Keleshaata 6 - Mataafa Qulqulloota

Kobbewwasene tappa akkima panamen

¹ Sekkammaayye anka a laahase kobbewwasene tappa oppaayye a paayyota panno akke. Ka uumatase caata qapo afuri oppaayye a takka nessa a xirarron “xooye!” kiino dakaye.

² Tin anka farta ata akkeew. A fartase' qara kute'e ka paanta qapa' xalaala kuli ka ishi' daasamen. Isha ka putampayta kodde ka putaymaayye desa putaymaapa anta' xa'e.

³ Ete laahase kobbeeta lammatta' paneeyye, anka uumatta caatta qapo a lammatta “Xooye!” kiino dakaye.

⁴ Farta pila a akata tiima ka sookte. A fartase qara kute'e, akka piita qara nakayta alle pashsho ka akka orra oli piro kodo'e, hupna ukkumeeta ka ishi daasame. Koraateta a kutta ka ishi daasamte.

⁵ Ete laahase kobbeeta sessatta' paneeyye, anka uumata caatta qapo a sessatta “A xooye!” kiino dakayeew, tin anka farta poora akke. A fartase' qara kute'e ka hiila harkoppa qapa.

⁶ Anka nessa a uumatase caata qapo afuri otantoppa xa'e paho dakaye, nessase ka kiini, “Kappa a kiilota quda paka mina' co a xaayya kuyyaata takka' koddo. Poorta a kiilota takka ka paka mina' kittoow a xaayya kuyyaata takka' koddito; ma sayteeta isho wayneeta in miidan.” Anka dakaye.

⁷ Ete laahase kobbeeta afratta' paneeyyeew, anka nessa a uumatase' catta qapo afratta “A xooye!” kiino dakayeew.

⁸ Tin anka farta puleeta akke. A fartase' qara kute'e maxxaadi toota kidammi. Si'ooli ka isha kamma' qatte. Toota isho si'ooli akka orannaanne ka lootanne ka paaqa orra pirronne isho pinaana koommaytatin piita qudaayye harka afuri oppa takka pirane'e, hupna ukkumeeta ka ishootta' daasame.

⁹ Ete kobbeeta a kenatta' paneyyeew, anka, poqa kalisoota' kela'e napseewwa a orrase' qaaleta Waaqa isho maakkumaaysho a daashen malla leysame akke.

¹⁰ Ishootta ka nessa kuttan ullupen ka kidene, “Qulqullitto ka dukaallayto ke a piisa qara qapo Waaqqo! Haka aytamiti'i orra piita qara co qara' farata diissa ka diikinno malla haalota pooyya diissa?”

¹¹ Ishootta matta mina'e mehadda a kalsadane a a'ata ka ishootta daasamen. Haka dikootase a hellaasso a kiristaana a ollin orxaya Waaqa' koddene ka itturopa leysama immakaannitto kara'e akka shakkayteeta asadane'e ishootta' lelamte.

¹² Sekkammaayye ete laahase kobbeeta lehatta' paneeyye, ishopan tooyyade. Piita ka a kuttati lellehte. Piirtota ka akka ohaata dapteeta a poora' mina poornaatte, leya pisa ka akka diika mina' tiimnaade.

¹³ Akkima puppeeta qoyra hilteeta lellehinnitto dalta ka quda piitopa sehnitto mina'e, hikka ka moonte seehen.

¹⁴ Moonta ka akka mattaafase ollopa marrammo mina'e marramte ka patte. Irrowwa isho piitada otanta pakateeta kara ca piisa ka poraaysho oppa alle' qeedamen.

¹⁵ Nuqussa piita ka ukkumampaya ka saarra a xela oranna ka teyantoolaya ka hupnampaya ka karpishshadda isho a karpishshadda in koddinini piisa ka rahanadda isho shilalla irrowwa kara' deddekaden.

¹⁶ Ka irrowwa isho shilalla' kidene, “Ino qara deka ka miira a isase sufaana qara kute'e isho a laahaseti turaayye ino juuta.

¹⁷ Kuyyaatase kutta a miiraayshoti idesa kayteey, ayno isqara oorissa ettansha?”