Keleshaata 1 - Mataafa Qulqulloota

¹ Akka wa dehaynittoppa' kodda orxayaadi akkisho'e, kelashaatase a Waaqa Yesuusi Kiristoosi' daashe sede, Yesuusi Kiristoosi ka erkampattootaadi erke ka kelashaatose orxaytaadi Yohaannisi akkishe.

² Yohaannisi ka qoota qaaleta Waaqati desa ka dukaatase a Yesuusi Kiristoosi isha kollishe desa, isho qoota wa akke pisaayye desa maakkume.

³ Wossen piisa qoota dehaynittoppa' dikkadan malla, nama qaalese a xuuma nappapno a eeppisame. Akkimoose mina'ew, a qaalese a xuuma dakayna ka wa xuumose kara' taafame koona a eeppisame'ew.

Nakayta tikkasene a kiristaana a Issiya tappa erkame

⁴ Nakayta ana Yohaannisi kapaayye tikkasene a kiristaana tappa, piita Issiya kara caati erkame. Isase amma co ka xatta co ka itturopa de'o, kapaayye ka hapurrasene tappa sufanaadi tura ca kapaayye, a daassata Waaqa isho nakayta ishina' kodden;

⁵ ka Yesuusi Kiristoosi, isase maakkitta amaname kodde ka tootoppa xaanaan' qaarta kodde ka nuqussa piita' mukinno ka ino jaalanno ka juppootinno oppa diikaadin nata ino sookshe kapaayye, daassata Waaqa isho nakayta a ishina' kodden.

⁶ Akkan aappa opa Yesuusi Kiristoosi Waaqa kela koda koono'e, Yesuusi Kiristoosise nuqussa isho qeesewwa' ino kode'e, ulfeena isho hupna a paraparaayye haka paraparati a ishi koddo. Ameen!

⁷ Tin isha oraaraappa deeni, orra piisa ka isha akka. A isha dote' kuli ka isha akkan. Samayta piita' piisa ka isha minan pooya. Sede nefo dukaata. Ameen!

⁸ A amma co ka xatta co ka itturopa de'o, Waaqa, Poqalla isase we piisa ettaninno, ikiini “Alfa ka omeeka a paayyota ka a piraampira ana!”

Akka Kiristoosi kelashaatoppan akkaade

⁹ Anti innasene xaayshin a kiristaana Yohaannisi; isase Yeuusi Kiristoosi qudanne rakkootaadi ka mankisteetaadi isho duupattaadi oppaayye ishin olli qoottanno, qaaleta Waaqa isho Yesuusi maakkuma minannen, piitase otanta pakateeta' kara kitto ka Fitmo kidammitto kara' hidame.

¹⁰ Kuyyaata Poqallaatiiyyi an hapuran cooyye, nessa kutta a kaasa dawammo' paho ka ana kamma desa dakaanni, anka dakaye ikka kiini,

¹¹ “Wa akkinitta mataafoppa' taafe ka tikkasene a kiristaana tappa erke, ishootta' nefo, Efesooni ka Semirineesi ka Perkamooni ka Tiyatirooni ka Sardeesi ka Filadelfiya isho Lodooqiya.”

¹² Anka ayno akkima ana' haasawanno upatta'e, iskamman desa tiitaawe. Ka eten tiitaaweeyye, wa a qara ipsa xaaynaane a warqeetoppa kodame tappa akke.

¹³ Wossen qara ipsa xaaynaane otantoppa anka a inna nama' paho akke. Isha' nefo qamiseeta a dera a xati loqqaappa kaynitto kalsade ka kessaadippandesa saappata a warqeeta hiddade.

¹⁴ Nyirfa mattaadi a fuuttota mina'e ati, ildaadi nefo opaya apitta'e pahan.

¹⁵ Loqqaadi sipla a poroodoppa' pale pahan. Nessaadi nefo, nessa fotota a pisha urqina'e paha.

¹⁶ Harkaadi a akkitta oppa'e hikka tappa qapade. Koraateta paka lakkin qarta qapto ka afaadippa sookni. Fuulaadi piisa ka akka piirtota awdite mina' opayni.

¹⁷ Eten isha akkeeyye, anka akkima nama to'e' mina'e loqqaadi kela' pi'e. Isha' xoori harkaadi a akkitta'e ana qara' qapade ka ana' kide, “in fuuran, a paayyota ka a piraampira anaay.

¹⁸ Anti an caattampayta. Turan into'e ma xoori tin haka paraparati an caattampayta. Ka toota isho si'ooli qaraayye hupna ukkumeeta' qapa.

¹⁹ Semmalla wa akkite wa amma ca ka kuli kammaayye de'a' taafe.

²⁰ Juuttota a hikkasene tappa a harkiyyo a akkitta oppa akkite isho a meehase qara ipsa xaaynaan a warqeeta tappa sede; hikkasene tappa, erkampattowwa a tikkasene a kiristaana tappaati. Meehase qara ipsa xaaynaan tappaaw, tikkasene a kiristaana tappa.”