Keleshaata 3 - Mataafa Qulqulloota

(5) Erkana tika kiristaana Serdeesiti erkame

¹ Erkampattoota a tika kiristaana a Serdeesiti' taafe ka kide: “Sede isase hapurrasene a Waaqa tappa isho hikkasene tappa qapade kapa lelamte. Kodaayti in upa, maxxa'e ikkitta, ma xoori ittoote.

² Impase ka hupnase' xaayti hase shakka ka pirama' foolsade kokkonnayshe fuula Waaqiyyo' turaayye kodaayti immakkoota in koddine anka an akkineey.

³ Semmalla kollissa atta paho akkima' dakayte ka teyyatte matte oorsado ka tooyte ka juppootaaytippa oore. Oton a impasni a kinnini xoori, akka kera' mina'en a isi qara a upnin mali ke qara de'a, umma saateta a xaame oppa akkiman de'o a upnaatto.

⁴ Ma xoori Serdeesi karaayye, orra mehaddaasso a kalsannaane in nyalinnin lamaya ke quda ca. Ishootta' qoota orra a mehadda a'ata kalsatta ishootta parpaaccisno kodden malla, mehadda a'ata'e kalsadan ka ana olliiyyi aanan.

⁵ Nama puto, a xaaysho' mina'e mehadda a'ata kalsada, anti ka fuula aappinno isho a erkampattoowwaadi' tura'e maxxaadi ishi upnaysha; umma maskapase a caatta a maxxa caattampaaya oppa taafammo oppaayye maxxaadi an haqo.

⁶ Wa hapura tikka kiristaanati' kiina nama a napahata dakaynitto qapo, a dakayo!”

(6) Erkana tika kiristaana a Filadelfiyaati erkame

⁷ Erkampattoota a tika kiristaana a Filadelfiyaati' taafe ka kide: “Sede isase qulqullitta ka dukaallayta kodde ka fura a tika Taawwiti qapo kapa lelamte. Wa ishi' dufa nama takka nefo panni in co umma wa ishi' pana nama takka nefo dufni in co.

⁸ Kodaayti in upa; tin, xarra a paname a nama takka nefo dufa in ettaninninin ke tura' xaaye. Hupnaayti akkima shakki in upa; a koddito ma qaaletiyyo ittooytite; umma maxxiyyo a' marmanne.

⁹ Semmalla darampayoosen parka seetana kodde ka a Yihutaata in koddinin mali ‘An Yihutaata’ issi' kiina, akka de'an ka loqqaatti kela' pi'anen koda ka akkiman anti ke jaalade akka upnaadane' koda.

¹⁰ Qoota' qaaletase' xayyo an ke kide duupattampayta kodde tooytite malla, anti nefoow, saatetase a rakkoota orra piita qara kalo ekkaysatta'e piita piisa qara deenitto kelaayye, in ke tooyta.

¹¹ Tin anti jarjartannen deeni, akka nama takka nefo xalaalaatti ke qara in qeennini'i wa' qapta kokkonnaysado ka qapado.

¹² Nama puto, anti tikase a qulqulloota a Waaqiyyo kela'en tuuda isha koda, umma pakkanna kelaayye in sooko. Anka maxxa Waaqiyyo isho maxxa katama Waaqiyyo isha qara' taafa. Katamoosen nefo, Yursaalami haraya, isase moonte xata Waaqiyyo kapa lekkannitto. Anka maxxase xayyo haaraya isha qara' taafa.

¹³ Wa hapura tikka kiristaanati' kiina nama a napahata dakaynitto qapo, a dakayo!”

(7) Erkana tika kiristaana a Lodooqiyaati erkame

¹⁴ Erkampattoota a tikase a kiristaana a Lodooqiyaati' taafe ka kide: “Sede isase ‘Ameeni’ kodde ka maakkittase amaname ka a dukaata kodde, uumata Waaqa piisa ka isha quda teyade kapa lelamte.

¹⁵ Kodaayti in upa a' puulaawni a' kitto umma a' foolli a' kitto. Kadin ippuulaawni taakki iffoolli kiiteeyye, ipaxaari.

¹⁶ Qoota a' puulaawni a kinnin taaki a' foolli a kinnin ka ufnuuqnitto malla, afaayyo oppa alle ke tufa qaran ca.

¹⁷ Atti ikkiini, ‘Anteyaantolayta ka teyaanta kutta' qapa; umma wa ana' qajna takkan nefo in caan.’ Akkima' hiyumte ka nyorpite ka teekte, ilda ka ke qara' paten akka lulle kitto, a upto.

¹⁸ teyantoolayta kodda'e warqeetase apittan ekkaysatamte akka ana qara piddatto ka jeera lulle kinnaattaayti' qara deka'e, mehadda a ata' kalsatto ka akka' paata akka ettanisso'e, qorsa ilda' piddatto ka ildaappa' daatatto'en ke dehaammi.

¹⁹ Anti orra an jaalanno piisan fukni ka ishootta qattaani, semmalla japaado ka juppootaaytippa oore.

²⁰ Tin anti xarroppa'en qa'ade ka oppa kooko'inni; kadi nama nessiyyo dakaya ka xarrase ana tura panaayye, isha kapopan kulla ka isha olli damta dama, isha ka ana olli dama.

²¹ Akkiman anti' pute ka aappinno olliiyyi suufaanaadi qara' kute'e mina'e, nama puto akka ana olliiyyi suufaaniyyo qara' kuti'o'en koda.

²² Wa hapura tikka kiristaanati' kiina nama napahata dakaynitto qapo, a dakayo!”