Keleshaata 20 - Mataafa Qulqulloota

Mankisteeta para kuma

¹ Sekkammaayye, a erkampattoota fura hiwwalaalla isho sansalaata a kutta harkoppa qapatte ka moonte xata lekkannitton akke.

² Ikka pofase qapte ka para kuma isha hiite. Pofase nefo, maakase a xatta isase taapiloosi taaki seetana kidammo.

³ Haka parase kuma dikkanno kara'e, pofase akka samayta kamma dapo akka in koonini'i, erkampattootase hiwwalaalla karopa isha katte ka tura dufte. Ka qara kobbeeta toommite. Sekkammaayye eta shakkaya kara furama isha parpaaccisni.

⁴ Sekkammaayye suufaanaddan akke suufaanaddasene qara'ew orra akka faratane'e hupna ukkumeeta ishootta daasame ka kukkuti'e anka akke. Anka napseewwa a oorra qoota Yesuusi desa maakkuma malla ka qoota qaaleta Waaqa malla mattadaasso qara quuramene akke. Ishootta orra pinantase isho waakkaadi in sakatannin ka milikkitaadi fuulaaysho isho harkaasso quda in kodannini. Ishootta tootoppa xa'en ka Kiristoosi olliiyyi para kuma nuqusumen.

⁵ Orra a le'e a ata hase xoori, haka parose kuma dikkanno kara'e, tootoppa in xaane. Sede nefo tootoppa xaana a paayyota.

⁶ Orra tootoppa xaanoosen a paayyota oppa qoottado, qulqullowwa ka kalataysamen. Umma toota lammatta ishootta qaraayye hupna ukkumeeta in qapto. Ishootta qeesewwa a Waaqa isho a Kiristoosi koddan ka Kiristoosi olliiyyi para kuma nuqusuman.

Seetana akkima putame

⁷ Oto parase kuma dikkado kammaayye, seetana hidaappa furama.

⁸ Ka akka lekna piita qara kalo kooki isho maakooki akka kamma dapane kodo'e ka oranna ollopa ishootta xaasado sooka. Lekumaasso nefo hinkaajjeta daka kela mina.

⁹ Ishootta, piita piisa qara'e pasen ka safarase a qulqullowwa isho katamasene jaalatame kapa muren. Ma xoori apitta moonte lekkade ka ishootta kupe ka pire.

¹⁰ Taapiloosi, isase akka kamma dapane ishootta kode, pakateetase a apitta a daka apitta oppa opayno, isase pinantase isho xuumampaytase a darta kara caan karopa katame. Ikka eeyye kara halkeetta ka kuyaata, paraparaayye haka paraparati miidama quda tawan.

Firteeta piraampira

¹¹ Sekkammaayye anka sufaana kutta a ata ka a sufaanase qara kute'e akke; piita isho moonta ka isha turaayye qahen. Umma pora ishootta in teyanne.

¹² Anka orra le'e a kukutta isho a shashakka a sufaanase tura qa'ade akke. Mataaffa ka panamen. Mataafa a pila a mataafa caatta kodde ka panameew. Orra le'e ka kodase xaaysho mataaffasene kara taafame ka teyade kapa'e, firteetaaysho akkaden.

¹³ Pakateeta ka orra le'e a isheetta kara co daasse. Toota isho si'ooli ka orra le'e a ishootta kara co daashen. Nama ka matta mina'e akka kodaadi mina firteeta akkade.

¹⁴ Toota isho si'ooli ka pakateeta apitta karopa katamen. Pakateetose a apitta nefo, toota lammatta.

¹⁵ Nama a maxxaadi maskapa caatta kara in taafammin ka kara in teyannin piisa ka pakateetase a apitta karopa katame.