ipro 9 - Mataafa Qulqulloota

Waaqaysatta a tika qulqulloota a piisseti kara kodammo

¹ Kodayteetase a paayyota, taanteta a Waaqa polqumsatta isho tika a qulqulloota a piita qara'e qapta.

² Tukkana a kaattada lakki qapo ka daapame. Kaataadi a paayyota a karaayye, wa qara ipsa xaaynaane ka tarabbeesa isho laaqqota kalisoota'e ca. “Sede pora a qulqullaawe” kidammi.

³ Kaata a kaaranta lammattati tultan ca, “Qulqullitteeta qulqullowwa'e” kidammi.

⁴ Kaatosen karaayye, meeha a warqeetoppa kodame, a kara tankarta qayyannaan isho taapotase a kodayteeta a warqeetan quda dekene ca. Taapotose a kodayteeta' karaayyeew, qoreeta warqeeta a kara Menna xaayen ka uleetase a Arooni japarte, isho dakaddasene qaqqaaha a qara' seerase kudan taafame'e ca.

⁵ Taapotase qaraayye, pahana a erkampattowwa kirupeeli kidamma a ulfeena Waaqa'e ca ka xoollaassotin pora haseenta juppoota a taapotase qara co qara dekni. Ma xoori amma qoota wossen piisati desa, takka takka haasawatta an ettaninno.

⁶ Ete we' piisa asse harmisamen, kammaayye qeesewwa kodaaysho koda'e, awta piisa kaatasene a paayyota a tukkanaseti karopa kullini.

⁷ A kaatasene karan ca, a lammatta karopa kullino xoori, saara qeesewwa' patta. Isha' nefo paroppa kuyyaata takkaaw kullini. Umma qoota juppoota mattaadi malla ka juppoota a samayta a in upnin mali kode malla, haka diika a kalisoota' kalsho qapado maliiyyi kullini in co.

⁸ Haka tukkanase a paayyota co kara'e, porase qulqullitteeta qulqullowwa opa orran anno akka dufaman co, Hapura Qulqulloota sedenne akkinni.

⁹ Sede nefo etasene a ammati'i pahana koddini; daassawwa isho kalisoowwa asse dehaanna, dikatta a karan xata a namoose kalisoota dehannooti immakootan qulqullassa ettaninni in caan.

¹⁰ Ishootta, taantewwa afaa qara ka haka sapana taanteta haaraya kaynitto kara' kodaan kodamen. Ishootta' qoota damta ka a ikkayta isho, qoota taantewwa jaqqaysuma ika lekayta patta malla kodamen.

¹¹ Ma xoori Kiristoosi waasene' paxaara deena qara caati saara qeesewwa'e kodde ka de'e; tukkana a isha kelopa kulle ikutti umma qaja in qapo. Tukkanoose, harka namatinni in daapamme, umma uumatoose oppaayye in qapo.

¹² Isha diika tela isho a haariyya xormada' in qapanne ka ishinni in kulline ma, diika mattaadi'i qapade ka qulqullitteeta qulqullowwa' kelopa kulle. Umma sede oppa oora in qapto. Ka sedenne haka a paraparati' furama ino' qeede.

¹³ Oto diika tela ka a haariyya xormada isho tara a koromta a kalisoota kupatte, orra nyale quda' fidaneeyye, ikka nyala dakinta oppa ishootta qulqullannooyye,

¹⁴ hapura parapara qudanne diikase a Kiristoosi, a isase, kalisoota a nyala in qapnini isi kode ka Waaqa isi dehayshe, akkan caattampayta Waaqa' kela koda koono'e, desa atta kulii a qaran qapto'e koda paata patta a juppoota oppaayye dikattinno a karan xata jaqqaaw!

¹⁵ Orrase halaame, akka lehandasene a parapara a Waaqa kippeeta' daashe akkado'e, kodayteeta haaraya'e Kiristoosi otantitta a ollopa deeno kodde. Sede nefo, wa malla asse koddite a kodayteeta paayyota kela caaneeyye, juppoota a koden kelaayye, orra furattaa'e qoota isha' to'e malla.

¹⁶ Oton kodeeta a kodamte caayye, namoose kodeese kode, akka keeto to'e, upnaatta parpaaccisni.

¹⁷ Qaaleta kodeeta oto namoose kodeese kode to'o pattaayye koda qara nakayni; umma haka namoose kodeese' kode co kara'e, kodeese we nakanni in kitto.

¹⁸ Semmalla kodayteetase a paayyota' nefo, diika maliiyyi koda qara in nakayne.

¹⁹ Paayyota qaraayye Muuse ajajadda a seera'e samayta piisa' lele ka sekkammayye, diikase a haariyya xormada isho a tela pishaan lahe ka hansaabitta isho nyirfa a laha tiimatin mataafase a seera isho samayta piisa qara fidde.

²⁰ Ka kide, “Diikase a kodayteetase a Waaqa ishin ajajeeti' sede.”

²¹ Ka akkimoose' mina'ew, tukkanase isho mehaddasene kodaan koonaane' piisa qara' diikase fide.

²² Keeto, akka seera Muuse qara'e, we lamaya maliiyyi we' piisa diikanneew qulqullaawni, umma haka diika tuqamo maliiyyi, hasenta juppoota teyani in kitto.

Kalisoota kodayteeta a Kiristoosi akka juppoota patinnito

²³ Semmalla wossen wa moontati' pahana kodde' piisa, saanta asse pahatonne qulqullaawa ishootta parpaaccisni. Wa moonte ca' xoori, kalisoota a sede qara qapton qulqullaawa ishootta faani.

²⁴ Kiristoosi, qulqullitteetase a qulqullowwa isase harka namatin kodamte ka tikase a qulqulloota a keetoti' pahana' koden kelopa in kulline; isha amma ino malla fuula Waaqa' tura catta'e moontopa fayyade.

²⁵ Saara qeesewwa a Yihutaata diika a xaadi in koddinini qapanni ka qulqullitteeta qulqullowwa' kelopa para piisa kulla tupa' tawni. Kiristoosi' xoori, lekayteetanne kalisoota isi kodeeta ka isi dehassa'e in kulline.

²⁶ Kadin sede qara kiiteeyye haka piita uumamte paayyatte, a lekatinni rakkoota teyyatta isha parpaaccisni heente. Amma xoori, piraampira sapanna' qaraayye, juppoota patissa'e takkan kalisoota isi kode ka akkaade; umma sede oppa' oora in qapto.

²⁷ Nama takkanne toota' kitame, toota kammaayye, firteeta ka isha qara kitta.

²⁸ Akkimoose mina'ew Kiristoosi, juppoota orra lekayta' patissa'e takkan kalisoota' kalsame. Arepa desa oori juppoota haadatta'en ma, a isha asanna dinissa'e lammatta' oora.