Keleshaata 18 - Mataafa Qulqulloota

Pi'itta a Paapilooni

¹ Sekkammayye anka erkampattoota pila a hupna ukkumeeta a kutta qapto a moonte lekkannitto akke. Pippildaawa ulfeenaadi qaran xaate'e piita ka la'ayte.

² Ikka nessa a kuttan ullupte ka kiite, “Paapiloonise kutta ipi'ite! Ipiite! Ka pora oppaayye orriyya kalan koddite; ka pora oppa hapura nyale piisa ka xampira nyale piisa ka pinaana nyale ka jippame piisa qaa'inaan koddite.

³ Taadetase xaadi a wayneeta a sharmuutumaadi orra maashshannitto lekna piisa ikisse, nuqussa piita ka isheetta olli sharmuutumen. Nakkaatewwa piita ka kallaataadi a akata ettante qaran xaate'e teyantoodene.”

⁴ Anka nessa pila a moonte xata kiino, “Samaytiyyooyye! Akka juppootaadippa a qoottannini'i, erkannaata a isheeta qara kaynitto ka ishin qara in kaynini'i, isheetta kara alle sooka!

⁵ Tuula a juppootaadi moonta kayen, Waaqa ka dapaadi matte oorsade.

⁶ Akka daasse kapa'e isheetta daasha, ka kodaadi a koote kapa harka lakki ishi oorsha. Ka kuppaayyasene a oppa ikkayta ika lekayta lahate oppa'e ikayta a kokkoka a harka lakki ishi laha.

⁷ Akka isheetta issi'i ulfeena isho ettana daasse kapa'e nyooreta isho nyarrahata ishi daasha; isheetta issi karanxata ijeejjaanni ka kiini, anti an nuqusitteeta mina'en kuti'e umma an hiyyeettetan; umma pakkanna nyarrahata ana qara in kayo.’

⁸ Semmalla, erkannawwaadi piisa kuyyaata takka opa'ew isheetta qara kayan; toota ka nyarrahata isho doxa ka isheetta qara kayan, ikka apittan kupatta. Maana malla Waaqa Poqalla a ishetta qara farato, hupnampaytaay.”

⁹ Nuqussa a piita a isheetta olli sharmuutume ka naalaan kallaade, oto kupannittooyye ikka qayya a xaano akkaneeyye, isheetta malla ullupan ka pooyan.

¹⁰ Ka surumtaadi fuuran ka laka qa'adan ka kidane, “Atti katama kuttaatiiyyi, atti katama kokkoka Paapilooni firteetaayti saateta takka oppa'e ke qara kayteey; oo ke kido! Oo ke kido!”

¹¹ Nakkaatewwa piita arepadesa qoota nama fe'isa markapaayshoti piddado in caannin malla, isheetta pooyan ka isheetta nyarrahan.

¹² Wa a markapaaysho kara fe'ame warqeeta ka dakara pirreeta ka daka a heraan kokkoka ka furoota; ka ohaata a qaaha a xaynaata qora talpa oppa dawamte ka ohaata a tiima ka ishin moonta pahato ka ohaata paxaara ka ohaata a tiima ka qoyra alaawno piisa; ka meeha hirta arpa ka qoyra a heraan kokkoka ka sipla poora ka sipla isho meeha a daka heraan kokkoka oppa kodame piisa.

¹³ Ka qora shittoota ka qimaameeta ka tankarta ka shittoota a karpi kiinaan ka tankarta ata ka taadeta wayneeta ka sayteeta ekerta ka daamma paxaara ka kappa ka lo'alla ka kaharra ka fartada ka sarakelladda ka karpishshadda isho orra pila;

¹⁴ nakkaatewwasene ka ishi kidene, “Waasene paxaara a xajeelte piisa ikekapa sekaaden, teyantaayti isho ulfeenase xaayti piisa ka paten, umma arepa desa pakkanna ishootta a akkaatto.”

¹⁵ Nakkaatewwasene sene piisa isheetta olli nakatanna ka ishin teyantoode, nyooretaadi fuuran ka laka desa qa'adan; ka pooyta ka nyarrahatan

¹⁶ kidane, “Katamasene kutta ohaata qaaha a xaynaata qora talpa oppa dawamte isho mehadda a tiima ka ishin awla uwwisanna ka warqeeta isho jiriwwaanna ka furowwa siranna oo ishootta kido! Oo ishootta kido!

¹⁷ Teyaanta asse kitto saateta takka oppa patte.” Ajajampaya markapa piisa ka orra kara anno piisa ka a kara koda koona piisa isho a pakateeta qara nakatanna piisa, laka desa qa'adan,

¹⁸ ka ete isheetta kupannittooyye ikka qayya a kara xaano akkeneeyye, i'ullupen ka kidene, “Katama asse kutta, i'apari caadene?”

¹⁹ Ka isi qaropa kuyyaalayta pulen ka pooyta ka nyarrahatan ullupen ka kiini, “Katamasene kutta a orra pakateeta qara markapadda qapo piisa akka teyantaadin teyantoodo kode saateta takka oppa'ew pateneey Oo ishootta kido! Oo ishootta kido!”

²⁰ Moontaayti, isheettan xasoodo! Ishina qulqullowwaayye ka erkamampayaayye ka xuumampayaayye, qoota Waaqa ishin malla ishootta qara farate malla xasooda!

²¹ Sekkammaayye erkampattoota takka kokkoka ka daka takka daka yomatta a kutta mina co qeette ka pakateeta karopa shuulite ka kiite, “Katamasene kutta a Paapilooni tooy, asse hupnan shuulaman ka patan. Umma arepadesa in teyadan.

²² Umma nessa a orra kehayta dawannooti ka a palpalaya ka a luuttota isho turumpa dawannooti, lammatta ke kara in dakaado. Umma harmitta a paata koono, arepa desa ke kara in caado. Umma nessa yomatta arepa desa ke karaayye in dakaado.

²³ Umma la'ayta ipsa arepa desa ke karaayye in la'ayo. Umma arepa desa nessa inna heme isho a enenta hemamte, ke karaayye in dakaado. Maana malla turan nakkaatewwaatti piitoppaayye orra kukutta; atti ka tipaaytin akka lekna piisa kamma dapo koote.

²⁴ Diika a xuumampaya isho a qulqullowwa ka a orra piita qara leysame piisa isheetta kara teyade.”