Keleshaata 10 - Mataafa Qulqulloota

Erkampattootase isho mataafase ollopa marrammo shakka

¹ Se kammaayye, anka erkampattoota a pila a hupnampayteeta koddite ka oraarta uwwisatte a moontexata lekkannitto akke. Pankaallata ka mattaadi kapa qorrasse; fuulaadi piirtota paha. Loqqaadi ka tuudda apitta pahan.

² Erkampattootase, mataafa a ollopa marrammo a paname shakkayta harkoppa qapta. Ka loqtaadi a akkitta pakateeta qara xaayatte ka a pittitta piita qara xaayatte.

³ Ka nessa kutta a daattitta karma pahon ullupte. Ete ullupteeyye, xirarase tappa ka haasawade.

⁴ Ete xirarase tappa haasawadeeyye, anti allu taafaan dikade ma, nessan moonte dakaye ikka kiini, “Wa xiraroose tappa haasawade juuttotan qapado diisheey, in taafan.”

⁵ Sekkammayye erkampattootase pakateeta isho piita qara qa'atte an akka ka harkaadi a akkitta moontopa xa'isse;

⁶ ka maxxa a Waaqase haka paraparati kallaanno ka moonta isho wa isheetta kara ca uume ka piita isho wa isheetta kara ca uume ka pakateeta isho wa isheetta kara ca uumen xaxatte ka kiite, “Are kulipaata in jarto.

⁷ Ma kuyyawwa a erkampattootase a tappatta turumpaadi dawnitta karaayye, akka Waaqa orxayaasene xaadi xuumampaya upnayshe qara'e, juutota Waaqa idikkatta.”

⁸ Sekkammayye nessase an turan moonte dakaye ka lammatta ana haasawadeew ka kiini, “Aane ka mataafase ollopa marrammo paname harka a erkampattootase pakateeta isho piita qara qa'atte oppaayye qeede.”

⁹ Anka erkampattootase kapopa aane ka ishi kide, “Mataafase ollopa marrammo shakka ana daashe.” Ikka ana kiite, “Qedado ka dame. Afaappaayye akkima takma mina'e ke me'aawa ma, karittaayti ike haddaawa.”

¹⁰ Anka harka erkampattootaseti oppaayye mataafase ollopa marrammo shakka teyyade ka dame, ikka afaappaayye akkima takma mina ana me'aawe. Ma eteen dame kammaayye, karittiyyo ihaddaawe.

¹¹ Sekkammayye ikka ana kidamte, “Qoota samaytati desa ka a leknati desa ka a afa ika lekayta haasawannaati desa ka qoota nuqussa piisati desa lammatta xuuma haasawatta ke parpaaccisni.”