Kelaatiya 5 - Mataafa Qulqulloota

Natan sookeeta a Kiristoosin teynaan

¹ Kiristoosi wa malla nataan ino sookshe akkan natan kallaanno malla. Semmalla japaada ka qa'ada ka lammatta qampara karpishshuma' kela'e an qapaman.

² Tin! anti Pawloosi in ishina' kiini, “oton ‘dawra qara muratta’ ino parpaaccisni” kiitan ka dawra qara murattaneeyye, Kiristoosi we ishin qara in pataysho.

³ Nama a kiino “Dawra qara muratta ana parpaaccisni” ka dawra qara muranno piisa'e, oppa'en oori ka turadesaaw ishi' lelli ka kiini “Kitteetan seera piisa tooytaatta isha faani.”

⁴ Ishina a seera tooytaattan hanqeellaawa faana' piisa, Kiristoosi kapa xawwi oorten ka daassataadi kapa alle patten.

⁵ Ino' xoori, hapura Waaqatinnin kippeeta hanqeelluma amanteetan asanninna.

⁶ Oton Yesuusi Kiristoosinni' kallaanniiyyi, amanteeta koda jaalalaatin isi akkinnitto diisheey dawra qara muratta ka muratta diissata we' nakanni in kitto.

⁷ Turan keeritta fayya qara kittaneey ka kuli akka dukaata'e a ajajammini'i, ayno ishin dawre?

⁸ Sassapasen asse paha Waaqase ishin halaade kapaayye in deene.

⁹ Sede nefo, isase' kiinaane, “Haddaya shakkaya puullota piisa palanni.” Mina

¹⁰ Ma xoori semmaliiyyi ishina akka dikatta pila a' qapnaannin poqallaan kippanni. Nama a ishin tura ollin patinno piisa qitaatetaadi akkada.

¹¹ Hellaanno a kiristaanatiiyyi! anti haka ammati'i, kadin torrina ka kiina, “Dina'e dawra qara muratta parpaaccisniiyyi.” maana'en haka ammati pora daanammi? Kadin sede qara'e kiiteeyye, helani masqala Kiristoosi orra tura kehaytan koddo.

¹² Semmalla, sene ishin tura ollin patinna, oton iheenaneeyye dawra qara muratta patta a in koddinin maliiyyi, kadi alle' kunaya isi koonaan in heena.

¹³ Hellaanno a kiristaanatiiyyi! ishina natan kallaatte'e' halaamten; semmalla jaalalan olkela koda koda diisheey, natan sookeese' xaayshin xajeelta so'a immaka'en kodan.

¹⁴ Seera piisa qaaletase takka, “Nama piisa akka mattaayti' mina' jaalado kiinittonne” dikkanni.

¹⁵ Ma xoori, oto oli qommittan ka oli dammittaneeyye, akka oli a' patinnini'i, tooytaada.

¹⁶ Semmalla in kiini, “Hapuran kallaada ka xajeelta a so'a in kodan.”

¹⁷ Xajeelta so'a a hapura'e toorri; a hapura ka a so'a' toorriiw. Hapura isho so'a ka olliiw pora toorri; semmalla wa' faanittane' kodeeta a ettanissan.

¹⁸ Oton hapuranne' kallaannittan seera kela a' piddamtan.

¹⁹ Kodadda a so'a i''upnaysamen. Ishootta' nefo, sharmuutuma, nyela, manynyeeruma,

²⁰ Killanna Waaqaysatta, suuma, oli needdatta, oli qara' nyaanynyeta, yoota, miira, issiiw jaalatta, oli kela paseeta ka kola kola olli' qiteeta.

²¹ Wa laayyo kaabbeeta, maashshootta ka kirpa a seera dape isho sene asse pappaha. Akkan turan ishina' lele mina'e, amma nefo oppa'en oorriiw ka turan desaaw ishina' lelli, orra wa asse pappaha' koono mankisteeta Waaqa in lehaado.

²² Dalta Hapura Qulqulloota' xoori, jaalala ka xasa ka nakayta ka duupatta ka xoona ka paxaarumta ka amanama

²³ ka tajjanuma ka istooytaatta. Seera wa asse pappaha' dawrino in co.

²⁴ Orra a Yesuusi Kiristoosi kodde, so'a xajeeltaaysho a neeqa isho wa sannaane piisa ollin fannisen.

²⁵ Oton Hapurannen kallaanninnaayye, Hapura kamma anna.

²⁶ Ka oli qara yootanne ka neequmta oli xaxxa'issaanne patta isi jeejjatta diinna.