Kelaatiya 3 - Mataafa Qulqulloota

Hanqeelluma, akka Kiristoosi amanteetan teyannaan

¹ Ishina eeppaayye orra Kelaatiyaatiiyyi, ayno tipan ishin lulshe? Yesuusi Kiristoosi, a masqala qara' fannisame ishin tura'e akkaade;

² Sede patta upnaattan faani. Hela ishina seera tooytaattaanne Hapura Qulqulloota' teyyattenem moon otootase a fayya' dakayeeta ka amaneetanne Hapura Qulqulloota' teyyatten?

³ Ishina hapura Waaqatinni' paayyiten ka amma hupnaayshinan dikkissa faanittan! Into hakaseti'i a eeppa?

⁴ Rakoose otootase a fayya' minan ishin qara' kayte piisa, oori paata pattape ka? Oton asse' kooteneeyye, keeto'en paata patta.

⁵ Waaqa wa malla hapuraadi ishina' daanna ka ishin oppa wa orra qawwanna' koona, qoota seera tooytaatten mallam mon qoota otootase a fayya' dakayten ka amanten malla?

⁶ Sede nefo, akka taafamte ka kiinitto, “Aprihaami Waaqa amane ikka hanqeelluma ishi' dikamte” mina.

⁷ Semmalla orra amanno akkima hella Aprihaami kodden upnaada.

⁸ Waaqa akkima amanteetan orra a Yihutaata in koddinini hanqeellaya' kodo, mataafa qulqulloota turanneew akke ka turanneew Aprihaami otootase a fayya' torre ka kide, “Lekna piisa ke qudanneew saka akkada.”

⁹ Semmalla, orra amanno piisa Aprihaamise amane olliiw saka akkada.

¹⁰ Qoota taafamte ka kiinitto, “Nama ajajadda a mataafa seera oppa' taafame piisa kooni in kinnin ka ishin kallaanni in kinnin piisa a jiijame” Malla. Orra a kiino, “Seera tooytaattaannen hanqeellaawna piisa a jiijameew.”

¹¹ Qoota taafamte ka kiinitto, “Hanqeellitta nama amanteetanne caatta akkanni malla,” Nama takka nefo akkima seera tooytattaan fuula Waaqa' tura hanqeellaawni in kinnin i'akkaanni.

¹² Seera amanteeta qara'en qa'anne; laadi se kapaayye, itaafamte ka kiini “Nama oto ajajadda a seera' piisa tooytannooyye seeran kallaatta ettaninni.”

¹³ Qoota taafamte ka kiinitto, “Nama qoyra qara' fannisamo ka to'o piisa a jiijame” malla, Kiristoosi ino malla nama a jiijame kodde ka jiijasene a seera qeenna kelaayye ino furade.

¹⁴ Sede nefo wa malla asse koddite, sakase a Waaqa Aprihaami' daashe akka Yesuusi Kiristoosi qudan orra a Yihutaata in koddinin qara' kayo, ino' nefo ka Hapurase a Qulqulloota, a Waaqa' kide, “Ishina'en daasha” amanteetan teyyanno malla.

Seera akkima qaaletase a kippeeta hattinni in kinnin

¹⁵ Hellaanno a Kiristaanatiiyyi! intoonno sede wa a nama kapa kollatame kapa ekkayshaay. Kodayteeta orra kodade oto qara olli' kalan kammaayye, nama takka nefo pooteeta taaki qara' padaawa ettaninni in co.

¹⁶ Waaqa akkimoose' mina'ew Aprihaami isho sanynyeetaadi' kippeeta daashe. Mataafa qulqulloota Aprihaami kammaayye nama a ishi' kippeese' daasamte orra lekayta koonin co ka “Sanynyewwaatti” kiini in co ma nama takka'e kooni ka kiini “Sanynyeetaayti.” Isha' nefo kan, Kiristoosi.

¹⁷ Semmalla anti in kiini, seerase para dippa afuri ka kunda sessa kamma daasame, kodayteetase a Waaqa turan qaatishe pooteeta ka kippeetase patissa in ettansho.

¹⁸ Kadin seera tooytaattaanne lehna a Waaqa daanna akkanni kiiteeyye, kippeese a Waaqa daashen koddinin heenne. Ma xoori Waaqa, kippeetanne Aprihaami' lehandoosen daashe.

Seera wa malla daasame

¹⁹ Ka kuli' seera maana malla daasame? Seera wa malla padaawame ka daasame sanynyeetase Aprihaami kippeeta' daasamte haka deenitto kara'e, koda a neeqa maana akkima kodde akkissa malla. Seera erkampattowwaanne daasame ka araarissampaytase otantoppa co qudan koda qara nakaye.

²⁰ A koddito ma, araarissampayse otantoppa co, kola lakki piisa'e qa'anni diisheey kola takkan patta' qa'anni in co. Waaqa xoori takkayta.

²¹ Hela kuli seera, kippeeta Waaqa'e toorri? Pakkanna toorri in co! Kadin seera a ishin caatta teynaane daasame kiiteeyye, helani hanqeelluma seeranne teyanni heenen.

²² Ma xoori kippeetase Yesuusi Kiristoosi amaneetan teyannitto akka orra amanno' daasamto'e, akka mataafa qulqulloota' kiino mina'e piita piisa juppootan hidame.

²³ A amanteeta in deenin turanne, ino seerannen hidamme ka haka amanteese' deenitto kara'e, seeran tooytamminna.

²⁴ Semmalla akkan amanteetan hanqeellaawno'e seera haka Kiristoosi' deeno kara'e, qara tooyampayta a Kiristoosipa inon anno kodde.

²⁵ Amma xoori, qoota amanteeta deete malla, seeran qara tooyaminno ihase.

²⁶ Yesuusi Kiristoosi amaneetanne ishina piisani a hellaa Waaqa.

²⁷ Ishina jaqqaman Kiristoosi olliiyyi takka kodde piisa, akka ohaata mina'e Kiristoosi uwwisatten.

²⁸ Qoota' pisantiiyyi Yesuusi Kiristoosin takka kodditen malla, Yihutitta isho a Yihutitta in koddinin ka karpishsha isho a karpishsha in koddinin ka diirta isho iskatta otantoppaayye oli qara jaala in co.

²⁹ Semmalla oton a Kiristoosi' kodditeneeyye ishina a sanynyeeta Aprihaami ka kippeetase qara'e a' lehaampaya.