Keleshaata 17 - Mataafa Qulqulloota

Dahalmayteetase a iskatteeta kutta

¹ Erkampattowwasene tappa kuppaayya tappa qapade oppaayye takka ka ana kapopa deete ka ana kiite, “Xooye! firteeta a dahalmayteetase kutta pishadda leka qara kutiite qara kayton ke akkishaay.

² Nuqussa piita isheetta dahalen. Orra piita qara kalo ka taadeta wayneeta a dahalmayteetoosetin maashshoode.”

³ Sekkammayye, erkampattootase ka hapuran koommaytoppopa ana qeette, anka iskatteeta takka pinanta a tiima a maxxada otitta dakintaadi piisa quda taafamen ikka mattada tappa ka kaassa kudan qapto qara kutiite akke.

⁴ Iskatteetase mehadda a tiima ka ishin awla kalsatte ka warqewwa ka jiriwwaanna isho furowwa siratte. Ka harkaadippa'e kuppaayya warqeeta, a wa jippame isho a nyala dahalsattaadi oppa immakaadene qapatte.

⁵ Fuulaadippaayye maxxa juutota a kiino “Paapilooni a kutta aayya opa sharmuutta isho a nyala piita.” ka taafame.

⁶ Anka isheeta diika qulqullowwa isho diika a orra qoota Yesuusi malla maakkumen maashshootte akke. Eten akkeeyye, anka akata oppa qawwaawe.

⁷ Erkampattootase xoori i'ana kiite, “Maana malla oppa qawwaawni? Juuttota a iskatteeseti isho juutota pinantase mattada tappa isho kaasa kudan qapto a isheetta qara kutiite'en ke la'aysha.

⁸ Pinantose a akkite, xatta turan ikitta, ma amma in kitto. Ma kuli hiwwalaalla kara sookta ka pateetaadipa anta. A piita uumammitto paayyatte, orra a maxxadaasso maskapa caatta kara in taafammini; orra a piita qara kalo piisa akkima pinantose xatta kitto ka amma in kinnin ka kuli deeto akkaneeyye, oppa'e qawwaawan.

⁹ Matta a ookuma qapo, seppaayye parpaaccisni. mattadosen tappa, irrowwasene tappa a iskatteetase qara qaa'ite.

¹⁰ Ka nuqussasene tappa. Ken ipi'en ma amma takka ca; a pila ata in deene isha ka oto de'oyye, shakkayteeta patta jara isha faani.

¹¹ Pinantase xatta kitto ka amma in kinnin, pinanta a settatta; isheetta nefo tappa oppaayye takka. Ka pateettopa anni.

¹² Kaassasene kudan a akkite, ishootta nuqussa kudani a amma ata in nuqusummini. Ma xoori akka saateta takka kara pinantase olli nuqusumane'e hupna ukkumeeta akkadan;

¹³ nuqussosen kudani dikatta takka qapan. Ishootta hupnaaysho isho hupnaaysho a ukkumeeta'e pinantasi opa daashan.

¹⁴ Ishootta laahase qara'e oranna qishshan. Ma xoori laahose qoota Poqla poqalladda ka Nuqusa nuqussa kodde malla, i'ishootta puta. Orra isha olli co a halaame ka reexame ka amaname.”

¹⁵ Erkampattootase ka ana kiite, “Pishaddaasene a sharmuutitteetase qara kutiite akka akkite, samayta ka orra ka lekna isho orra afa ika lekayta haasawanno.

¹⁶ Pinantase isho kaassasene kudani a akkite, sharmuutitteetase'e needdadan. Ka pateetta qaran isheetta kayan ka lulle isheetta hattishan ka so'adi daman ka apittan isheetta kupan.

¹⁷ Akka kodaadi a qapade dikkishane'e a dikattoose karittaaysho kara xaaye Waaqa. Semmalla, haka qaaleta Waaqa dikkannitto kara'e, ishootta dikatta takka qara'e olli kalan; ka hupnaaysho a ukkumeeta a nuqusuma pinantaseti kalshan.

¹⁸ Iskatteetose a akkite katamasene kutta nuqussa piita qara nuqusuma.”