ipro 7 - Mataafa Qulqulloota

Qeesittase Malkesedeqi kiinaan

¹ Malkesedeqi, nuqusa saalemi ka qeesitta a Waaqase' piisa qara qapooti. Malkesedeqi ete Aprihaami nuqussa pute ka kallooyye, poroppa isha mina de'e ka ishi' sake.

² Aprihaami ka wa piisa qaraayye kuma kundatta' qeede ka ishi' daashe. Malkesedeqi kideeta a paayyota, “Nuqusa hanqeelluma” kideeta. Apila'ew, “Nuqusa saalemi” taaki “Nuqusa nakayta” kideeta.

³ Malkesedeqi, aappaaysho ka aayyaasso taaki meera daloota a taafamte in qapo. Umma sapanaadi pora oppa paayyade ka caattaadi pora oppa' dikkanno in qapo; Malkesedeqi pahana inna Waaqa'e kodde ka haka paraparati' qeesitta kodde ka kallaanni.

⁴ Namoose atta akkima kutti tooya! Aprihaamise kaffa tura aappa kodde kuli, wa poojetan akkade qara kuma kundatta qeede ka ishi' daashe.

⁵ Sanynyeetase a Lewi kodase a qeesuma qara' kitamte akka hellasene' xaaysho samaytase sanynyeeta Aprihaami kodde qaraayye kuma kundatta' teyyadane'e seeran ishootta ajajamte.

⁶ Malkesedeqi, kadi punu sanynyeeta Lawaata' in koddinin nefooyye, Aprihaami qaraayye kuma kundatta' teyyade ka Aprihaamise a ishi kippeeta daasamte' sake.

⁷ Akkima nama shakka nama kutta qara saka teyyanno oppandesa anta in qapto.

⁸ Qinda takkanne, a kuma kundatta teyyanna, orra leeno; qinda pilaatinniiw, Malkesedeqise, akkima caattampayta' mina koddo ka kallaado ishi maakkumamte, isha kuma kundatta teyyanni.

⁹ Se malla Lewise kuma kundatta' teyyanno Aprihaami qudanne kuma kundatta' daashe kideeta ikoddita;

¹⁰ maana malla, ete malkesedeqi Aprihaami mina de'eeyye, Lewi kupeetta a aakkaayshoti a Aprihaami kara caay.

¹¹ Se malla seera, qeesuma Lewi qara'e samayta' daasame. Kadin qeesuma Lewi qudanne qaja dapeeta in kinnaannin kiiteeyye, qeesitta pila, a shuumata qeesuma Arooni in qapnin ka shuumata qeesuma Malkesedeqi qapo deenaadi, parpaaccisni in heenne.

¹² Oto qeesuma pursammooyye, seera olliiw pursama parpaaccisni.

¹³ Qeesittose a wossen piisa qootaadi desa lelammaan, kafa pila oppa sooke. Kafoose oppaayye nama takka nefo pora kalisoota kapopa in dehaanne ka koda in koone.

¹⁴ Poqallaanno akkima kafa Yihuta oppa de'e, i'upnaysamte. A kodditoma, Muuse ete qoota qeesewwaati desa haasawannooyye, qoota kafa Yihutaati desa wa haasawade takkan' nefo in caan.

Kiristoosi akkima a Melkesedeqi mina qeesitta kodde

¹⁵ Waan haasawanne oto qeesitta a Melkesedeqi paho a pila xa'oyye, fayya upnaysaman.

¹⁶ Isha wa malla shuumata qeesuma akkade, qoota caattaadi piraampira in qapnini malla diisheey, taanteta isho seera a sanynyeetoppa de'e mallan.

¹⁷ Maana malla, i'ishi maakkumamte ka kidamte, “Akka shuumata qeesuma a melkesedeqi mina'e, atti haka paraparati a' qeesitta.”

¹⁸ Ajaja xatta' qoota nukkulli ka we' nakanni in kinnin malla, isharaame.

¹⁹ Seera Muusenne, wa qaja dapa ettanshe in caan. Amma xoori kippeeta a aakto an ishin Waaqa kapopa dehanninno ino' daasame.

²⁰ Se maliiyyiiw, qeesumoose xaxa a Waaqa' maliiyyi in koddine; a se turan qeesewwa kodde xaxa mali kodden.

²¹ Yesuusi' xoori, xaxa a Waaqatinni qeesitta kodde. Sede nefo akka qootaadi desa lelamte ka kiinitto “Waaqa qootaayti desa ixaxade ka kide, ‘Atti' haka paraparati a' qeesitta;’ umma sede in pursamto.” mina.

²² Xaxoosen minanne, Yesuusi ka kodayteeta a aakto'e, waaseta kodde.

²³ Toota minanne qoota qeesitta takka' qeesuma quda' taweeta ettaninni in kinnin malla, qeesewwa xatta dikootaysho ileki.

²⁴ Yesuusi' xoori, qoota haka paraparati' kallaanno malla, qeesumaadi pursammi in co.

²⁵ Se malla isha, ishootta' Waaqopa qinsatta'e, qoota haka paraparati' kallaanno malla, a isha qudan Waaqopa deena' piisa, immakkootan dinissa i'ettaninni.

²⁶ Se malla, saara qeesewwa a qulqullaawe ka a qaja in qapnin ka a nyala in qapnin ka juppoolayappa xawwi' oore ka ulfeenan moonteeyye pora a piisa qaropeela qapo opa fayyade. Qeesitta a asse paho ino' parpaaccisni.

²⁷ Isha a saarra qeesewwa a taakkane mina'e, paayyota qaraayye juppoota mattaadi malla ka se kammayyeew juppoota a samayta malla, kuyyaata mina'e kalisoota kalissa isha parpaaccisni in kitto. Ete kalisoota isi kode ka kalsheeyye, a oppa oora in qapnini'i kode ka sede dikkisheey.

²⁸ Seera orra nunukkulla saarra qeesewwaati' kooni ka shuummi. Qaaletase a xaxa seera kammaayye deete xoori, inna sene a Waaqa, haka paraparati qaja in qapnini'i shuumte.