Keleshaata 19 - Mataafa Qulqulloota

¹ Sekkammaayye, nessa kuttayta a samayta kutta pahon moonte dakaye ikka kiini, “Haalleluuyya! Dinissa ka ulfeena isho hupna, a Waaqinnoti!

² Firteetaadi nefo dukaata ka hanqeeta; sharmuutitteetase kutta, sharmuutumaadin piita nyalisse, firteetanne qatta'e ka isheetta qatta'anne diika orxayaadi malla, isheetta qara haalota pooyye.”

³ Ka lammatta nessa kuttan kideneewwe, “Haalleluuyya! Qayya isheetta kara xaano a paraparaayye haka paraparati'i opeela xaana tupa tawa!”

⁴ Qimayaasene kunda lakki afuri isho uumatase catta qapo afuri ka itturandesa seehen ka Waaqase sufaana qara kute'e sakataden ka kidene, “Ameen, haalleluuyya!”

Sankulta a sarkeeta laahaseti

⁵ Sekkammaayye nessa suufaanase qaraayye dakaade ka kiini, “Ishina isha fuurra orxayaadiiyyi, a shashakka ka a kukutta piisaayye, Waaqinno kalataysada!”

⁶ Nessa samayta kutta ka nessa fotota a pisha isho nessa a xirara kokkoka paho ka kiini, “Haalleluuyya Waaqa Poqallaanno, isase we piisa ettaninno, inuqusume! Anka dakaye.

⁷ Qoota sarkeeta laahaseti kayte malla, enenta a hemino nefo ka harmisatte malla, xooya xasoonna ka a kuttati xasoonna! Ka isha ulfeessina!

⁸ Akka kalsatto'e, mehadda a xaynaata qora talpa oppa dawame ka pippildaawna a jureeta in qapnin ka paxaara ka ishi daasamen.” mehaddoosen a sira a xaynaata qora talpa oppa dawame nefo, kodase a qulqullowwa a hanqeelluma

⁹ sekkammaayye erkampattootase ka ana kiite, “Taafe ka kide, a sankulta sarkeeta laahaseti oppopa halaame, a eeppisame!” Ka kammadesa kiiteewwe, “Ini qaaleta dukaata a Waaqa.”

¹⁰ Anti ka erakampattooseti sakatatta'e, loqqaadi kela pi'e ka fuula piitan kaye; isheetta xoori, i'ana kiite, “Diishe asse in kodan! Ha anti ke isho hellasene xaayshin a kiristaana maakkuma Yesuusi qapade olliiyyiiwwin an orxayteetaay! Waaqa sakatado maakkuma Yesuusi, hapurase a xuuma'ey.”

Isase farta ata qara kute'e ka qara anno

¹¹ Sekkammaayye moonta panamten akke ka tin farta ata akkeew; a fartase qara kute'e “Isase amaname ka dukaallayta” kidammo isha hanqeetanne faranni ka torpini.

¹² Ildaadi opaya apitta'e pahan. Mattaadi qaraayye, kullewwa nuqusa lekaya ka caan. Ka maxxa a isha quda taafame a isha maliiyyi nama takka nefo in upnin ka ca.

¹³ Isha a ohaata diikan lahamte uwwisade. Maxxaadi nefo “Qaaleta Waaqa'e” kidammi.

¹⁴ Xela oranna a moonta a ohawwa a''ata a xaynaata qora talpa oppa dawame a jureeta in qapnini ka papaxxaara uwwisade ka fartada a'ata qara kute'e ka isha kamma qatte ka isha kamma anni.

¹⁵ Koraateeta qaarta qapto a ishin leknada qido ka afaappa ishi sookni. Isha uleeta siplatinni ishootta ukkuma isha porase kara taadeta wayneeta diipnaan isase miirase orra fuurinno a Waaqase we piisa ettaninno akkinno'e diita.

¹⁶ Ohaataadi isho kupeettaadi quda'e maxxa a kiino, “Nuqusa nuqussa ka Poqla poqalladda'e” taafame.

¹⁷ Sekkammaayye anka erkampattoota takka piirtota qara qa'atte akke. Ikka xampira moonta quda hirraati nessa kuttan kiite “Sankultase kutta a Waaqa oppopa ollopa xooya.

¹⁸ Xooya so'a nuqussa ka a ajajampaya a xela oranna ka so'a a xormeeta oranna ka so'a a fartada isho a xela fartan torpinooti ka so'a a poqalladda ka a karpishshadda ka a karpashsha in koddininiti isho so'a a orra a shashakka isho a kukuttaati ka so'a a nama piisati dama!”

¹⁹ Anka pinantase ka nuqussa piita isho xelaaysho a oranna isase farta ata qara kute'e isho xelaadi a oranna torpeeta ollopa xore akke.

²⁰ Ma xoori pinantase iqapamte; isheetta quda'ew xuumampaytase a darta turan fuulaadi tura wa orra qawwanna lekaya koono ka qapameew. Isha wossen orra qawwanna a koonaatin orra milikkitase a pinantaseti teyyade ka waakkasene a pinantasetiti sakatanno akka kamma dapo kooni, ishootta lakki pakateetase a'apitta daka apittatin opaynitto oppopa akka caanen katamen.

²¹ A kela hase ka koraateta afa a isase farta ata qara kute'e oppa sookten leysamen. Xampira piisa ka so'asso dameetan duduttanen.