ipro 4 - Mataafa Qulqulloota

¹ Se malla porase a nessumaadi a ino' daanno oppopa kalta'e, kippeeta an teyyanne qoota amma ikkiti kitto malla, ishin oppa nama takka nefo a nessumaadi oppopa kalta'e faroota in dapnini'i piisani tooytaanna.

² Akkima ishootta otootase a fayya dakayen mina'e, ino nefo in dakayneew. Ma xoori ishootta qaaletase a dakayen qoota amanteetan in teyyannin malla ishootta qara we in nakanne.

³ Kodaadi kadi punu a piita uumamte paayyatteeyye dikkade nefooyye, akka kide “Miiriyyonnen xaxade ka kide ‘Pakkanna nessumaayyo oppopa in kalan.’” Mina'e; ammaaw ino amanna porase a nessuma a Waaqa ino' daanno oppopa in kalla.

⁴ Qoota kuyyaata tappattati desa, pora takka oppa itaafamte ka kiini, “Waaqa kuyyaata tappattatiiyyi, kodaadi piisa kela nessade.”

⁵ Ka porase qaraayyew kiiniiwwi, “Porase a nessuma an ishootta' daanno oppopa pakkanna in kalan.”

⁶ Sene paayyota qara otoota fayya dakaye, qoota in ajajammin malla, porase a nessuma a Waaqa ishootta' daanno oppopa in kalle. A koddito ma akka eeyyepa kalane'e a ishootta' faqqatamte orra demo ca,

⁷ Sede nefo akka turan kidamte mina'e ete kiino oto awwe nessaadi dakaynittaneeyye xolmaassina in kokkonnayshan.” Orra nessumaadippopa kalo'e Waaqa eta pilaa'e qapade; etoosen ka awwe kidamen; akka turan kodayteeta xatta' qaraadesa lelamte mina'e; Waaqa sapanna leka kammaayye Taawwiti qudan haasawade. Isheetta' nefo ikiini oto awwe nessaadi dakaynittaneeyye xolmaassina an kokkonnayshan.

⁸ Kadin Iyyaasu pora nessuma ishootta' daashe kiiteeyye, helani Waaqa oppa'e in ooro ka “Awwe” kideetanne qoota kuyyaata pilaati desa haasawanni in heenne.

⁹ Se malla samayta Waaqati'i, nessuma a nessuma sampata' paha'e, amma ikki' hasni.

¹⁰ Akka Waaqa kodaadi kela nessade mina'e, nama a nessumoosen a Waaqa daanna oppopa kalo, asseew kodaadi kela nessada.

¹¹ Se malla akka nama takka nefo ajajama diissata a orrooseti kamma in annin ka in pi'inini'i, poroose a nessuma a Waaqa oppopa kalta' japaanna.

¹² Qaaleta Waaqa caattampayteeta ka koda kooni. Ka koraateta paka lakkin qaarta qapto qaropa qaarta qapta ka haka napseeta isho hapura ka hittinna isho lafa olkela xawwi xawwi oorinnitto'e quurri ka dikatta isho xajeelta a karitta kara' juutame kara qorri ka faranni.

¹³ Uumata fuula Waaqa' turaayye dekanno takka nefo in co. Ildaadi turaayye we' piisa lulle caani ka lakoppa' piini ka akkaanni. Ino' nefo isha tura' malseeta oorsatta ino parpaaccisni.

Yesuusi saara qeesewwa a kutta

¹⁴ Se malla qoota an saara qeesewwa a kutta a moontopa fayyade qapno malla. amanteetinno kokkonnaysanna ka qapanna. Saarose a qeesewwa nefo Yesuusi innasene a Waaqa.

¹⁵ Saara qeesewwa an ino' qapno, a nukkullumaanno oppa ino suraysanno; isha we piisanne xanno mina'e ekkaysatame ma juppoota takka nefo in koone.

¹⁶ Se malla, akkan diissata akkanno'e ka oto qaarqaarsa ino parpaaccisnaaneeyye daassataadi akkanno'e, suufaanase a Waaqa, a kapa daassataadi teyannitto, kapopa fuura takkan nefo mali dehaanna.