ipro 13 - Mataafa Qulqulloota

Koda a Waaqa xasanno

¹ Awta piisa jaalala a hellaa toola olli qapnaada.

² Xaykitta teyyatta in teyman. Orra demo a asse xaykitta teyyannooyye, a in upnin malii erkampattowwa Waaqa xaykuma' teyyadeey.

³ Akka orra hidame olliiyyi hidamten mina' dikada ka orra a hidame matte oorsada. Ka a xaaysho mina a rakkoota teyyanna' kodda ka orra a rakkanno dikada.

⁴ Hemitta a orra piisa oppa' ulfeessamo. Sharmuutta isho dahalmaya Waaqa qoota qara' farato malla diirta isho iskatteetaadi olli' amanama in diinin ka hemitta in nyalinnin.

⁵ Kaaja jaalatta kapa sekaada; wa' qaptane a ishin kayen. Waaqa ikide “Pakkanna alle ke an kato; umma alle ke an diisho.”

⁶ Semmalla oppa' amanaannen kiini, “Waaqa qaarqaarsampaytiyyooy, an fuuro. Nama atta ana koda ettansha?”

⁷ Saarra sene' xaayshin paayyota qara qaaleta Waaqa ishina' torre in teyman. Ka wa kallaataaysho kamma teyade matte oorsattaanne amanteetaayshinan ishootta pahanaada.

⁸ Yesuusi Kiristoosi xala ka awwe ka haka paraparati ishaaw umma pursammi in co.

⁹ Kollissa ika lekayta a in kollatamminitin an poojaman. Karittinno kati taantewwa damta tooytaatta diinna ka daassata Waaqatin japaannaayye ipaxaari. Orra taantewwosen a damta kamma aane we takkan' nefo in teyne.

¹⁰ Ino poqasene a kalisoota in qapna ma, qeesewwa tukkana kela koda koona, damta poqasene a kalisoota qara kitto teyyatta ka dameeta ishootta in faqqatamme.

¹¹ Saarase a qeesewwa a Yihutaata, diikase a horeeta a ishin haseenta juppoota teynaane qapanni ka qulqullitteeta a qulqullaawte kelopa kullini. Pukka horeeseti' xoori, safareeyye laka tula'e kupanni.

¹² Akkimoose' mina'ew Yesuusi, diikaadin orra qulqullassa'e, xarra katamaatiiyyi, laka tula' rakkoota teyyade.

¹³ Ino' nefo safara kara sookna ka isha kapopa anna ka jeeraadippa qoottanna.

¹⁴ Maana malla ino, katama itturopa de'a'en asanninna diisheey, piisse qara katama qa'ade ka eyye' tawna an qapno.

¹⁵ Semmalla Yesuusi Kiristoosi qudanne awta piisan kalisoota kalata' Waaqa kalinna; sede nefo kalisootase a kalata hibba maakkumampayaati maxxaadi dehaannitto.

¹⁶ Wa paxaara kodeeta ka wa qaptane quda orra pilaati' qootteeta in teyman. Kalisoota asse pahato Waaqa xasanniiy.

¹⁷ Saarraassina' ajajama ka hupnaaysho a ukkumeetati' piddama. Ishootta' qoota saaruma a oppa' kaassataman qapan malla, qoota napseetaayshinati desa japaanniiy. Kati ishootta ajajammittaneeyye, ishootta xasanne kodaaysho' kodan. Ataakati nyarrahatanne kodaaysho' kodan. Umma sede ishina we in' nakasso.

¹⁸ Ino' qinsada, akkiman dikatta a karan xatan qootisammi in kinnin qapno fayya'en upnaay. Qinda piisan qalpeeta fayyaatin kallaattaan xajeellinna.

¹⁹ Laadi akkan jarjartan ishin kapopa tiitaawo'e, akka' japaattan ka qinsattane'en ishin naappanni.

Qinseeta piraampira

²⁰ Waaqase a nakayta, isase Poqallaanno Yesuusi, sikmaytase a kahirra a kutta, diika kodayteeta paraparatin tootoppa xaashe,

²¹ Akka heennaadi kodeeta ettanissane'e a koda paxaara piisa kodeeta' hupna ishina' daasho. Ka wa isha xasanna Yesuusi Kiristoosi qudan ino' kodo. Ulfeena a haka paraparati a Yesuusi Kiristoosi kayo; Ameen!

Kuutan hidda

²² Hellaanno a kiristaanatiiyyi! erkanoosen an ishina' taafe' qoota kumma'i malla, akka leloose xayyo a dehaamta duupattaan teyyattane'en a kuttati ishin naappanni.

²³ Timotoosi innasene xanno a kiristaana akka tika hidati furame, akka' upnaattanen faani. Oton ijarjartan arepa de'eyye, isha olliiyyin ishin kapopa de'a ka ishin akka.

²⁴ Saarraassin isho qulqullowwa piisa'e, nakaytiyyo lela. Kiristaana a piita Taaliyaati de'e piisa, nakayta ishina' erkini.

²⁵ Daassata Waaqa a ishin piisa olli caatto.