Keleshaata 13 - Mataafa Qulqulloota

Pinaanasene lakki

¹ Sekammaayye, a pinanta takka pakateeta kareela sooknon akke. Ikka kaassa kudani ka mattaada tappa qapa, kaassasene xaadi qaraayye, kullewwa nuqusa kudani ka caan. Mattadasene xaadi qaraayyeew, maxxada otitta ka caan.

² Pinantose an akke, qayranta paha; loqqaadi loqqa pinantase tipi kidammo'e pahan; afaadi ka afa karma pahan. Pofase ka pinantaseti'i hupnaadi ka suufaanaadi isho hupna ukkumeeta kuttayta daashe.

³ Mattadasene a pinantaseti oppaayye takka faykitteeta a isha ikasso pahato qapa. Ma xoori, faykitteetase xaadi isha ikasso pahato idinte. Piita piisa ka oppa qawwaawte ka pinantase kamma ante.

⁴ Qoota pinantaseti hupna ukkumeeta daashe malla, orra piisa ka pofaseeti sakatade; ka pinantase kuli sakatade ka kide “Ayno pinantose paha? Ayno ka isha torpa ettansha?”

⁵ Afa ishin isipeepa ka paatan ota ka pinantaseti daasamen, akka leya kunda afuri lakki hupna ukkumeetatin koda kodo'e ikka ishi faqqatamte.

⁶ Ikka Waaqa isho maxxa Waaqa ka poraadi a kallaata isho isasene moonte kala otitta paayye.

⁷ Akka qulqullowwa torpo ka ishootta puto'e, hupna ukkumeeta ka ishi daasame. Kaffa ka samayta ka a afadda ika lekayta haasawanna isho lekna qara'e hupna ukkumeeta ka ishi daasame.

⁸ A piita uumamte paayyatte, orra piita qara kalo a maxxaaysho maskapase a caatta a laahase qalameeti oppa in taafammini piisa ka pinantaseti sakatadan.

⁹ Nama napahata dakaynitto qapo a dakayo!

¹⁰ A poojama kitame ipoojama; a koraatetan ishshama kitame koraatetanne ishshama. Semmalla duupatta isho amanteeta qulqullowwa etoosen oppa parpaaccisni;

¹¹ Anka, pinanta pila a piita kareela sookno akkeew. Ikka a laha mina kaassa lakki qapa ka a pofa mina haasawanni.

¹² Ka pakka a pinantase a paayyota oppa kodde ka hupna ukkumeetatin koda kooni; ka akka piita isho orra piita qara kalo piisa pinantase a paayyotati sakatado kode. Pinantose nfo pinantase a paayyota a faykitteetase isha ikasso ishi dinte.

¹³ Pinantose a lammatta xoori haka fuula orra tura apitta moonte lekkinno'e wa orra qawwanna a kukutta kooni.

¹⁴ Waasene orra qawwanna a pakka pinantase a paayyota oppa akka kodo'e ishi faqqatamte minanne, ikka akka orra piita qara kalo kamma dapo kooni. Ka ulfeena pinantase koraatetan mataawe ka dineeti'i akka waakka kodane'e orra piita qara kalo ajaje.

¹⁵ Pinantase a lammatta akka wakka pinantase a paayyotati nessa caatta daasho'e, hupna ukkumeeta ishi daasame. Wa malla akka nessa caatta daasho'e hupna ukkumeeta ishi daasame nefoow waakkasene akka haasawatta ettanshan a waakkoseneti sakatanni in kinnin piisa ka leysamo koda malla.

¹⁶ Pinantase a lammatta'ew, a shashakka isho a kukutta ka teyantoolaya isho teekolaya ka poqalladda isho karpishshadda isho a karpishshadda in koddinini piisa, akka harkaaysho a akkitta taaki miintaaysho oppa'e milikkita kodadane'e, ishootta kitteesse.

¹⁷ Seden oori, nama a maxxa pinantooseti taaki milikkita a dikoota maxxaadi kodde in qapnin piisa, paata piddatta taaki katatta in ettansho.

¹⁸ Semmalla tooy ookuma eeyye qara'e parpaaccisni. Nama upna qapo, a dikoota pinantoseti kara diko; dikoose nefo, nama mina tooyni dikoose dippa lehi kunda lehi lehi.