Kelaatiya 2 - Mataafa Qulqulloota

Pawloosi erkamampayta koddeetaadi akka erkamampaya a pila kapa upnaysamte

¹ Para kudan ka afur kammaayye Yursaalamipan tiitaawe. Ka sitiiyyi Parnaapaasi ollin anne. Ka Tiito kuli isiquda' qeedeew ka ollin anne.

² Ka akka Waaqa keleshaatan ana akkishe qara eeyyepa aane. Waan turan kode ka amma nefo koona akka patta'en hasnini'i, otootase a fayya an orra a Yihutaata in koddinini' torre'en, xawwaati saarra kukuttaati upnayshe.

³ Tiitose ana olli co, kadi punu Kirikkitta koddeeyye, akka dawra qara murado'e in kitteessaamme.

⁴ Ma xoori, hellaanno a kiristaana a darampaya kodde ka dekandekatti ino karopa kulle takka takka, akka dawra qara murado fade. Ishootta, wa malla lettissa ino karopa kullene akka natan sookase an Yesuusi Kiristoosin akkanne alle ino qara katan ka karpishshuma kelopa ino oorshan qoota dikaden malla.

⁵ Ino' xoori, akka dukaatase a otoota fayya ishin kara kinnaatto'e, shakkayteeta nefo'e an ishootta'en putamme.

⁶ Sene saarra pappaha ka akkaanna' xoori Waaqa qoota fuula nama tooyni in kinnin ka qatayma kooni in kinnin malla, aynumaaysho ana we'en; sene saarra kidame otootase a fayya an anti' torrino qara'e we takkan nefo in padaawne.

⁷ Laaddi, akka Peetiroosi otootase a fayya Yihutaata' torro'e, akka atara ishi' daasamen mina'e, akkan otootase fayya orra Yihutaata in koddinini' torro'e akka atara ana' daasamen upnaaden.

⁸ Waaqase akka Peetiroosi erkamampayta a Yihutaata' koddo ka koda kodo' kode, ishaaw. Akkan anti erkamampayta a orra a Yihutaata in koddinini koddo ka koda kodo' kode.

⁹ Saarrasene tuudda pappaha ka akkaanna, Yayqoopi ka Peetiroosi isho Yohaannisi, akka Waaqa daassataadin a koda a xawwi' desa ana' daashe ete upnaadeneeyye, akka ana isho Parnaapaasi olli takkumta qapan akkissa'e, harka inooyye qeeden ka akkan ino orra a Yihutaata in koddinin oppopa anno, ishootta ka Yihutaatoppopa aanane'e, owsaden.

¹⁰ Xawwi' desa akkan teekolaya matte oorsatta an diinnin patta ino atara kiden. Sede nefo kodase an anti kodeeta a kuttati' faano.

Pawloosi akkima Ansookkiya karaayye Peetiroosi peeqe

¹¹ Peetiroosi, ete Ansookkiyaapa de'eyye, kamma dapeetaadi qoota fayya akkaate malla, ildaappadesan dapoose' qara isha fuke.

¹² Orrase a Yayqoopi erke demo a Ansookkiyaapa in deenin turanne Peetiroosi orra a Yihutaata in koddinin oppaayye orra amane olli dammi; xoori ete ishootta de'eneeyye, koladda a kiina'e “Orra Yihutaata in koddinin oppa amane; dawra qara muratta ishootta parpaaccisni.” Fuure ka iskammandesa oore ka orra a Yihutaata in koddinin quda xawwi isi oorshe.

¹³ Yihutaata a kiristaana koddite demo ka pappahanassa a Peetiroosi quda' oorte, Parnapaasi kuli ka pappahanassaaysho quda' oore.

¹⁴ Eten akka kodaaysho dukaatase a otoota fayya olli anni in kinnin akkeeyye, orra piisa tura'en Peetiroosi' kide, “Atti a Yihutitta, ma taanteta Yihutaatatin a kallaanni a' kitto, a orra Yihutaata in koddininiitinni kallaanni ka kuli orra a Yihutaata in koddinin akka taanteta Yihutaatatin kallaado'e, maana'e kitteessini?”

Yihutaata isho orra a Yihutaata in koddini akka amanteetanneew dinan

¹⁵ Dukaatan ino' dalaannoppaayye, an Yihutaata diisheey orrase Yihutaata in koddinin a juppoolaya kodde minan.

¹⁶ Ma xoori nama, akkima Yesuusi Kiristoosi amanaan hanqeellaawno ka seera tooytattaan hanqeellaawni in kinnin in upna. Ino' nefo, seera tooytattaan in koddinin mali, akkan Kiristoosi amaneetan hanqeellaawno'en, Yesuusi Kiristoosi amanne. Nama takka nefo seera tooytattaan hanqeellaawni in cooy.

¹⁷ Ino Kiristoosi amaneetan hanqeellaawa faana ka ino mattinno' juppoolaya koddininnooyye, hela kuli Kiristoosi akkan juppoota koono ino kooni kideeta? Pakkanna asse kideetan!

¹⁸ Oton anti taanteta seera an turan qishshe qara' oorro ka dawrooyye akkiman seera qepshen, akkinni kideeta.

¹⁹ Akkan Waaqa' kallaado'e seera qudannen a tootan pursama' mina' kitto, seera kapa pursame.

²⁰ Anti qootan Kiristoosi olli fannisame malla, arepa desa Kiristoosi ana kara' kallaanni diisheey, anti an kallaanni an co. Amma sede an are dakintiiyyon kallaanno, innasene, a Waaqa ana jaalade ka toota isi daashe, amaneetannen kallaanni.

²¹ Anti daassata Waaqa patta' an pashsho. Oton nama seera tooytaatan hanqeellaawniiyyi asseeyye Kiristoosi patta'e to'e kideeta.