ipro 5 - Mataafa Qulqulloota

¹ Saara qeesewwa matta mina'e, orroppa reexammi ka wa Waaqa mina tooynaati desa, pakka orra oppa' daassata isho kalisoota kalissa' shuumammi.

² Isha mattaadi' qoota nukkulluma qapo malla, a upna in qapnini isho a kamma dapna suraysattaan tooyeeta i'ettaninni.

³ Isha mattaadi'iw nukkullumaadi minanne kalisootase ishin haseenta juppoota teynaan samayta patta'en ma issi kuli kalissa isha parpaaccisni.

⁴ Akka Arooni mina'e nama a Waaqa isha halaade maliiyyi, nama takka nefo issin ulfeenose akkanni in co.

⁵ Akkimoose' mina'ew, Kiristoosi ulfeena a saara qeesewwa koddeeta, Waaqase ishi' kide, “Atti a innaayyo, anti awwen ke xaaye” kapa akkade.

⁶ Pora pila oppa Waaqa ikiiniwwi, “Taanteta a ishin malkesedeqi qeesitta koddeetinni, atti haka paraparati a' qeesitta.”

⁷ Yesuusi eta a nama kodde ka piisse' qara kallaadeetiiyyi, Waaqase toota kela ishan paheeta ettanshopa, ullupitta a kutta ka ilmaama kuttaatin qinseeta isho naappuma dehayshe. Qoota naalumaan a ajajammo isi kode malla Waaqa ka qinseetaadi dakaye.

⁸ Kadi punu inna Waaqa kodde nefooyye, rakkoota a isha qara' kayte oppaayye ajajama kollade.

⁹ Ka ete a qaja in qapnin kodde kammaayye, orra ishi ajajammo piisa'e, wa a minan dina parapara akkadane ishootta kodde.

¹⁰ Waaqa ka taanteta a ishin malkesedeqi qeesitta koddenne saara qeesewwaati isha kode ka shuume.

Orra akka amanteetaysho alle'en diinnini'i dehama a tura desa daasame

¹¹ Qootoseti desa, waan allu' haasawanna kuttaya ca ma, qoota qanqannissa a dakkaysanni akkinnin malla, haasa qapatta'e shakki malla, ishina olkela la'assa ikokkoki.

¹² Helani allu isase kollissampaya koddeeta ishin parpaaccisni; ma amma akka nama pila qara' ooro ka qaaleta Waaqa oppaayye, kollissa a qara paayyinaan ishin kollisho ishin parpaaccisni. Se minan oori wa ishin parpaaccisna aanna diisheey, damta kokkoka'en.

¹³ Nama aanna ishi qapnaan qoota taa'ima kodde malla, kollissa a ishin a neeqa isho a paxaara olkela reexnaane in kollanne.

¹⁴ Orra a damta kokkoka ishootta parpaaccisnitto xoori, orra a kukutta a wa neeqa isho a paxaara olkela reexa' kolluma qapo.