Keleshaata 21 - Mataafa Qulqulloota

Moonta haraya isho piita haraya

¹ Sekkammaayye anka moonta haraya isho piita haraya akke. Maana malla moonta paayyota isho piita paayyota itarpeneey. Umma arepa desa pakateeta in caatto.

² Katamasene qulqullaawe Yurusaalamise haraya, akkima enenta hemammitto a diirtaadi tura siratte mina'e, harmisatte ka moonte Waaqa kapaayye lekkanni, anka akke.

³ Anka nessa kuttayta a sufaana qara desa kiino, “Tin tika a kara Waaqa kalo orroppa kitta. Waaqa orra olli kallaada ishootta ka orraadi koddan. Waaqa ka mattaadi ishootta olli caada ka Waaqaaysho kodda.” dakaye;

⁴ ka ilmaama piisa ildaappaayye ishootta haqa. Taanteta xatta qoota tarpite malla, toota taaki nyarrahata taaki pooyta taaki surumtan payyaha arepa desa in caadan.

⁵ Isase sufaana qara kute'e ikide, “Tin anti we piisan haaraya koda.” Ka kammaddesa ana kideewwe, “Qaalese a amanamte ka dukaataay, taafe.”

⁶ Sekkammaayye i'ana kide, “Idikkatte; anti an alfa ka oomeka, a paayyota ka a piraampira. A deepode'e, anti ela pisha caatta oppaayyen kaaja takkan nefo maliiyyi patta ishi daasha.

⁷ Nama puto, sede lehada: anti Waaqaadin kodda, isha ka innaayyo kodda.

⁸ Ma xoori, fuurampaya ka a amanteeta in qapnini ka a nyale ka a nama ikanna ka sharmuutta ka a kodkodda kodanna ka a killanna kodanna ka dartampaya piisa, qeraytaaysho pakateetase a apitta. Isase a daka apitta oppa opayno oppa kodda. Sede nefo tootase a lammatta.”

Yursaalamise haraya

⁹ Erkampattowwasene tappa isasene kuppaayya tappa a erkannawwasene a piraampira tappaan immakaade qapade oppaayye, takka ka deete ka ana kiite, “Xooye ka enentase hemamitto, iskatteetase a laahaseti'in ke akkishaay.”

¹⁰ Ka hapuran irroota takka kutta ka dera qaropa anan ante ka Yursaalami katamasene qulqullaawe a moonteeyye Waaqa kapa lekkanna ana akkisse.

¹¹ Isheetta nefo ulfeena Waaqatinni la'ayni, la'aytaadi nefo, akkima furootase a iyyaspiidi dakase akata heraan kokkoka ka a kaawwata mina la'ayno mina.

¹² Ka oxinta kawwatta a kutta ka dera a xarrada kudanka lakki qapto qapta. Xarradasene kudanka lakki oppa'e, erkampattowwa kudanka lakki ka qaqqa'aden ka tooytini. Xarradasene tura'e, maxxada a kaffasene a Isira'eeli kudanka lakki ka taafamen.

¹³ Qinda piirtotatin, xarrada sessa qinda qutatinni, xarrada sessa, qinda tupattatinni, xarrada sessa, qinda dumaatetatinni, xarrada sessa ka caan.

¹⁴ Oxinta kawwatta katamaseneti, kiriyya kudanka lakki qapta. Maxxada kudanka lakki a erkamampaya a laahaseti ka qara taafamen.

¹⁵ Erkampattootase ana haasawwatte, uleeta warqeeta a katamasene ka xarradaadi isho oxinta kawwattaaditin ekkaysatto, qapta.

¹⁶ Katamaasene derumaasso isho paldumaasso olmina'ew caan. Ka olliiw pahan, qindaddaasso afuri piisa olimina'ew caan. Erkampattootase ka uleetase a paatan ekkaysattaatinni, katamasene ekkaysatte. Derumaasso ka kiilomeetireeta kuma lakki ka dippa afuri mina caan. Paldumaasso ka derumaasso a moontandela isho a piitandesa ka asseew caan.

¹⁷ Erkampattootase ka oxinta kawwattaseti ekkaysatteew. Ikka waasene ishin ekkaysannaane upnaatame a erkampattoota ishin ekkaysatteetin metireeta kunda tappa lakki mina kitta.

¹⁸ Kawwattase daka iyyaspiiditinni dawamte; katamasene mattaayshoti warqeeta paxaara ka a kaawwata mina la'aynitton qupamen.

¹⁹ Kiriyya a oxinta kawwatta katamaseneti, dakadda a heraan kokkoka ika lekaytanne siramen. Kiritta paayyota iyyaaspiidi, a lammatta sanperi, a sessatta kelqedooni, a afratta marekiidi,

²⁰ a kenatta serdoniksi, a lehatta serdiyooni, a tappatta kiristiiloope, a settatta pirelle, a saklatta warwurre, a kundatta kirisbiraasiisi, a kudanka takkatta yaakinti, a kudanka lammatta ameteestinoosi.

²¹ Xarradasene kudanka lakki, furowwa kudanka lakki. Xarrada matta mina'e furoota takkoppa kodamen. Porra katamaseneti, warqeeta paxaara a kaawwata mina a la'ayta karan akkaanno oppa kodamen.

²² Waaqa Poqalla isase we piisa ettaninno isho laahase qoota tikaadi a qulqulloota kodden malla, katamasene kara'e tika qulqulloota an akkine.

²³ Qoota ulfeena Waaqa isheetta la'anno laahase ka ipsaadi kodde malla, katamasene akka piirtota taaki leya ishootta la'aysho ishootta parpaaccisni in kitto.

²⁴ Lekna la'aytaadippa pora aana. Nuqussa piita ka ulfeenaaysho isheettoppopan de'an.

²⁵ Katamoosen karaayye qoota halkeetta in kinnin malla, xarradaasso kuyyaata takka nefo dufammi in caan.

²⁶ Kuttuma isho ulfeena mankistewwa lekna isheetta karopa kalan.

²⁷ Wa jippame takkan nefo isheetta karopa in kullan, umma nama nyala koono ka darada haasawanno pakkanna isheetta karopa in kullo. A isheetta karopa kulla, orra a maxxadaasso maskapase a caatta a laahaseti kara taafame patta.