ipro 6 - Mataafa Qulqulloota

¹ Se malla oori, kollissase' paayyota' qoota Kiristoosi desa daasame diinna ka a orra qime opa tarpina. Ka kirittase a koda paata patta a juppoota oppaayye ooreeta ka a Waaqa amaneeta, lammatta kateeta diinna.

² Ka kollissa a jaqqatta ka a harka nama qara qapatta ka a tootoppa xaana isho a firteeta paraparati'i, kiritta kata diinna.

³ Ka itturopa anna, Oton iWaaqa kideeyye, seden koona.

⁴ Orra amanteetaaysho marmade atta juppootoppa ishootta oorissa ettanshan? Se turan orrooseti'i, la'ayta ila'aye, ikka daassatase a moonta akken ka Hapura Qulqulloota' qoottaden,

⁵ ka qaaletase' paxaara a Waaqa isho hupna a piitase deenitto' kuli akken.

⁶ Se piisa kammaayye oto amanteetaaysho marmadaneeyye, ishootta mattaayshoti' qoota a lammattati inna Waaqa fannisnaan ka la'aytoppa isha jeerinnaan malla, juppootoppa ishootta oorissa in koddito.

⁷ Piita a roopa eta lekaya isheettoppa' roope iknitto ka nama isheettoppa' dishima dishade' tookta koonitto, Waaqa kapa saka akkatta.

⁸ Oton qe'eyya isho atateena dehissaayye xoori, tookta in qapto, jiijamaadi nefo idehaade, piraampiraadi nefo apittan kupatta.

⁹ Ishina a jaalatameetiiyyi, kadin punu asse haasawanninnaayye, akkima wa aaka a dinaayshin ishina' qeeda qara kittan in dukaysanninna.

¹⁰ Waaqa faratampayta dukaata; se malla isha kodaayshin isho jaalala a qulqullowwaadi qaarqaaran ishi akkissene ka amma nefo akkinnittane in teymo.

¹¹ Ishina piisantiiyyi wa kippeetan asannittane haka harkan kayannittan kara'e, akka haka piraampirati japaattaayshinan akkissane'en xajeellinna.

¹² Waan xajeellinna' nefo, akka orrase amanteeta ka duupattaan japaade ka wa kippeeta ishootta' daasame lehaanno pahanaattan diisheey, akka nunukkullaya kodditane'en.

Kippeeta Waaqa a dukaata

¹³ Waaqa ete Aprihaami' kippeeta daasheeyye, nama isha qara qapo a ishin xaxado a pila qoota in kinnin malla, issinni xaxade ka kide,

¹⁴ “Dukaatan in ke' saka ka sanynyeetaayti lekaysha.”

¹⁵ Aprihaami ka duupattaan asade ka wa ishi' kippeeta' daasame akkade.

¹⁶ Orra oto xaxannooyye, maxxa ishootta qaropa qaponne xaxanni ka haasaasso xaxaan kokkonnanni ka shiishsha otantaaysho oppa ca' piisa hattinni.

¹⁷ Sedenne Waaqa, wa koda' piisade akkima pursammi in kinnin, orra kippeese lehado'e olkela la'assa fade ka kippeese xaxaan ishootta kokkonnayshe.

¹⁸ Sedenneew Waaqa kippeetaadi isho xaxaadi wossen pursammi in kinnini ikka oppa darada kooni in kinnini lakki ino' daashe, akkan wossen lakki qudan kippeeta ino tura kitto kokkonnaysanno ka qapanno'e, ino a xelsuma akkatta isha kelopa qahe, xasa oorsatta akuttan akkanna.

¹⁹ Kippeetose caatinno'e akkama siplase markapan qaatinnaan lellehni in kinnin kokkoka mina; kippeetase an Yesuusin qapno kaaranta karanne tarpini ka pora Qulqullaawe opa kullini.

²⁰ Poroose qulqullaawe oppopa Yesuusi, taanteta a ishin malkesedeqi qeesitta koddenne saara qeesewwa a parapara' kodde ka ino malla turanneew kulle.