaatippaayye nama kuma kudanka lakki;

⁶ Kafa Aseerippaayye nama kuma kudanka lakki; kafa Niftaalemi oppaayye nama kuma kudanka lakki; kafa Minaaseppaayye nama kuma kudanka lakki;

⁷ kafa Simoonippaayye nama kuma kudanka lakki; kafa Lewippaayye nama kuma kudanka lakki; kafa Yisakoorippaayye nama kuma kudanka lakki;

⁸ kafa Saapiloonippaayye nama kuma kudanka lakki; kafa Yoosefippaayye nama kuma kudanka lakki; kafa Piiniyaamippaayye nama kuma kudan ka lakki.

Lekna a mehadda a''ata' kalsade

⁹ Sekkammayye anka tooyyade ka orra akata leka akke, ishootta lekna ka kaffa ka sanynyeeta isho orra afaa ika lekayta haasawanno oppaayye ollopa sooken ka mehadda a''ata' kalsaden ka taamma qoyqoyta harkoppa' qapaden ka sufaanase isho laahase' tura' qa'aden.

¹⁰ Ka nessa kuttaytan ullupni ka kiini, “Ishin pahatta, a Waaqase xanno sufaana qara' kute'eti isho a laahaseti!”

¹¹ Erkampattowwasene' piisa ka sufaanase ka qimayaasene isho uumatase catta qapo afuri kapan desa qaqqa'aden ka sufaanase' tura itturandesa seehen ka Waaqa' sakataden;

¹² ka kidene, “Ameen! Saara ka kuttuma ka ookuma ka kalata ka ulfeena ka hupna isho kokkonnuma, a paraparaayye haka paraparti a Waaqinno' kodden! Ameen!”

¹³ Qimayaasene oppaayye takka ka anopa tiittawe ka ana' kide, “Sene mehadda a''ata' kalsade opa ayno? Ka ayshaayye de'en?”

¹⁴ Anti ka ishi' kide, “Poqallaay, ke upa” Ikka ana' kide, “Ha ishootta isasene rakkoota kutta oppan tarpe ka de'e ka mehaddaasso a kalsannaane diikase a laahaseetitin diipaden ka attaysaden.

¹⁵ Semmalla sufaana Waaqa' tura caan ka halkeetta ka kuyyaata tikaadi a qulqulloota' kelaayye ishi' koda kooni. Isase sufaana qara' kute'e ka kaattisaaysho' kodda.

¹⁶ Umma arepa desa in doxan ka in deepoodan, umma atoota ishootta in kupto, umma foola ishootta quda in kayo.

¹⁷ Laahase otanta sufaana' kara co, sikmaytaaysho'e kodda ka paada pisha caatta' kapopa ishoottan aana Waaqa ka ilmaama piisa ildaappaayye ishootta' haqa.”