Keleshaata 16 - Mataafa Qulqulloota

Kuppaayyaddasene miira Waaqa qapade

¹ Sekkammaayye anka nessa kutta a tikase a qulqulloota karadesa erkampattowwasene tappa kiino, “Aana ka kuppaayyaddasene tappa a miira Waaqa piita qaropa tuqa!” dakaye.

² Erkampattoota a paayyota ka ante ka kuppaayyaadi piita qaropa tuqte. Orra milikkita pinantaseti qapo ka pahanaadi sakatanno quda'e, fayka neeqa ka suraawna ka doddo'en.

³ Erkampattoota lammatta ka kuppaayyaadi pakateeta karopa tuqteew. Pakateetase ka diika a nama to'e pahanaatte. Wa pakateeta kara kala a nessa qapa piisa ka piramen.

⁴ Erkampattoota sessatta ka kuppaayyaadi kirrada isho ella pisha qara tuqteew. Ikka diika kodden.

⁵ Anka erkampattoota a pisha qara hupna ukkumeeta qapto a kiinitto, “Qulqullitto, Poqallaay ke a amma co ka xatta co, qoota asse faratte malla, atti a hanqeelitta.

⁶ Orra qoota diika qulqullowwa isho a xuumampaya tuqe malla, atti diika kapa ishootta ikisse. Wa ishootta parpaaccisna sedeey.”

⁷ Porase a kalisootati desaaw anka nessa a kiino, “Aa, Waaqqo Poqlo! Ke a we piisa ettaninno firteewwaatti dukaata ka hanqeeta.” dakaye.

⁸ Erkampattoota afratta ka kuppaayyaadi piirtota qara tuqteew. Akka piirtota xaalaytaadin orra kukkupto'e, hupna ka ishi daasame.

⁹ Orra ka xaalayta kuttan kupade ka maxxa a Waaqase erkannawwosen qara hupna ukkumeeta qapo ote. Umma juppootaaysho oppa in oorre. Ka isha in ulfeessine.

¹⁰ Erkampattoota kenatta'ew, suufaana pinantaseti qara'e kuppaayyaadi tuqte. Mankisteeta pinantaseti ka tukkantaawte. Rakkootaaysho qaran xaate'e, orra ka iskaraayye arrapa alalli.

¹¹ Ka surumtaaysho isho faykaasso qaran xaate'e, Waaqase a moonta jiijen. Umma kodaaysho kammaayye in oorre.

¹² Erkampattoota lehaatta'ew, kirrase kutta a Efratiisi qara'e kuppayyaadi tuqte. Nuqussa qinda piirtotati desa deenaati pora harmissa'e, pisha kirraseti ka ku'en.

¹³ Anka a afa pofaseeti ka a pinantaseti isho a xuumampaytase a darta oppaayye, hapurra a nyale a mokoota pappaha sessa sooknaan akke.

¹⁴ Ishootta hapurra orriyya a wa olsa paha koona. Hapurroosen nyale oranase kuyyaatase kutta a Waaqase we piisa ettaninnotiiyyi koddo'e orra ollopa oorsatta'e nuqussa a piita piisa kapopa aanan.

¹⁵ “Tin anti a kera mina'en a orra isqara in upniniiyyi de'a, nama impaso ka akka lulle in kinnaannini'i, orra ka saalaadi in akkinnini'i, mahaddaadi a kalsanna tooytaanno, a kalataysame.”

¹⁶ Hapurrasene ka porase afa Iprutin Armakedooni kidammo oppopa nuqussasene ollopa xaashen.

¹⁷ Erkampattootase a tappatta'ew xayxaytoppe'e kuppayyaadi tuqte. Suufaanase tika qulqulloota kela co qara desa nessa kuttayta a kiino “Idikkatte.” ka dakaade.

¹⁸ Hankaada ka xirara ka qaqawwa isho lellehayta a piita a kutta ka kodde. Haka nama piita qara uumame paayyatte, lellehayta piita a kutta a asse paho apari in koddine.

¹⁹ Katamasene kutta ka pora sessa qiten. Katamadda a orra Yihutaata in koddinini ka qitqiten. Waaqa ka Paapiloonese kutta matte oorsade; ka akka kuppaayyasene a taadeta wayneeta a miirase xaadi kutta ikkito kode.

²⁰ piitadda pakateeta kara ca piisa ka alle qahen, umma irroowwa nefo in teyanne.

²¹ Apteenta a matta mina kiilota kunda afuri keni mina kikitto ka moonteeyye orra qara roopte. Erkannaatase qoota dikke a orra miiddinitto koddite malla, orra ka erkannatase a apteenta minan Waaqa ote.