Keleshaata 14 - Mataafa Qulqulloota

Laahase isho namase kuma dippa kunda afuri afuri

¹ Sekkammaayye, tin laahase ka irroota Siyyooni qara qa'ade anka akke. Isha olliiyyi nama kuma dippa kunda afuri afuri a maxxaadi isho maxxa aappaayshoti miintoppa ishootta taafame ka ca.

² Anka nessa moonte xata a fotota pisha a kutta isho nessa a kutta a xirara kutta paho dakaye; nessoose an dakaye nefo, nessa orra kehayta dawno oto kehayta dawnooyye dakaytinno paha.

³ Suufaanase ka uumatase caata qapo afuri isho qimayasene tura'e nama kuma dippa kunda afuri afuri ka masmuureta haraya dawade; umma masmuurese namoose kuma dippa kunda afuri afuri a piita qara furame maliiyyi nama takka nefo sahatta in ettaninne.

⁴ Ishootta qoota issin caan malla iskatta olli mukittaanne in nyalle ka pora a laahase opa anno piisa opa kamma anni. Ishootta Waaqa isho laahaseti'i orroppaayye akka qarpatta mina dehaaden.

⁵ Ishootta apari darta in koone ka in upan, umma qaja in qapan.

Erkampattowwasene sessa a firteeta Waaqa upnaanna

⁶ Sekkammaayye anka erkampattoota pila a otootase a fayya a parapara qapatte ka samayta a piita qara kalo ka kaffa ka a afa ika lekaya haasawanna isho lekna piisa torra'e moontan xa'annitto akke.

⁷ Ka nessa kuttan kiite, “Waaqa fuura ka isha ulfeessa, saateta firteetaadi idesa kayteey. Waaqase moonta isho piita ka pakateeta isho ella pisha uume sakatada!”

⁸ Erkampattoota a lammatta ka isase a paayyota kamma qatte ka kiini, “Paapiloonise kutta, taadetase a wayneeta orra maashshannitto a sharmuutumaadi, leknada piisa ikisse, ipiite! Ipiitee!”

⁹ Erkampattoota pila a sessatta ka ishootta kamma qattew ka nessa kuttan kiite, “A uumatase catta qapo isho waakkaadi sakatanna ka milikkitaadi miintaaysho taaki harkaaysho quda kodanna piisa,

¹⁰ taadetase a wayneeta a miira Waaqa'e ikkan. Taadese a wayneeta nefo, a we oppa in lahammin maliiyyi kuppaayyasene a miira Waaqa oppa kishshamte. Ishootta, fuula erkampattowwa qulqullaawe isho a laahaseti tura'e, apitta isho daka apittatin rakkoota a kutta akkadan.

¹¹ Qayya a apittase ishootta rakkacciiso nefo, paraparaayye haka paraparati'i opeela xa'a. A uumata a catta qapo isho waakkaadi sakatanna ka milikkita a maxxaadi kodade piisa, halkeetta ka kuyyaata'e nessuma in qapan.

¹² Qulqullowwa a ajaja Waaqa tooytina ka Yesuusi amaneetan japaanna, duupattaaysho seppaayye akkaada.

¹³ Anka nessa moonte xata kiino, “Sede taafe dakaye, ‘Arepa desa a Poqalla Yesuusin ca ka leena, a eeppisame!’” Hapura Qulqulloota nefo ikiiniiwwi, “Aa, akka yaalaaysho kela nessadane'e kodaaysho ishootta kamma anna.”

Miira Waaqa piita qara'e de'a

¹⁴ Sekkammaayye anka tooyyade ka tin oraarta ata akke, oraartase qara'e a inna nama paho ka kute'e; ka matta qara xalaala a warqeeta kalsade ka harkoppa maajita a qarta qapo qapade.

¹⁵ Erkampattoota pila ka tika qulqulloota kela sookte ka isase oraarta qara kute'e, nessa kuttan kiite, “Fera piita isho saateta a muja nefo ikayte!”

¹⁶ Isase oraarta qara kute'e ka maajitaadi piita qaropa erke. Piita ka mujamte.

¹⁷ Erkampattoota pila ka tikase a qulqulloota moonte kitto kela sookte ka asseew maajita a qarta qapo qapta.

¹⁸ Erkampattoota pila a apitta qaraayye hupna ukkumeeta qapto ka porase a kalisoota kapa sookte ka erkampattootase maajita a qarta qapo qapto'e, nessa a kuttan kiite, “Dalta a saara qara kitto ipaliteey, maajitaayti a qarta qapo erake ka piita qaraayye dalta wayneeta a saara qara kitto piisa quure ka ollopa oorshe!”

¹⁹ Erkampattootase ka maajitaadi piita qaropa erkite. Ka piita qaraayye dalta wayneeta a saara qara kittoo quurte. Ka porase kara wayneeta diipnaan, a miirase a Waaqa kutta karopa katte.

²⁰ Ikka porase oppa wayneeta diipnaan katamaayye laka tula co oppa diipamen. Porase oppa wayneeta diipnaan oppaayye diika moontandeela lukaama farta kela kaye. Ka piitan desa kiilomeetireeta dippa sessa kaye ka urqe.