Keleshaata 15 - Mataafa Qulqulloota

Erkampattowwa a erkannawwa piraampira qapade

¹ Anka milikkita pila a kutta ka a orra qawwanno moonta akke. Ka erkampattowwa tappa a erkannawwasene tappa a piraampira a miira Waaqa ishin dikkada qapade akke.

² Sekkammaayye wa pakateeta kaawwata pahato paha a apittoppa lahame'en akke. Ka isasene pinantase ka waakkaadi isho milikkita dikoota maxxaadi pute akke. Ikka kehaytase a Waaqa ishootta daashe qapaden ka pakateetase a kaawwata kapa qaqqa'aden.

³ Ka masmuureta Muuse a orxaytase a Waaqa isho masmuureta a laahoseti dawanni ka kiini, “Poqallaay, Waaqqo ke a we piisa ettaninno, kodaayti ikutti ka orra qawwanni. Ke a nuqusa leknada kodde, saantaayti saanta hanqeeta ka a dukaata.

⁴ Poqallaay, ata ayno ke fuurri in kinnin ka maxxaayti ulfeessini in kinnin? Ke pattan qulqullitta. Kodaayti a hanqeeta qoota akkaade malla, lekna piisa de'a ka ke tura sakatada.”

⁵ Sekkammaayye anka tooyyade, tin tikase a qulqulloota tukkana maakkuma koddite ka moonte panamte.

⁶ Erkampattowwasene tappa erkannawwasene tappa qapade ka tikase a qulqulloota kela sooken. Ishootta mehadda a'ata a jureeta in qapnini ka warwarra a xaynaata qora talpa oppa dawame kalsaden. Ka kessoppan desa saalpata warqeeta hiddaden.

⁷ Uumatase caata qapo afuri oppaayye takka ka kuppaayyasene tappa a warqeeta a miira Waaqase paraparaayye haka paraparati kallaanno oppa immakaade erkampattowwasene tappa daashe.

⁸ Tikase a qulqulloota ka ulfeena isho hupna Waaqa qaran xaate'e, qayyan immakaatte. Erkannawwasene tappa a erkampattowwasene tappa qapadene haka dikkannaan kara'e, nama takka nefo ka tikase a qulqulloota kelopa kulla in ettaninnin.