Kelaatiya 1 - Mataafa Qulqulloota

¹ Erkana ana Pawloosi, isase orra kapan erkammin ka namanne in erkammin ka Yesuusi Kiristoosi isho Waaqa aappa Yesuusi isase tootoppa xaashen erkamampayta kodde ka erkame

² ka hellaanno a kiristaana ana olli ca piisa kapaayye, tika a kiristaana a Kelaatiyaati erkame.

³ Waaqa aappinno isho Poqallaanno Yesuusi Kiristoosi kapaayye, a daassata isho nakayta ishina' kodden.

⁴ Kiristoosi sapanoose are neeqa kela akka inon paho'e, heenna a Waaqa aappinnotinni juppootinno malla isi daashe;

⁵ paraparaayye paayyatte haka paraparati'i ulfeena a Waaqa kayo! Ameen.

Otootase a fayya a dukaata akka takka patta koddite

⁶ Sede a Waaqase daassata Kiristoosin ishin halaade kapa jarjartan xawwi' oorten ka otoota pila opa tiitaawten ana qawwanni.

⁷ Waan malla asse kide' nefo orra ishin tura ollin patinno ka otootase a fayya a Kiristoosi qindandesa quu'ino demo ca diisheey, otoota a fayya kelaayye takkaaw.

⁸ A kodditoma, kadi punu ino koddite taaki erkampattoota moonta nefo kodditeeyye, oton otootase a fayya an ino ishina' torrine mali a pila ishina' torriniiyyi, ajiijamte a koddito.

⁹ Akkiman turan kide mina'e, amma nefo oppa'en oori ka kiiniiwwi. Otootase a fayya atteyyatten maliiyyi nama a pila ishina torrino, a jiijame a koddo!

¹⁰ Hela kuli anti, akka nama ana kalataysadon faani? Moon akka Waaqa ana kalataysadon faani? Moon an nama xasassa faano ishina' pahata? Kadan orra xasassaan faaniiyyi, orxayta Kiristoosi koddini an heenne.

Pawloosi akkima erkamampayta Yesuusi kodde

¹¹ Hellaanno a kiristaanatiiyyi, otootase a fayya an anti ishina' torre, akkima a nama in koddinin akka upnaattane'en faani.

¹² Otoose a fayya Yesuusi Kiristoosi ana' akkishe diisheey, nama takka nefo qara an teyyanne; umma nama takka nefo anan kollinne.

¹³ Xatta an amanteeta Yihutaatatin kallaannooyye, a kuttati'in tika kiristaana a Waaqa pora daanni ka patissa faani.

¹⁴ Amanteeta Yihutaata tooytaanne, orrinno a Yihuta a xeltiyyooyye co oppaayye, a leka qaran qapa ka qoota aata aappadaannoti desa yoota kutta' qapa.

¹⁵ Ma xoori, an andalannin turanne Waaqa ana reexade ka daassataadin ana hale.

¹⁶ Akkan qoota innaaditi desa otootase a fayya orra a Yihutaata in koddinini' torro'e, ete Waaqa ana qudan innaadi akkissa heennaadeeyye, anti nama takka nefo olli an oorsanne.

¹⁷ Taaki a ana turan erkamampaya kodde kapopa Yursaalamipa an anne; ma paayyota'e piita Arapa opan aane ka Tamaasqopa tiitaaweew.

¹⁸ Kammadesaaw para sessa kammaayye Peetiroosise keefa Kidammo akka'en Yursaalamipa aane ka eeyye isha kapa'e kuyyaata kudanka ken pire.

¹⁹ Ka quda'ew Yayqoopi, innasene a opa Poqalla'en, akke diisheey erkamampayaappaayye nama takka nefo an akkine.

²⁰ Wossen an ishina' taafna akkima darta in koddinin fuula Waaqa' tura'en ishina' upnaanni.

²¹ Sekkammaayyeew piita Sooriya isho a Kilqiya opan aane.

²² Tikka a kiristaana a Kiristoosi a piita Yihuta kara ca' turan ana in akkine ka ana in upan.

²³ Ishootta otoota a kiinitto “Namase xatta turan pora ino daanno, amanteetase a patissa faano amma torrini” dakayen

²⁴ ka ana malla Waaqa kalataysanni.