Keleshaata 4 - Mataafa Qulqulloota

Sufaana a Waaqa isho taanteta Waaqa qinsatta a moonta

¹ Sekkammaayye anka tooyyade tin moonteeyye xarra paname ka ca. Nessa kaasa a dawammo paho an paayyota qara dakaye ka kide “Xooye ka are qaropeela fayyado. Wa itturopa kodda ishootta parpaaccisnane'en ke' akkishaay.”

² Eennow anka hapuran kinnaade ka tin moonteeyye sufaana akke. sufaanase' qara'e takka ka kuti'e.

³ Isase sufaana qara kuti'e nefo, pahanaadi dakaddasene heraan kokokkoka a iyaasbidi isho a serdinooni'i paha. sufaanase kapan desaaw pankaallata a dakase heraan kokkoka merkidi pahato ca.

⁴ sufaanase kapan desaaw suufaana kunda lakki afuri caaw. Suufaanaddasene qara'e, qimaya kunda lakki afuri, a mehadda a'ata' kalsade ka kullewwa a nuqusa a warqeeta a mattaaysho qara' kalsade ka qaa'en.

⁵ sufaanase qudaayye, hankaada ka nessa xirara isho a qaqawwa ka deeni. sufaanase turaayye ila opayna tappa ka caan. Ishootta' nefo hapurrasene a Waaqa tappa.

⁶ Sufaanase turaayye pakateeta a kaawwata pahato a wahi kiite ka oynitto ka kitta. Otantoppaayye, sufaanase kapandesa pinaana afuri a fuula turan ka kamman ilda lekaya qapa'e ca.

⁷ Pinanta paayyota karma paha; a lammatta' xorma paha; a sessatta fuula a nama' paho qapa; a afratta'ew seyya moontan xa'anno paha.

⁸ Pinaanoosen afuri, matta mina' xoolla lehi lehi qapan ishootta isqudandela ka iskaranxata ildaanne immakaaden. Umma halkeetta ka kuyyaata'e “Qulqullitto, qulqullitto, qulqullitto, Waaqa Poqalla isase we piisa ettaninno. A xatta co ka amma co ka itturopa de'o.” kideeta qaatinni in caan.

⁹ Uumatase caata qapo oto isase sufaana qara' kute'e ka a paraparaayye haka paraparati' kallaanno'e kuttuma ka ulfeena isho kalata kalinnaan piisaayye,

¹⁰ qimayasene kunda lakki afuri, isase sufaanaadi qara' kute'e ka paraparaayye haka araparti' kallaanno tura'e kilpiippanni ka fuula piitan kayni ka ishi' sakatanni ka kullewwasene' xaaysho a nuqusa sufaana tura' xaayni ka kiini,

¹¹ “Poqallaanno ka Waaqinno, qoota we piisa uumte malla, we piisa ka heennaatin uumamen. Ka caaden malla, kuttuma ka ulfeena ka hupna ke'e parpaaccisni.”