Kelaatiya 6 - Mataafa Qulqulloota

Haadeta olqara semeeta

¹ Hellaanno a kiristaanatiiyyi! Nama takka oto juppootoppa' pi'ooyye, ishina a Hapuran Qulqullootatin kallaannaatiiyyi, naalumaan namoose saanta qaropa oorsha. Ma ishina'ew akka' ekkaysuma a asse paha oppa a' pi'inini'i, isi tooytaada.

² Ishina matta mina'e olqaraayye haadeta sema, sedenne seera Kiristoosi nakassaneey.

³ Nama takka oton a wa ishin orra qara jaalla a in qapnin mali dikanni ka kiini, “Anti orra qara in qapaayye,” isi sassapanni.

⁴ Nama matta mina'e a koda mattaadi kara qoro ka ekkaysado. Sekkammayye a orra kapa issin qapnin mali wa ishin isi jeejja' qapnaadaay.

⁵ Maana malla nama matta mina'e haadetaadi haadatta isha parpaaccisniiy.

⁶ Nama qaaleta kollanno, a kollissampaytaadi olli wa paxaara a qapa' piisa qoottado.

⁷ In sassapataman; Waaqa qara opani seesni in caaneey. Nama wa aylaade'e feranniiy.

⁸ Nama xajeelta so'a' xasassa aylaanno, xajeeltaadi a so'adi oppaayye toota ferada; nama Hapura Qulqulloota' xasassa aylaannoow, Hapura a Qulqulloota oppaayye caatta parapara'e ferada.

⁹ Oton xasa, an murriniiyyi oto etaadi kaytooyye qootan feranno malla, koda paxaara koda'e nukkullaatta diinna.

¹⁰ Oton in aroota teyneeyye, orra piisa'e ka xawwi' desa a toola amanteeta oppa caati'i, wa paxaara' koona.

Nakayta dehassa ka dehamta piraampira

¹¹ Akkiman fitalla kukutta a atta caccaatin harkiyyon sede ishina' taafe tooya.

¹² Orra laka tulan paxaarnaya pahanaatta ka akkaatta faano, akka dawra qara murattane'e ishin kitteessini. Wa malla sede koonaane' nefo, akka masqala Kiristoosi minan pora daanama ishootta qara'en kaynin malla.

¹³ Ishootta dakintayshinan isi jeejjeeta malla akka' dawra qara murattan faani diisheey, ishootta a dawra qara murade nefo seera tooytaanni in caan.

¹⁴ Masqala an anti qara' piita malla fannisame kato'e piita ka qara' ana malla fannisamte ka toote masqala poqallaanno a Yesuusi Kiristoosi mali jeejja a pila ana kapa a sekaaden.

¹⁵ Semalla, dawra qara muratta taaki muratta diissata we' nessinni in kitto; wa we' nessinna uumata haraya koddeeta.

¹⁶ Isira'eeleta Waaqa ka orra seeroosetin kallaanno piisa'e, nakayta ka diissata a kodden.

¹⁷ Anti milikkita Kiristoosin dakintiyyo quda qapaay, arepa desa nama takka nefo anan payyahinnin.

¹⁸ Hellaanno a kiristaanatiiyyi! daassata a Poqallaanno a Yesuusi Kiristoosi a hapuraayishin olli kinnaatto! Ameen.