Keleshaata 2 - Mataafa Qulqulloota

(1) Erkana tika kiristaana a Efesooniti erkame

¹ Erkampattoota a tikase a kiristaana Efesooniti' taafe ka kide: “Sede isase hikka tappa harkaadi a akkitta oppa' qapade ka otanta meehase' qara ipsa xaaynaan a warqeeta tappa karadesa tittiitaawno kapa lelamte;

² kodaayti ka kokkonsattaayti isho duupattaayti in upa. Ka akkima ukkuttowwa kela duupatta a ettaninni a kinnin ka a erkamampayaayyo in koddinin mali ‘An erkamampaya Yesuusi’ issi' kiina kara qorte ka akkima darampaya kodden qara' kayte in upa.

³ Duupattaan japaattaayti ka a' paknin mali maxxiyyo malla rakkoota teyyattaayti in upa.

⁴ Ma xoori, waan ke qara' puyanna, takkanen qapa: sede nefo jaalalasene' xaayti a xatta alle'e' diisse.

⁵ Pora kutta a atta co qara akkima pi'ite matte oorsado. Ka juppootaaytippa oore ka kodaayti a' paayyota' koonitto kode. Oton xoori sede pisa a' kooni a kinniniiyyi ke kapopan de'a. Oton juppootaaytippa a oorriniiyyi meehaayti a qara ipsa xaaynaanen poraadippa maysha.

⁶ Ma xoori, wa minan kalataysamta takkane ca, sede nefo, kodase a Niqolaata an anti needdanno, inneeddatte.

⁷ Wa hapura tikka kiristaanati' kiina nama a napahata dakaynitto qapo a dakayo. Nama pute, akka dalta qoyra caatta a Kennete a Waaqa kara kitto damo'en ihsi' daasha.”

(2) Erkana a tika kiristaana Semirineesiti erkame

⁸ Erkampattoota a tikase a kiristaana Semirineesiti' taafe ka kide: “Sede isase a paayyota ka a piraampira kodde ka turan to'e ka caattampayta kodde kapa lelamte;

⁹ rakkootaayti ka teekumaayti in upa. A koddito ma a' teyantoolayta. A Yihutaata in koddinin mali a issi' kiina'e an Yihutaata ka parka seetana' kodde, akka' maxxaayti pashshen in upa.

¹⁰ Rakkoota a itturopa ke qara' kayto in fuuran. Tin akka ekkaysamtane'e taaploosi ishin oppa orra demo tika hida' karopa kalsha; akka kuyyaata kudani rakkoota teyyattan. Haka tootati a amaname kodde, xalaala caatta'en ke' daashaay.

¹¹ Wa hapura tikka kiristaanati' kiina nama a napahata dakaynitto qapo a dakayo! Nama puto, toota lammattatinni in miidamo.”

(3) Erkana a tika kiristaana Perkamooniti erkame

¹² Erkampattoota a tikase kiristaana a Perkamooniti' taafe ka kide, Sede isase koraateta paka lakkin qarta qapto qapade kapa lelamte.

¹³ Atti akkima pora a oppa suufaana seetana co oppa kalto in upa. A koddito ma maxxiyyo ikokkonnaysatte ka qapatte, umma amanteeta a ana qara qapto a' marmanne, maakkittase xayyo amaname Antipaasi ete katamasene' xaayshin a kara seetana kala kara ishshame nefooyye, ana amaneeta a' diinne.

¹⁴ Ma xoori, we takkan takkan an ke qara' puyanna'en qapa. Sede nefo, orra kollissa Pele'aami qapade takka takka otantaayshin oppa ca. Pele'aamise nefo akka samayta Isira'eeli damta killanna kalsamte dameetanne ka sharmuutuman, kehaysado'e isha Palaaqi dehaame.

¹⁵ Akkimoose' mina'ew, orra kollissa Niqolaata' qapade otantaayshin oppa caaw.

¹⁶ Semmalla juppootaaytippa oore, a taakkiti irra qaran ke kapopa de'a ka qaaletase afaayyoppa sooknitto koraateta pahatonne ishootta torpa.

¹⁷ Wa hapura tikka kiristaanati' kiina, nama napahata dakaynitto qapo, a dakayo! Nama puto'e, mennasene' juutame' qudaayyen ishi' daasha. Ka daka ata, a qara maxxa haaraya taafame ishi' daasha, umma nama teyyado maliiyyi, nama pila takka nefo in upnaado.”

(4) Erkana a tika kiristaana Tiyatirooniti erkame

¹⁸ Erkampattoota a tikase a kiristaana a Tiyatirooniti' taafe ka kide: “Sede innasene a Waaqa, ilda opaya apitta paha qapa, loqqaadi ka sipla a porooda apitta oppa' pale pahane qapa kapa lelamte.

¹⁹ Kodaayti ka jaalalaatti ka amanteetaayti ka orxumaayti isho duupattaan japaattaayti in upa. Akkima kodaayti a kamma desa, a paayyota qara jaallo nefo in upa.

²⁰ Ma xoori waan ke qara' puyanna takkanen qapa. Sede nefo Elsaapeeli iskatteetase ‘An xuumampayteeta’ issi kiinitto, ittuffatte ka kela duupatte isheetta akka orxayaayyo sharmuutuman ka damta killana kalisoota kalte damane ishootta kollisse ka akka kamma dpane' koote;

²¹ akka juppootaadippa oorto'e, eta in isheetta' daashe. Isheetta xoori sharmuutumaadippa ooreeta in heennaanne.

²² Semmalla anti looshsha a payyaha qara'en isheetta kata. Orra kodase' neeqa isheetta olli kode oton oppaayye in tiitaawniniiyyi a isheetta dahale' piisa, qara'en miiddota kutta' qeeda.

²³ Hellaadi tootannen qatta'a. Tikka kiristaana' piisa ka a dikatta isho xajeelta nama kara qorro akkima ana koddite upnaadan. Anka mattaayshin mina'e, akka kodaayshina' mina ishina' daasha.

²⁴ Ishina Tiyatirooni kara ca ka kollissoose neeqa in teyyannini piisaayye ka ishina wossen a orra demo kiina'e “Juuttota seetana a kara seka” kamma in anninitiiyyi anti haadeta pila ishin qara an fee'o.

²⁵ Ma xoori hakan deeno kara'e wa' qaptane kokkonnaysada ka qapada.

²⁶ Nama puto ka haka piraampirati kodiyyo qara' japaanno'e orra Yihutaata in koddinin qara'en ishi' hupna ukkumeeta' daasha.

²⁷ Ikka uleeta siplatin ishootta muksha. Ka a okkotowwa' mina ishootta mammaaja ka daamma' koda. Hupnoose a ukkumeeta' nefo, isase an anti aappinno qara teyyade pahanaada.

²⁸ Anka hikkittase a para mina ishi' daasha.

²⁹ Wa a hapura tikka kiristaanati' kiina nama napahata dakaynitto qapo, a dakayo!”