Keleshaata 12 - Mataafa Qulqulloota

Iskatteetase isho pofase

¹ Sekkammaayye, milikkita orra qawwanno kuttayta ka moonta quda akkaade. Iskatteeta takka piirtota uwwisatte ka loqqaadi kelaayye leya xaayatte ka hikka kudanka lakki a xalaala mina matta qara kalsatte ka akkaatte.

² Isheetta inna karittoppa qapta ka yetetta xaayatin qapamte. Ka suraysanni ka ullupni.

³ Milikkita a pila ka moonta quda akkaadeew. Pofa a tiima kuttayta a matta tappa ka kaassa kudan qapo ka akkaade ka mattadasene xaadi qara'e, kullewwa nuqusa tappa kalsade.

⁴ Ka ektaadin hikkasene qudaayye harka sessaappa takka moonte tite ka piitopa ishootta tuqe. Pofase oto iskatteese xaaytooyye qoota innaadi loqa dikade malla, iskatteese xaaya foolsatte tura'e qa'ade.

⁵ Iskatteese ka inna diirta a leknada piisa uleeta siplatin ukkumo xaayte. Innasene ka Waaqa isho sufaaneta Waaqa kapopa qeedamen.

⁶ Iskatteetase ka koommaytoppa pora oppa kuyyaata kuma ka dippa lakki kunda lehi tura tooyamto a Waaqa ishi harmishe oppopa qahate.

⁷ Oranna ka moonta qiten. Mika'eeli isho erkampattowwaadi ka pofase torpen. pofase isho erkampattowwaadi ka mina torpeneew.

⁸ Ma xoori pofase isho erkampattowwaadi iputamen. Umma se kulipaata, moonte pora ishootta'en teyanne.

⁹ Pofase kutta ka kumpaappe katame. Isha nefo maakaase a xatta, isase taapiloosi taaki seetana kidammo ka halaammo ka akka piita piisa kamma dapto koono. Isha piita qaropa katame. Erkampattowwaadi ka isha olliiw katamen.

¹⁰ Sekkammaayye, nessa takka kutta ka moonte xata kiini, “Tin dinissa ka hupna isho mankisteeta a Waaqinno'e kodditen. Hupna ukkumeeta ka a Kiristoosi kodde; xasasampaytase a fuula Waaqinno tura halkeetta ka kuyyaata hellaanno a kiristaana xasasno i'alle katame.” Anka dakaye.

¹¹ Ishootta diika a laahasetiitinni ka qaaleta maakkuma a haasawadenetinni isha puten, ishootta a caattaaysho in suraysannin mali toota turopa isi tuuken.

¹² Semmalla moontadaayye ka ishina a kara kala piisaayye, xasooda! Taaploosi akkima eta shakkayaaw ishi hasene upnaade ka miira kuttan ishin oppopa lekkadeey, piita isho pakateeteeyye oo ishin kido!”

¹³ Pofase ete akkima piita qaropa katame akkeeyye, iskatteetase inna diirta xaayte kamma pora daane.

¹⁴ Iskatteese akka porase isheetta harmisame opa moontan xa'atto'e xoolla lakki a kawwaarayta kutta'e ishi daasame. Ikka eeyyepa maakase tura sekaatte ka para sessa ka paka tura tooyamte.

¹⁵ Akka iskatteetase malxaan haadamto'e, pofase ka pisha a kirra urqino mina ca afaadippaayye tufe ka iskatteetase kamma tuqe.

¹⁶ Ma xoori, piita iskatteetase qaarqaare ka afaadi pane ka pishasene a pofase afaadippa tufe ka tuqe xoobbe.

¹⁷ Pofase ka iskatteetase qara miiroode ka sanynyeetase a iskatteetaseti peela hasse torpa sooke. Ishootta nefo, isasene ajajadda Waaqa tooytina ka qoota Yesuusi desa amanuman maakkumma.

¹⁸ Pofase ka pakateeta kapaayye tahaytoppa qa'ade.