Keleshaata 11 - Mataafa Qulqulloota

Maakkiyyasene lakki

¹ Sekkammaayye, qoyra xaasha a paatan ekkaysannaan paha'e ana daasame. Ka ana kidamte, “Xa'e ka tikase a qulqulloota a Waaqa isho poraadi a kalisoota ekkaysado ka orra eyye kara Waaqa waaqaysanno dike.

² Ma xoori porase tika qulqullootati laka tulan co alle diishe. Sede orra a Yihutaata in koddinini'i daasameey sede an ekkaysadan. Orra a Yihutaata in koddinin leya kunda afuri lakki kara'e katamasene a qulqulloota iskelopa yatada.

³ Maakkiyyasene xayyo lakki akka mehadda dapteeta kalsadan ka kuyyaata kuma ka dippa lakki kunda lehi xuuma haasawadane'en ishootta hupna daasha.”

⁴ Ishootta nefo, qorasene a ekerta lakki isho meehase qara ipsa xaaynaan lakki, isasene poqalla piita tura qa'anna.

⁵ Oton nama ishootta miidda faaniiyi apitta afaasso oppa sooka ka paarkaalaasso kupa. Nama ishootta miidda faano piisa ka saanta asse pahaton to'a.

⁶ Kuyyawwosen a ishootta oppa xuuma haasawadane karaayye, akka roopa in roopnini'i moonta dufa'e hupna ukkumeeta'e qapan. Ka akkimoose mina'ew pishadda diikopa purissa'e ka eta a heenaneeyye erkannawwa ika heenten piita da'issa'e hupna ukkumeeta qapan.

⁷ Oto maakkumaaysho dikkishan kammaayye, pinantase qaawase a hiwwalaalla kareela sooko ishootta torpa ka ishootta puta ka ishootta leysha.

⁸ Pukkaaysho ka paapahase a katama kutta oppa seeha katamoosen nefo oto pahanaan haleenaaneeyye Sotoomi taaki Kipsi kidammi. Katamoosen nefo, katamasene a Poqallaasso kara fannisame.

⁹ Samyta isho kaffaa ika lekaya ka a afadda ika lekaya haasawanna isho lekna ka kuyyaata sessa ka paka kara'e pukkaaysho ruka; ka akka pukkaadaasso in hawlammini kuli dawran.

¹⁰ Xuumampayosen lakki, qoota turan orra piita payyahashen malla, orra piita qara kalo toota xuumampayosenetinni xasooda ka xasan xaysonessuma kodada ka daassawwa olli daashan.

¹¹ Ma xoori, ete kuyyaata sessa ka paka tarpite kammaayye, nessa caatta daanno Waaqa kapa de'e ka pukkadasene karopa kale, ikka loqqaassotin qa'aden. Orra a ishootta akke ka a kuttati fuure.

¹² Sekkammaayye xuumampayasene lakki ka nessa kuttayta a moonte xata kiino “Arepeela fayyada!” dakayen. Ka a paarkaalaasso ishootta tooynaaneeyye, urrattoppa moontopa fayyaden.

¹³ Saatese oppa'ew piita ka akata lellehete. Katamasene qudaayye harka kudani oppaayye takka ka qitqite. Lellehayta piita minanne, nama kuma tappa ka pirame. A toota kela pahee ka a kuttati fuuren ka Waaqa a moonta ulfeessen.

¹⁴ “Oo kido” a lammatta itarpite, ma tin “Oo kidoo” a sessatta'e jarjartan are deeni.

Turumpase a tappatta

¹⁵ Erkampattootase a tappatta ka turumpaadi dawte. Moonteeyye nessada kukutta ka kiini, “Mankisteeta piita a Waaqa Poqallaanno isho a Kiristoosi koddite, isha ka paraparaayye haka paraparti nuqusuma.” ka dakaaden.

¹⁶ Qimaya kunda lakki afuri a fuula Waaqa tura suufaannaasso qara kuti'e ka ittirandesa sehen ka Waaqa sakataden

¹⁷ ka kidene, “Poqallaay, Waaqqo! Ke a we piisa ettaninno! Ka amma co ka xatta co, qoota hupnase xaayti a ukkumeeta kutta harkoppopa oorsatte ka nuqusumte malla, in ke kalataysanninna.

¹⁸ Orra a Yihutaata in koddinin imiiroode; miiraayti ka de'e. Eta a oppaayye orra le'e firteeta akkado ka kayte. Eta a oppaayye orxayasene xaayti xuumampaya ka qulqullowwa isho isasene maxxaayti ulfeessina a shashakka ka a kukuttaati'i rapootaaysho daasso ikayte. Eta oppaayye a piita pashshe patisso nefo ikayte.”

¹⁹ Tikase a qulqulloota a Waaqa moonte kitto ka panamte. Taapotase xaadi a kodayteeta ka tikase xaadi a qulqulloota kara akkaatte. Hankaada ka nessa ka xirara ka lellehayta piita isho apteenta kuttayteeta ka kodden.