Keleshaata 5 - Mataafa Qulqulloota

Mataafase isho laahase

¹ Anka harka akkitta a isase sufaana qara' kute'e oppa'e, mataafa ollopa marrammo a karan ka lakatulan oppa' taafame ka kobbeeta tappaan dufame akke.

² Anka hupnampayteeta erkampattoota takka a nessa kuttan haasawannitto ka kiinitto, “A kobbewwosen paneeta ka mataafose ollopa marrammo paneeta isha parpaaccisnitto ayno?” akke.

³ Ma xoori moonteeyye ka piiteeyye taaki piita kelaayye, a mataafoose ollopa marrammo paneeta ka kara tooyeeta ettanshe takka nefo in co.

⁴ A mataafose ollopa marrammo paneeta ka kara tooyeeta isha parpaaccisnitto qoota in teyannin malla, a kuttatin pooye.

⁵ Sitiiyyi qimayasene oppaayye takka ka ana' kide, “Impooyan, tin karmase kafa Yihuta kodde ka meera a Taawitippaayye xa'e, ipute. Isha' mataafose ollopa marrammo isho kobbeetase tappa paneeta i'ettansha.”

⁶ Sekkammaayye anka suufaanase isho uumatase caata qapo afuri otanttoppaayye ka qimayasene otanttoppaayye, a laha qalame paho ka qa'ade akke. Laahose' nefo, kaassa tappa ka ilda tappa qapa. Ishootta' nefo hapurrasene a Waaqa tappa piita piisa qaropa erkame.

⁷ Laahose ka de'e ka harka akkitta a isase sufaana qara' kute'e oppaayye, mataafa ollopa marrammo qeede.

⁸ Ete mataafase ollopa marrammo qeedeeyye, uumatase caata qapo afuri isho qimayaasene kunda lakki afuri ka laahase' tura itturandesa seehen ka ishi' sakataden. Ka matta mina kehayta qapaden ka qorewwa warqeeta a oppa tankarta immakene' qapaden. Tankartose' nefo qinseeta qulqullowwa.

⁹ ka masmuureta haaraya dawaden ka kidene, “Qoota' diikaaytin kaffaappa ka afaddaappa ka sanynyewwaappa isho leknoppa Waaqa' orra fura' qalamte malla, mataafase ollopa marrammo qeeda'e ka kobbewwa fura'e ke mina' qate.

¹⁰ Ka akka Waaqinno koda kodane'e, mankisteeta qeesewwaati ishootta koote; ikka piita qara nuqusuman.”

¹¹ Eten tooynooyye; sufaanase ka uumatase' caata qapo isho qimayasene kapandesa, anka nessa a erkampattoowwa leka' dakaye. Lekumtaaysho' nefo kumadda leka isho miloonewwa leka.

¹² Ka nessa kuttaytan kidene, “Laahase' qalame, hupna ka teyanta ka ookuma ka kokkonnuma ka kuttuma ka ulfeena isho kalata akkatta isha parpaaccisni.”

¹³ Anka uumata moonteeyye ka piiteeyye ka piita kelaayye isho pakateeta karaayye co piisa a kiino, “Isase' sufaana qara' kute'e isho laahaseti'i, kalata ka kuttuma ka ulfeena isho hupna a paraparaayye haka paraparati ishootta kayo” dakaye.

¹⁴ Uumatase caata qapo afuri ka kidene, “Ameen!” Qimayaasene ka kilpiippaden ka fuula piitan kayen ka sakataden.