ipro 3 - Mataafa Qulqulloota

Yesuusi akkima Muuse qara qapo

¹ Se malla ishina a qulqullaawe, Waaqa ka ishin halaade hellaanno a kiristaanatiiyyi! Yesuusise erkamampayta isho saara qeesewwa a amanteetinno' kodde qaropa dikattaayshin oorsada.

² Akka Muuse tika Waaqa piisa kara a amaname kodde mina'e, Yesuusi Waaqase isha shuume'e, asseewwen a amaname.

³ A tika qupno akkima tikase qaropeela ulfeena kutta qapo mina'e, Yesuusi asseew Muuse qaropeela a ulfeena kutta akkatta isha parpaaccisno kodde.

⁴ Keeto, tikka piisa qupampyta qapa. A we' piisa qupe' xoori Waaqa.

⁵ Wa a Waaqa itturopa kidaati maakkitta kodde. Muuse tika Waaqa piisa karaayye akka orxayta mina'en nama amaname.

⁶ Kiristoosi' xoori, akka inna tika' mina'e tika Waaqa kara amaname. Tikoose' nefo ino; ino' nefo oton waan qara' xasa xaayanninna ka jeejjanninna isho waan ishin maxanyumminna'en qapanninnaayyen tikaadi koddina.

Dehaamata a turadesa samayta Waaqati' daasme

⁷ Se malla akka Hapura Qulqulloota' kiino mina'e, “Oto awwe nessaadi dakaynittaneeyye,

⁸ a koommaytoppaayye ana ekkaysatteneeyye akka tiyya' xaaten mina'e, xolmaassin an kokkonnayshan.

⁹ Waaqa ikiini, ‘Eeyyeeyye aappadaassin ana ekkaysaden ka ana ikkisaden ka waan para kunda afur kara' kode akken.’

¹⁰ Anka se malla xeltose qara' miiroode ka kide, ‘Ishootta awta piisa kammaaw dapni, umma saantiyyo in upnaanne.’

¹¹ ka miiriyyon xaxade ka kide, ‘Poroose a nessuma an ishootta' daasho oppopa pakkanna in kalan.’”

¹² Hellaanno a kiristaanatiiyyi! ishin oppaayye nama takka nefo akka karitta neeqa ka amanni in kinnin, a caattampayta Waaqa kapa nama sekanno in qapnaannini'i, tooytaada.

¹³ Se kapaayye, ishin oppaayye nama takka nefo akka in sassapatammin ka karittaadi kamtollayta in koonini'i, kiseetose “Awwe” kidamte haka kitto kara'e, kuyyaata piisa oli dehaama.

¹⁴ Oton in amanteetase' xanno an paayyota qara qapno haka piraampirati kokkonnaysanne ka qapanneeyye, Kiristoosi olliiyyin lehampaya koddina.

¹⁵ Sede nefo akkima lelamte ka kidamte, “Oto awwe nessaadi dakaynittaneeyye, akkima etasene a tiyyaati kooten mina'e; xolmaassin an kokkonnayshan.” mina,

¹⁶ Hela amma allu sene nessaadi dakaye ka tiyya' xa'e opa ayno? ishootta isasene a Muuse ishootta tura' qatte ikka piita Kipsi kara sookene piisanne?

¹⁷ Sene para kunda afur piisa Waaqa miirassa quda' kallaade opa ayyno? Isasene juppoota kode ka koommaytoppa' le'e'enne?

¹⁸ Se maliiyyiw oto sene an ajajammini in koddininiiyyi, isasene a ishootta qara' xaxade ka kide'e, “Nessumaayyo oppopa a' kaltan” opa ayno?

¹⁹ Se malla wa malla kalta malaalene, akkima qoota in amannin malla koddite in akkininna.