Keleshaata 22 - Mataafa Qulqulloota

¹ Sekkammaayye erkampattootase ka kirra a pisha caatta isase sufaana Waaqa isho a laahaseti kelaayye urqino ka a kaawwata la'aynitto mina waha kide ana akkisse.

² Kirroose, pora a kutta a katamasenetiiyyi otantoppanne urqini ka tarpini. Kirroosetiiyyi qinda akkitta ka a pittittatinni, qoyra caatta a leya leyaappa dallo ka paroppa kudanka lakkin dalta dallo ca. Haashsha qoyroseti ka lekna dininni.

³ Umma arepa desa jiija takkan nefo in kinnaadan. Sufaana Waaqa isho a laahaseti katamasene kara kinnaadan, orxayaadi ka isha waaqaysadan.

⁴ Ka fuulaadi akkan. Maxxaadi ka miintoppa ishootte caada.

⁵ Umma arepa desa halkeetta in caatto. Qoota Waaqa Poqalla ishootta la'aysho malla, la'ayta ipsa taaki a piirtota ishootta parpaaccisni in co. Ikka paraparaayye haka paraparati nuqusuman.

Akka Yesuusi tiitaawo ka de'o

⁶ Sekkammaayye erkampattootase i'ana kiite, “Qaalewwosen a amaname ka a dukaata. Qaaqa Poqalla isase xuumampaya hapuraadi daanno, wa dehaynittoppa kodda orxayaadi akkissa'e erkampattootaadi erke.”

⁷ Yesuusi ikide, “Tin anti jarjartannen deeni! Nama qaaletase a xuuma a mataafoseti tooytino a kalataysame!”

⁸ A wessen akke ka dakaye, ana Yohaannisi. Eten wessen dakaye ka akkeeyye, erkampattootase ana wessen akkisse sakatatta'en loqqaadi kela pi'e;

⁹ erkampattootase xoori i'ana kiite, “Diishe sede in kodan. Anti ke ka hellasene xaayshin a kiristaana xuumampaya olli ka orra a qaaleta mataafoseti koono olli an orxaytaay Waaqa sakatado.”

¹⁰ Ka kammadesa ana kiite, “Etasene qoota dehaaden malla qaaleta xuuma a mataafoseti kobbeetan in dufan;

¹¹ arepadesa tiyyoolayta a tiyyaadi kammaaw caado; nyalampayta a nyalo; hanqeellayta a hanqeellaawo; qulqullitta a qulqullaawo.

¹² Tin anti jarjartaannen deeni. Ka rapoota an nama piisa akka kodaadi mina daasho are isqudaayye qapa.

¹³ Anti an alfa ka oomeka, a tura ka a kamma, a paayyota ka a piraampira.

¹⁴ Qoyrase a caatta qudaayye dalta dama'e, xarradaadippan katamasene karopa kulla'e, akka mapteeta qapnaadane'e, orra a mehaddaasso diipade, a eeppisame.

¹⁵ A kutta mina pakkaloode ka kodkodampaya ka sharmuutta ka a nama ikanna ka a killanna kodanna ka a darta jaalanna ka pora darta koona, katamaseneti laka tula caan.

¹⁶ Anti Yesuusi akka maakkumoose ishina daasso'en erkampattootiyyo tikka kiristaana opa erke. Anti an meera ka sanynyeeta Taawwiti ka an hikkitta para mina a la'ayno.”

¹⁷ Hapurase a Qulqulloota isho enentase hemammitto ikiini, “Xooye!” a dakayno nefo, akido “Xooye!” a deepoode a de'o; nama heeno, a pisha caatta kaaja takkan nefo mali patta iko.

¹⁸ Tin anti, nama a qaaletose a xuuma mataafoose kara taafamte dakayno piisa'en tura desa lelli; nama oton qaalese qara'e we takkan padaawaayye, erkannawwa a mataafose kara taafame'e Waaqa isha qara padaawa;

¹⁹ nama oton qaalewwa a mataafoose a xuuma oppa taafame qaraayye we takkan qajishaayye, dalta qoyrase a caatta isho katamasene qulqullaawe, mataafose qara lelame oppaayye Waaqa qoottotaadi qajisha.

²⁰ A wessen maakkummo ikiini, “Anti dukaatannen jarjartan de'a.” Ameen, Poqalla Yesuusi, xooye!

²¹ Daassata a Poqalla Yesuusi, a ishin piisa olli caatto. Ameen!